1 Jesu ha a tloha moo, a ya meeding ya Judea, mose ho Jordane; bongata ba boela ba bokana ho yena, mme a boela a ba ruta jwalokaha e ne e le mokgwa wa hae.
2 Bafarisi ba tla ho yena, ba mmotsa, ka ho mo leka, hore na monna o dumeletswe ho hlala mosadi wa hae.
3 A ba araba, a re: Moshe o le laetseng?
4 Ba re: Moshe o dumetse hoba lengolo la hlalo le ngolwe, mme ho hlalwe.
5 Jesu a ba araba, a re: O le ngoletse taelo eo ka baka la bothata ba dipelo tsa lona.
6 Empa tshimolohong ya hlolo ya dintho tsohle, Modimo o ba entse e le e motona le e motshehadi.
7 Ka baka leo, motho o tla tlohela ntatae le mmae, a kgomarele mosadi wa hae;
8 ba babedi e tla ba nama e le nngwe. Ha ho le jwalo, ha ba sa le babedi, e se e le nama e le nngwe.
9 Ka baka leo, seo Modimo o se kopantseng hammoho, se se ke sa arolwa ke motho.
10 Ka tlung, barutuwa ba hae ba boela ba mmotsa hodima taba eo.
11 A re ho bona: E mong le e mong ya hlalang mosadi wa hae, mme a nyala e mong, o a mo feba.
12 Le mosadi ha a hlala monna wa hae, a nyalwa ke e mong, o a feba.
13 Yaba o tlisetswa bana, hore a ba ame; barutuwa ba hae ba ne ba kgalemela ba ba tlisang.
14 Jesu, ha a bona hoo, a ba bohale, a re ho bona: Lesang bana ba tle ho nna, mme le se ke la ba thibela; hobane mmuso wa Modimo ke wa ba jwaloka bona.
15 Kannete ke re ho lona: E mong le e mong ya sa amoheleng mmuso wa Modimo jwaloka ngwana, a ke ke a kena teng.
16 Mme ha a ba sikile, a ba bea matsoho hodimo, a ba hlohonolofatsa.
17 Ha a tswela tseleng, e mong a mo mathela, a kgumama ka mangwele pela hae, a mmotsa, a re: Moruti ya molemo, ke tla etsang ke tle ke rue lefa la bophelo bo sa feleng?
18 Jesu a re ho yena: O mpiletsang ya molemo? Ha ho ya molemo haese a le mong, e leng Modimo.
19 O tseba melao e reng: O se ke wa feba, o se ke wa bolaya, o se ke wa utswa, o se ke wa bea bopaki ba bohata, o se ke wa ja tsa e mong, hlonepha ntatao le mmao.
20 Eo a araba, a re ho yena: Moruti, tseo tsohle ke di bolokile haesale le bonyenyaneng ba ka.
21 Jesu ha a mo shadima, a mo rata, mme a re ho yena: O hloka ntho e le nngwe: Tsamaya, o rekise ka tsohle tseo o nang le tsona, o di fe bafumanehi, mme o tla ba le letlotlo lehodimong; o ntano tla, o ntatele o ipelesitse sefapano.
22 Eo a mpa a hlajwa ke polelo eo, a ikela a swabile; hobane e ne e le ya nang le maruo a maholo.
23 Jesu a qamaka, a re ho barutuwa ba hae: Ho ya ba thata hakakang ho ba nang le maruo ho kena mmusong wa Modimo!
24 Barutuwa ba makala ke polelo tsa hae. Empa Jesu a boela a bua, a re ho bona: Bana, ho thata hakakang ho ba tshepileng maruo ho kena mmusong wa Modimo!
25 Ho ka ba bonolo ha kamele e feta ka lesoba la lemao, ho ena le hore morui a kene mmusong wa Modimo.
26 Jwale ho tsota ha bona ha eketseha; ba botsana, ba re: Homme ho ka bolokeha mang?
27 Jesu a ba shadima, a re: Ke ntho e sitang batho, empa ha e site Modimo; hobane Modimo tsohle o ka di etsa.
28 Yaba Petrose o bua, a re ho yena: Bona, rona re tlohetse tsohle, mme re o latetse.
29 Jesu a araba, a re: Kannete ke re ho lona: Ha ho motho ya ka tlohelang ntlo, kapa banababo, leha e le bokgaitsedie, kapa ntatae, leha e le mmae, kapa bana, leha e le masimo, ka baka la ka le la Evangeli,
30 ya ke keng a newa ha lekgolo, jwale, mehleng ena, matlo, le banababo, le dikgaitsedi, le bommae, le bana, le masimo, hammoho le dihloriso; mme mehleng e tla tla, a newe bophelo bo sa feleng.
31 Empa ba bangata ba pele e tla ba ba morao, mme ba morao e tla ba ba pele.
32 Ba ne ba le tseleng, ba nyolohela Jerusalema, Jesu a ntse a ba eteletse pele; ba ne ba tshohile, ba mo latela ba ntse ba tshaba. A boela a ya thoko le ba leshome le metso e mmedi, a qala ho ba bolella tse tla mo hlahela,
33 a re: Bonang, re nyolohela Jerusalema, mme Mora motho o tla neelwa baprista ba baholo le bangodi, mme ba tla mo ahlolela lefu, ba mo neele baditjhaba.
34 Ba tla mo soma, ba mo shape, ba mo tshwele ka mathe, ba mmolaye; mme o tla be a tsohe ka tsatsi la boraro.
35 Ha tla ho yena Jakobo le Johanne, bara ba Sebedea, ba re: Moruti, re rata ha o ka re etsetsa seo re tla se kopa.
36 A re ho bona: Le rata ha ke le etsetsang?
37 Ba re ho yena: Re nee hore re dule kganyeng ya hao, e mong letsohong la hao le letona, e mong ho le letshehadi.
38 Empa Jesu a re ho bona: Ha le tsebe seo le se kopang. Na le ka tseba ho nwela senwelong seo ke tla nwela ho sona, le ho kolobetswa ka kolobetso eo ke tla kolobetswa ka yona na?
39 Ba re ho yena: Re ka tseba. Yaba Jesu o re ho bona: Efela le tla nwela senwelong seo ke tla nwela ho sona, mme le tla kolobetswa ka kolobetso eo ke tla kolobetswa ka yona.
40 Empa haele ho dula letsohong la ka le letona, leha e le ho le letshehadi, ha ke na ho ho nea, ho mpa ho boloketswe ba ho lokiseditsweng.
41 Ba leshome ha ba utlwa taba eo, ba qala ho hlonamela Jakobo le Johanne.
42 Empa Jesu, yare ha a ba bileditse ho yena, a re ho bona: Le a tseba hobane ba nang le lebitso la marena a ditjhaba ba di busa, mme ba baholo ba bona ba na le puso e thata hodima tsona.
43 Ho se ke ha eba jwalo ho lona; empa ya ratang ho ba moholo hara lona, e tla ba mohlanka wa lona;
44 mme ya ratang ho ba wa pele hara lona e tla ba mofo wa bohle;
45 hobane le yena Mora motho ha a ka a tlela ho sebeletswa, empa e le ho sebeletsa, le ho neela bophelo ba hae ho ba topollo ya ba bangata.
46 Ba fihla Jeriko. Jesu ha a etswa Jeriko le barutuwa ba hae, a ena le bongata bo boholo, Bartimea, mora Timea, wa sefofu, o ne a dutse pela tsela, a kopa.
47 Ha a utlwa hoba ke Jesu wa Nasaretha, a qala ho howa le ho re: Oho, mora Davida, Jesu, nkutlwele bohloko!
48 Ba bangata ba mo kgalemela, ba re, a kgutse; a mpa a aketsa a howa, a re: Mora Davida, nkutlwele bohloko!
49 Jesu a ema, a re, a bitswe. Yaba ba bitsa sefofu, ba re ho sona: Kgothahala, o eme, o a o bitsa.
50 Yaba se lahla kobo ya sona, sa ema, sa tla ho Jesu.
51 Jesu a bua, a re ho sona: O rata ha ke o etsetsang? Sefofu sa re ho yena: Rabboni, a nke ke boele ke bone.
52 Jesu a re ho sona: Eya, tumelo ya hao e o pholositse. Sa bona hang, sa ba sa latela Jesu tseleng.