Mareka

²⁹Ba fetang ba ne ba mo nyefola, ba sisinya dihlooho tsa bona, ba re: Hela! wena ya qhaqhang tempele, ya e tsosang ka matsatsi a mararo, ³⁰o ipholose ka ho theoha sefapanong! ³¹Ka mokgwa o jwalo, le bona baprista ba baholo ba buisana le bangodi ka ditshomo hodima hae, ba re: O pholositse ba bang, yena o sitwa ho ipholosa! ³²Kreste, morena wa Iseraele, a ke a theohe jwale sefapanong, re tle re bone, mme re dumele. Le ba thakgisitsweng le yena ba ne ba mo hlapaola. ³³Ha ho tlile hora ya botshelela, lefifi la eba teng lefatsheng lohle, ho fihlela hora ya boroba mono o le mong. ³⁴Ka hora ya boroba mono o le mong, Jesu a howa ka lentswe le leholo, a re: Eloi, Eloi, lamma sabakthani? Ha ho fetolwa, ke ho re: Modimo wa ka, Modimo wa ka, o ntloheletseng na? ³⁵Ba bang ho ba leng moo, ha ba utlwa, ba re: Utlwang, o bitsa Elia.