1 Jesu a boela a kena sinagogeng, mme motho o ne a le teng moo ya omeletseng letsoho.
2 Ba mo ela hloko ho bona ha a tla mo fodisa ka tsatsi la Sabatha, ba tle ba mo qose.
3 Yaba Jesu o re ho motho ya letsoho le omeletseng: Ema mona, hare.
4 A ntoo re ho bona: Haele ho etsa hantle, e le ho etsa hampe, ho pholosa motho kapa ho mmolaya, ho lokelang ho etswa ka Sabatha ke hofe na? Empa ba kgutsa.
5 A ba habanya ka bohale, a swabile ke bothata ba dipelo tsa bona; yaba o re ho motho eo: Otlolla letsoho la hao. A le otlolla; yaba letsoho la hae le a fola, la boela la loka jwaloka le leng.
6 Jwale, bafarisi ba tswela ntle, ba etsa morero le Baheroda hodima Jesu, ho tseba hore na ba ka mmolaya jwang.
7 Jesu a ikela le barutuwa ba hae, pela lewatle, mme bongata bo boholo ba mo latela, bo etswa Galelea le Judea,
8 le Jerusalema, le Idumea, le mose wane wa Jordane. Le ba naheng ya Tire le Sidone, yare ha ba utlwa tse kgolo tseo a di etsang, ba tla ho yena ba le bangata haholo.
9 A ba a bolella barutuwa ba hae hore sekepana se nne se mo emele, ka baka la bongata, hore bo se ke ba mo hatakela.
10 Hobane enere ha a ntse a fodisa batho ba bangata, bohle ba nang le malwetse ba ne ba itihela ho yena, ba tle ba mo ame.
11 Le meya e ditshila ha e mmona, e ne e kgumama pela hae, e howe, e re: O Mora wa Modimo.
12 Mme o ne a e laya haholo, hore e se ke ya mmolela.
13 Yaba o nyolohela thabeng, a ipiletsa bao a ba ratang, mme ba tla ho yena.
14 A bea ba leshome le metso e mmedi, hore ba be ho yena, mme a ba rome ho bolela Evangeli,
15 mme ba be le matla a ho fodisa malwetse, le a ho leleka batemona.
16 Ke Simone, eo a mo ekeleditseng lebitso la Petrose;
17 le Jakobo, mora Sebedea, le Johanne, ngwanabo Jakobo, bao a ba ekeleditseng lebitso la Boanergese, ke ho re: Bara ba seaduma;
18 le Andrease, le Filipi, le Bartholome, le Mattheu, le Thomase, le Jakobo, mora Alfea, le Thaddea, le Simone Mokanana,
19 le Judase Iskariota, e leng yena ya mo ekileng.
20 Ba ntoo ya tlung, mme bongata ba boela ba bokana teng, Jesu le barutuwa ba hae ba ba ba sitwa le ho ja bohobe.
21 Bahabo ha ba utlwa hoo, ba tswela ho ya mo tshwara; hobane ba ne ba re: Ha a sa ikutlwa.
22 Bangodi ba theohileng Jerusalema, ba re: O na le Beelsebule, mme o leleka batemona ka morena wa batemona.
23 A mpa a ba biletsa ho yena, a ntoo ba bolella ka ditshwantsho, a re: Satane a ka leleka Satane jwang?
24 Mmuso ha o kgaohane ho itwantsha, mmuso oo o ke ke wa tiya;
25 le ntlo ha e kgaohane ho itwantsha, ntlo eo e ke ke ya tiya.
26 Le yena Satane, ha a itwantsha, a kgaohana, a ke ke a tiya, empa e se e le ho fela ha hae.
27 Ha ho motho ya ka kenang tlung ya senatla ho phahla mesebetsi ya sona, a eso ho tlame senatla pele, ebe hona a phahlang ntlo ya sona.
28 Kannete ke re ho lona: Bara ba batho ba ka tshwarelwa dibe tsohle le dinyefolo tsohle tseo ba nyefotseng ka tsona.
29 Empa ya nyefolang Moya o Halalelang, a ke ke a tshwarelwa le ka mohla o le mong, empa o tla ba le molato wa sebe se sa feleng.
30 O ne a rialo kahobane ba ne ba re: O na le moya o ditshila.
31 Mmae le banababo ba tla, ba ema kantle, ba romela ho yena ho mmitsa.
32 Mme bongata bo ne bo dutse, bo mo teetse hare. Yaba ba re ho yena: Bona, mmao le banabeno ke bana kantle, ba o batla.
33 A ba araba, a re: Mme le banabeso ke bomang?
34 A ba a habanya ba dutseng ba mo teetse hare, a re: Bonang, mme le banabeso ke bana;
35 hobane ya etsang thato ya Modimo, ke yena e leng ngwaneso le kgaitsedi ya ka le mme.