1 Jesu a boela a qala ho ruta pela lewatle, mme bongata bo boholo ba bokana ho yena; yaba o kena ka sekepaneng, a dula ho sona lewatleng; haele batho bohle, ba dula fatshe, lebopong la lewatle.
2 A ba ruta ditaba tse ngata ka ditshwantsho, mme thutong ya hae, a ba bolella, a re:
3 Mamelang: Mojadi o ne a tswile ho ya jala.
4 Eitse ha a ntse a jala, hlaku tse ding tsa wela pela tsela, mme dinonyana tsa tla, tsa di ja kaofela.
5 Dihlaku tse ding tsa wela majweng, moo di se nang mobu o mongata; tsa phakisa ho mela, hobane di se na botebo ba mobu.
6 Tsatsi ha le tjhaba, tsa pona, mme tsa etjha ke ho hloka metso.
7 Tse ding tsa wela hara meutlwa, mme meutlwa ha e hola, ya di pupetsa, tsa sitwa ho beha dijo.
8 Tse ding tsa wela mobung o motle, tsa beha dijo, tsa mela, tsa hola; e nngwe ya beha tse mashome a mararo, e nngwe ya beha tse mashome a tsheletseng, e nngwe ya beha tse lekgolo.
9 Mme a re ho bona: Ya nang le ditsebe ho utlwa a utlwe.
10 Ha a le kathoko, ba nang le yena le ba leshome le metso e mmedi, ba mmotsa setshwantsho seo.
11 Yaba o re ho bona: Lona le neilwe ho tseba sephiri sa mmuso wa Modimo, athe ho bao ba kantle tsohle di etswa ka ditshwantsho;
12 e le hore, ha ba bona, ba bone, mme ba se ke ba bontshisa; leha ba utlwa, ba utlwe, ba mpe ba se ke ba utlwisisa; esere mohlomong, ba sokoloha, mme ba tshwarelwa dibe.
13 A boela a re ho bona: Hleka ha le tsebe setshwantsho seo na? Ha ekaba ho jwalo, le ka tseba jwang ditshwantsho tsohle?
14 Mojadi ke ya jalang lentswe.
15 Ba pela tsela, moo lentswe le jalwang teng, ke bao, ereng ha ba le utlwile, Satane a phakise a tle ho bona, mme a ba amohe lentswe le jadilweng pelong tsa bona.
16 Ho jwalo le ba amohetseng peo majweng; ke bao ereng ha ba utlwile lentswe, ba phakise ba le amohele ka thabo;
17 ba mpa ba se na motso ka ho bona, e le ba motsotso o se okae feela; mme ha tshwenyeho le hloriso di hlaha ka baka la lentswe, ba phakise ba kgoptjwe.
18 Ba amohetseng peo meutlweng, ke ba utlwang lentswe;
19 empa ho belaella tsa lefatshe, le thetso ya lefumo, le ditakatso tsa dintho tse ding, di kene, di pupetse lentswe, mme le nyope.
20 Ba amohetseng peo mobung o motle, ke ba utlwang lentswe, ba le amohela, mme ba beha; hlaku e nngwe e behe tse mashome a mararo, e nngwe e behe tse mashome a tsheletseng, e nngwe e behe tse lekgolo.
21 Jesu a ntoo re ho bona: Hleka lebone le tliswa hore le bewe katlasa morula, kapa katlasa malao na? Ana hase hore le hlongwe kandelareng na?
22 Hobane ha ho letho le sephiring le sa tlo ka le hlaha pontsheng; hape, ha ho letho le patilweng, le sa tlo ka le etla pepeneneng.
23 Ha motho a ena le ditsebe ho utlwa, a utlwe.
24 A boela a re ho bona: Elang seo le se utlwang hloko. Tekanyo eo le lekanyang ka yona, le lona le tla lekanngwa ka yona; mme ho tla phaellelwa lona ba utlwang.
25 Hobane ya nang le ntho, o tla boela a newe, athe ya se nang letho, ntho eo a nang le yona o tla e amohuwa.
26 Yaba o re: Mmuso wa Modimo o jwaloka motho ha a jadile peo tshimong.
27 Leha a ka robala, leha a ka tsoha, motshehare le bosiu, peo e nne e mele, e be e hole, kamoo a sa tsebeng kateng.
28 Hobane lefatshe le imedisetsa dijo ka ho etsa ha lona: pele ke lekgaba; hamorao ke qwapi, hamorao ke dihlaku tse butswitseng qwaping;
29 mme dijo ha di butswitse, a phakise a kenye sekele; hobane kotulo e fihlile.
30 Hape a re: Mmuso wa Modimo re tla o bapisa le eng? Re ka o tshwantsha ka setshwantsho sefe?
31 O jwaloka hlaku ya mosetareta, eo, ere ha e jalwa mobung, e leng yona e nyenyane ho dipeo tsohle tse lefatsheng.
32 Empa, ha e se e jadilwe, e hole, mme e fete meroho yohle ka boholo, e etse makala a maholo, mme dinonyana tsa lehodimo di ahe moriting wa yona.
33 A nna a ba bolella lentswe la Modimo ka ditshwantsho tse ngata tse jwalo, kamoo ba neng ba ka lokela ho utlwa kateng.
34 O ne a se ke a ba bolella letho haese ka ditshwantsho; ere ha a le kathoko, a qaqisetse barutuwa ba hae ditaba tsohle.
35 Ka tsatsi lona leo, ha e le mantsiboya, a re ho bona: A re tsheleleng mose.
36 Ha ba kgutlisitse bongata, ba mo nka ka sekepana seo a neng a le ho sona; le dikepana tse ding di ne di le teng ho yena.
37 Jwale, ha tsoha sefefo se seholo sa moya; maqhubu a metsi a kena sekepaneng, mme se ne se se batla se tlala.
38 Yena o ne a le maraong, a robetse mosamong. Ba mo tsosa, ba re ho yena: Moruti, ana hase letho ho wena leha re timela na?
39 A tsoha, a kgalemela moya, a re ho lewatle: Kgutsa, o re tu! Yaba moya o a kgutsa, mme kgutso e kgolo ya eba teng.
40 Yaba o re ho bona: Le boi keng hakalo? Le hloka keng tumelo?
41 Mme ba tshaba ka tshabo e kgolo, ba bolellana, ba re: Na enwa ke mang na, ha a utluwa ke moya le ke lewatle?