Mareka

⁶⁶Petrose a sa ntse a le katlase, lebaleng, ha fihla lekgabunyane le leng la moprista e moholo. ⁶⁷Ha le bona Petrose a ntse a ikomosa, la mo tadima, la re: Le wena o ne o na le Jesu wa Nasaretha. ⁶⁸A mpa a latola, a re: Ha ke tsebe, ha ke utlwe seo o se bolelang. Mme a tswela ntle, kgotlwaneng. Yaba mokoko o a lla. ⁶⁹Lekgabunyane ha le mmona, le boela la qala ho re ho ba emeng moo: Enwa ke wa bona! ⁷⁰Yena a mpa a boela a latola. Ho se hokaenyana, ba emeng moo ba re ho Petrose: O wa bona ruri, hobane le wena o Mogalelea, le puo ya hao eka ya teng. ⁷¹Jwale, a qala ho hlapanya le ho ana, a re: Motho eo le mmolelang ha ke mo tsebe. ⁷²Yaba mokoko o lla la bobedi. Jwale Petrose a elellwa seo Jesu a neng a mmoleletse sona, kamoo a neng a itse kateng: Mokoko ha o eso ho lle habedi, o tla be o se o ntatotse hararo. Mme a qala ho lla.