Mareka

³⁷Ba re ho yena: Re nee hore re dule kganyeng ya hao, e mong letsohong la hao le letona, e mong ho le letshehadi. ³⁸Empa Jesu a re ho bona: Ha le tsebe seo le se kopang. Na le ka tseba ho nwela senwelong seo ke tla nwela ho sona, le ho kolobetswa ka kolobetso eo ke tla kolobetswa ka yona na? ³⁹Ba re ho yena: Re ka tseba. Yaba Jesu o re ho bona: Efela le tla nwela senwelong seo ke tla nwela ho sona, mme le tla kolobetswa ka kolobetso eo ke tla kolobetswa ka yona. ⁴⁰Empa haele ho dula letsohong la ka le letona, leha e le ho le letshehadi, ha ke na ho ho nea, ho mpa ho boloketswe ba ho lokiseditsweng. ⁴¹Ba leshome ha ba utlwa taba eo, ba qala ho hlonamela Jakobo le Johanne. ⁴²Empa Jesu, yare ha a ba bileditse ho yena, a re ho bona: Le a tseba hobane ba nang le lebitso la marena a ditjhaba ba di busa, mme ba baholo ba bona ba na le puso e thata hodima tsona. ⁴³Ho se ke ha eba jwalo ho lona; empa ya ratang ho ba moholo hara lona, e tla ba mohlanka wa lona;