1 E sa le hosasa, baprista ba baholo ba etsa morero le baholo, le bangodi, le lekgotla kaofela. Eitse hobane ba tlame Jesu, ba ya le yena, mme ba mo neela Pilato.
2 Pilato a mmotsa, a re: Na o morena wa Bajuda na? A araba, a re ho yena: O boletse teng.
3 Yaba baprista ba baholo ba mo qosa ka taba tse ngata.
4 Pilato a boela a mmotsa, a re: Na ha o arabe letho na? Bona, ba o qosa ka ditaba tse ngata hakakang!
5 Empa Jesu a se ke a araba letho, Pilato a ba a makala.
6 Mohla mokete, o ne a ba lokollela motlamuwa e mong, eo ba mo qelang.
7 Ho ne ho na le e mong, ya bitswang Barabase, ya holehilweng le ba bang ba entseng moferefere, ba bolaile motho moferefereng.
8 Bongata ha bo nyolohile, ba qala ho kopa hore Pilato a etse jwalokaha a ne a ba etsetsa kamehla.
9 Pilato a ba araba, a re: Hleka le rata ha ke le lokollela morena wa Bajuda na?
10 Hobane o ne a tseba hoba baprista ba baholo ba mo neetse yena ka baka la mona.
11 Empa baprista ba baholo ba hlohlelletsa bongata hore a ba lokollele Barabase.
12 Pilato a boela a bua, a re ho bona: Ha ho le jwalo, le rata hore ke etseng ka eo le reng ke morena wa Bajuda?
13 Yaba ba boela ba howa, ba re: Mo thakgise!
14 Pilato a re ho bona: Na o entse bobe bofe? Jwale ba totisa ho howa, ba re: Mo thakgise!
15 Mme kahobane Pilato a ne a rata ho kgahlisa bongata, a ba lokollela Barabase, mme eitse hobane a shape Jesu, a mo neela ho thakgiswa.
16 Bahlabani ba mo isa lebaleng, ke ho re, lekgotla le leholo, mme ba bokella sehlopha sohle.
17 Ba mo apesa kobo ya purepera; ba loha mofapahlooho wa meutlwa, ba mo rwesa wona hloohong;
18 mme ba qala ho mo dumedisa, ba re: Dumela, morena wa Bajuda!
19 Ba mmata hloho ka leqala, ba mo tshwela ka mathe, ba wa ka mangwele, ba mo kgumamela.
20 Eitse hobane ba mo some, ba mo hlobodisa kobo ya purepera, ba mo apesa diaparo tsa hae, mme ba ya le yena ho mo thakgisa.
21 Ba qobella e mong ya fetang, a etswa masimong, hore a jare sefapano sa Jesu; e ne e le Simone wa Sirene, ntata Aleksandere le Rufuse.
22 Ba mo isa thoteng ya Golgotha; ha ho fetolwa, ke ho re, thota ya lehata.
23 Mme ba mo nea veine e tswakilweng ka mira, hore a e nwe; empa a se ke a e nka.
24 Ha ba mo thakgisitse, ba arolelana diaparo tsa hae, ba di laola ka lotho, ho tseba seo e mong le e mong a tla se nka.
25 E ne e le hora ya boraro ha ba mo thakgisa.
26 Lengolo la molato wa hae le ne le ngodilwe, le re: Morena wa Bajuda.
27 Hammoho le yena ba thakgisa le disenyi tse pedi, se seng ka letsohong la hae le letona, se seng ka ho le letshehadi.
28 Kahoo, ha etsahala lengolo le itseng: O badilwe le bakgopo.
29 Ba fetang ba ne ba mo nyefola, ba sisinya dihlooho tsa bona, ba re: Hela! wena ya qhaqhang tempele, ya e tsosang ka matsatsi a mararo,
30 o ipholose ka ho theoha sefapanong!
31 Ka mokgwa o jwalo, le bona baprista ba baholo ba buisana le bangodi ka ditshomo hodima hae, ba re: O pholositse ba bang, yena o sitwa ho ipholosa!
32 Kreste, morena wa Iseraele, a ke a theohe jwale sefapanong, re tle re bone, mme re dumele. Le ba thakgisitsweng le yena ba ne ba mo hlapaola.
33 Ha ho tlile hora ya botshelela, lefifi la eba teng lefatsheng lohle, ho fihlela hora ya boroba mono o le mong.
34 Ka hora ya boroba mono o le mong, Jesu a howa ka lentswe le leholo, a re: Eloi, Eloi, lamma sabakthani? Ha ho fetolwa, ke ho re: Modimo wa ka, Modimo wa ka, o ntloheletseng na?
35 Ba bang ho ba leng moo, ha ba utlwa, ba re: Utlwang, o bitsa Elia.
36 Yaba e mong o a matha, mme hobane a tlatse seponse ka asene, a se hloma leqaleng, a mo nwesa, a re: Lesang, re ke re bone ha ekaba Elia o tla tla mo fanyolla.
37 Empa Jesu a meketsa ka lentswe le leholo, a neela moya.
38 Yaba lesela la tempele le hahoha kalehare, ho qala hodimo ho isa tlase.
39 Molaodi wa lekgolo ya emeng moo, malebana le yena, eitse ha a bona kamoo a neetseng moya kateng, hobane a meketse, a bolela, a re: Motho enwa e ne e le Mora wa Modimo ruri.
40 Le basadi ba ne ba le teng, ba tadimile ba le hole; hara bona ho ne ho le Maria Magdalena, le Maria, mma Jakobo e monyenyane le Jose, le Salome.
41 Ke bao, e neng ere ha a sa le Galelea, ba neng ba mo latela, ba mo sebeletsa, ba ena le ba bang ba bangata, mme ba ne ba nyolohetse le yena Jerusalema.
42 Ha e se e le mantsiboya, kahobane e ne e le hlekelo, ke ho re, letsatsi le hlahlangwang ke la Sabatha,
43 ha tla Josefa wa Arimathea, monna wa lekgotla ya kgabane, ya neng a lebeletse mmuso wa Modimo le yena; a beta pelo, a kena ho Pilato, mme a qela setopo sa Jesu.
44 Pilato a makala ha a se a shwele. Yaba o bitsa molaodi wa lekgolo, a mmotsa hore na ho se ho le motsotso a shwele.
45 Eitse hobane a utlwe ho molaodi wa lekgolo, a nea Josefa setopo.
46 Josefa a reka lesela, a fanyolla setopo sa Jesu, a se phuthela leseleng, a se bea lebitleng le betlilweng lefikeng, a ntoo phikolosetsa lejwe pela monyako wa lebitla.
47 Mme Maria Magdalena le Maria, mma Jose, ba ne ba tadima moo se bewang.