Mareka

³⁵Ha tla ho yena Jakobo le Johanne, bara ba Sebedea, ba re: Moruti, re rata ha o ka re etsetsa seo re tla se kopa. ³⁶A re ho bona: Le rata ha ke le etsetsang? ³⁷Ba re ho yena: Re nee hore re dule kganyeng ya hao, e mong letsohong la hao le letona, e mong ho le letshehadi. ³⁸Empa Jesu a re ho bona: Ha le tsebe seo le se kopang. Na le ka tseba ho nwela senwelong seo ke tla nwela ho sona, le ho kolobetswa ka kolobetso eo ke tla kolobetswa ka yona na? ³⁹Ba re ho yena: Re ka tseba. Yaba Jesu o re ho bona: Efela le tla nwela senwelong seo ke tla nwela ho sona, mme le tla kolobetswa ka kolobetso eo ke tla kolobetswa ka yona. ⁴⁰Empa haele ho dula letsohong la ka le letona, leha e le ho le letshehadi, ha ke na ho ho nea, ho mpa ho boloketswe ba ho lokiseditsweng. ⁴¹Ba leshome ha ba utlwa taba eo, ba qala ho hlonamela Jakobo le Johanne.