2 Auā ‘ou te fa‘apotopotoina nu‘u uma e tau ma Ierusalema; e ā‘ea le ‘a‘ai, e vetea fo‘i fale ma fetoso fafine, e ta‘ita‘i fa‘atagataotau‘aina le tasi vaega o le ‘a‘ai; a o ē totoe o le nu‘u, e le fa‘ate‘a‘eseina i latou i le ‘a‘ai.
3 ‘Ona afio atu lea o le ALI‘I e tau ma ia nu‘u, pei o le aso na tau ai o ia i le aso o le tau‘a.
4 E tu ona ‘a‘ao i lea aso i luga o le mauga o Olive, o lo‘o feagai ma Ierusalema i gagae; e vaeluaina fo‘i le mauga o Olive i totonu i sasa‘e ma sisifo, o le vanu tele lava; e te‘a atu le tasi itū o le mauga i le itū i matū ma le tasi ona itū i le itū i saute.
5 ‘Ona ‘outou sōsōla lea i le vanu o i o‘u mauga; Auā e pa‘ia Asela i le vanu o mauga; tou te sōsōla fo‘i, pei ‘ona ‘outou sōsōla i le mafui‘e i ona po o Usia le tupu o Iuta; e afio mai lava le ALI‘I lo‘u Atua ma le ‘au pa‘ia uma fa‘atasi ma oe.
6 E o‘o lava i lea aso, e lē i ai le malamalama o mea aogā, a o le pouliuli lava;
7 ‘ae o‘o mai le aso, e tasi lava ia, (‘ua silafia lava e le ALI‘I,) e lē o le ao, e lē o le po; ‘ae a o‘o i le itū aso afiafi e malamalama ai.
8 O lea aso fo‘i e alu atu ai le vai ola nai Ierusalema; o le tasi ‘elia vaega e tafe atu i le sami i sasa‘e, a o le isi ona vaega e tafe atu i le sami i sisifo o le tausaga vevela ma le tausaga ma‘alili e fai ai ia mea.