1 Yaba ba fihla mose wane wa lewatle, naheng ya Bagerasene.
2 A re a sa tswa sekepaneng, motho ya nang le moya o ditshila, ya tswang mabitleng, a phakisa a mo kgahlanyetsa.
3 O ne a dula mabitleng, mme ho ne ho se motho ya tsebang ho mo tlama, leha e le ka mahlaahlela;
4 hobane o ne a se a ile a tlangwa hangata ka ditshepe le ka mahlaahlela, a mpa a roba mahlaahlela, a tula ditshepe; ho ne ho se motho ya tsebang ho mo thapisa.
5 Kamehla, motshehare le bosiu, o ne a le dithabeng le mabitleng, a ntse a howa a ikgoba ka majwe.
6 Ha a bona Jesu, a sa le hole, a matha, mme a mo kgumamela.
7 A ntoo howa ka lentswe le leholo, a re: Taba ya ka le wena keng, Jesu, Mora Modimo o moholoholo? Ke o antsha ka Modimo, hore o se ke wa ntlhokofatsa.
8 Hobane Jesu o ne a re ho wona: Tswa mothong eo, moya o ditshila.
9 Jesu a botsa, a re: Lebitso la hao o mang? Wa araba, wa re ho yena: Lebitso la ka ke Legione; hobane re bangata.
10 Ba mo rapela haholo, hore a se ke a ba leleka naheng eo.
11 Mohlape o moholo wa dikolobe o ne o le teng hona moo dithabeng, o fula.
12 Batemona ba mo rapela, ba re: O re romele dikolobeng tseno, re kene ho tsona.
13 Jesu a phakisa a ba dumella. Yaba meya e ditshila eo e kena dikolobeng; mme mohlape wa mathela selomong, wa itihela lewatleng, e batlile e eba kete tse pedi, mme tsa bipelwa lewatleng.
14 Ba neng ba disitse dikolobe ba baleha, ba ya tsebisa ba motseng le ba naheng; yaba bao ba tswa ho ya bona ho hlahileng.
15 Eitse ha ba fihla ho Jesu, ba bona ya neng a na le batemona ba legione a dutse, a apere, a ena le ditaba; mme ba tshaba.
16 Ba neng ba bone hoo ba ba bolella kamoo ho entsweng kateng ho motho ya neng a na le batemona, le ho dikolobe.
17 Yaba ba qala ho rapela Jesu, hore a tlohe naheng ya bona.
18 Ha a kena sekepaneng, motho ya neng a ile a ba le batemona, a mo rapela, hore a mo dumelle ho dula le yena.
19 Jesu a se ke a mo dumella, a mpa a re ho yena: Eya hae, haeno, ho banabeno, o ba tsebise tse kgolo tseo Morena a o entseng tsona, kamoo a o utlwetseng bohloko kateng.
20 Yaba o a ya, mme a qala ho bolela naheng ya Dekapolise ntho tse kgolo tseo a di entsweng ke Jesu; mme bohle ba makala.
21 Yare hobane Jesu a boele a tshelele mose wane ka sekepana, bongata bo boholo ba bokana ho yena; o ne a le pela lewatle.
22 Yaba motho ya bitswang Jairuse, e mong wa babusi ba sinagoge, a fihla ho Jesu; ha a mmona, a itihela maotong a hae;
23 a mo rapela haholo, a re: Ngwanana wa ka o se a le makgatheng a ho shwa; ako tle, o mmee matsoho hodimo, a tle a fole, mme o tla phela.
24 Yaba Jesu o ya le yena, mme bongata bo boholo ba mo latela, mme ba ne ba mo hatella.
25 Jwale mosadi ya nang le phallo ya madi, dilemo di se di le leshome le metso e mmedi,
26 ya neng a utlwile tse bohloko tse ngata ka dingaka tse ngata, a qetile ntho tsa hae kaofela, empa a sa ka a thuswa le hanyenyane, feela bohloko bo nnile ba befa,
27 yare ha a utlwa taba tsa Jesu, a kena hara letshwele kamorao, mme a ama kobo ya hae;
28 hobane o ne a re: Leha nka ama kobo ya hae feela, ke tla pholoha.
29 Yaba hang, madi a hae a kgaotsa ho phalla, mme a ikutlwa mmeleng wa hae hobane bohloko ba hae bo fodile.
30 Jesu a mpa a phakisa a lemoha ka ho yena matla a tswileng ho yena, mme a reteleha hara bongata, a re: Ke mang ya amileng kobo ya ka?
31 Barutuwa ba hae ba re ho yena: Ha o bona hobane bongata bo a o hatella, o botsa jwang, ha o re: Ke amilwe ke mang na?
32 Mme a qamaka kahohle a tle a bone ya entseng hoo.
33 Yaba mosadi o tshwarwa ke tshabo, a thothomela, ka ho tseba ho entsweng mmeleng wa hae; a tla, a kgumamela Jesu, mme a mmolella nnete yohle.
34 Jesu a re ho yena: Moradi wa ka, tumelo ya hao e o pholositse; eya ka kgotso, mme bohloko ba hao bo fele.
35 A re a sa bua, batho ba tswang ha mmusi wa sinagoge, ba fihla, ba re: Moradi wa hao o shwele; o sa kgathaletsang moruti?
36 Empa Jesu ha a ka a hlokomela se bolelwang, mme a re ho mmusi wa sinagoge: Se tshohe, dumela feela.
37 Mme ha a ka a dumella motho ho mo latela, haese Petrose, le Jakobo, le Johanne, ngwanabo Jakobo.
38 Ha a fihla tlung ya mmusi wa sinagoge, a fihlela moferefere, le ba llang, le ba bokollang haholo.
39 Yaba o kena, a re ho bona: Le etsetsang moferefere, mme le llelang? Ngwanana ha a shwa, o mpa a robetse.
40 Ba mo tsheha; empa Jesu a ba ntshetsa ntle kaofela, a nka ntata ngwanana le mmae le ba tlileng le yena, mme a kena moo ngwanana a robaditsweng teng.
41 A tshwara letsoho la ngwanana, a re ho yena: Talitha kumi! Ke ho re, ha ho fetolwa: Ngwanana, ke re ho wena: Tsoha.
42 Yaba ngwanana o phakisa a tsoha, a tsamaya, hobane dilemo tsa hae di ne di se di le leshome le metso e mmedi; mme ba hlollwa haholo.
43 Jesu a ba laya haholo, hore ho se ke ha tseba motho; a ntoo re, ba fe ngwanana dijo.