Mareka

³¹O jwaloka hlaku ya mosetareta, eo, ere ha e jalwa mobung, e leng yona e nyenyane ho dipeo tsohle tse lefatsheng. ³²Empa, ha e se e jadilwe, e hole, mme e fete meroho yohle ka boholo, e etse makala a maholo, mme dinonyana tsa lehodimo di ahe moriting wa yona. ³³A nna a ba bolella lentswe la Modimo ka ditshwantsho tse ngata tse jwalo, kamoo ba neng ba ka lokela ho utlwa kateng. ³⁴O ne a se ke a ba bolella letho haese ka ditshwantsho; ere ha a le kathoko, a qaqisetse barutuwa ba hae ditaba tsohle. ³⁵Ka tsatsi lona leo, ha e le mantsiboya, a re ho bona: A re tsheleleng mose. ³⁶Ha ba kgutlisitse bongata, ba mo nka ka sekepana seo a neng a le ho sona; le dikepana tse ding di ne di le teng ho yena. ³⁷Jwale, ha tsoha sefefo se seholo sa moya; maqhubu a metsi a kena sekepaneng, mme se ne se se batla se tlala.