Mareka

¹Yaba ba fihla mose wane wa lewatle, naheng ya Bagerasene. ²A re a sa tswa sekepaneng, motho ya nang le moya o ditshila, ya tswang mabitleng, a phakisa a mo kgahlanyetsa. ³O ne a dula mabitleng, mme ho ne ho se motho ya tsebang ho mo tlama, leha e le ka mahlaahlela; ⁴hobane o ne a se a ile a tlangwa hangata ka ditshepe le ka mahlaahlela, a mpa a roba mahlaahlela, a tula ditshepe; ho ne ho se motho ya tsebang ho mo thapisa. ⁵Kamehla, motshehare le bosiu, o ne a le dithabeng le mabitleng, a ntse a howa a ikgoba ka majwe. ⁶Ha a bona Jesu, a sa le hole, a matha, mme a mo kgumamela. ⁷A ntoo howa ka lentswe le leholo, a re: Taba ya ka le wena keng, Jesu, Mora Modimo o moholoholo? Ke o antsha ka Modimo, hore o se ke wa ntlhokofatsa.