Eksoda

⁸Moradi wa Faro a re ho yena: Eya. Yaba morwetsana o a ya, a lata mma ngwana. ⁹Yaba moradi wa Faro o re ho yena: Nka ngwana enwa, o nkanyesetse yena, mme ke tla o fa moputso wa hao. Mosadi a nka ngwana, a ya mo anyesa. ¹⁰Eitse ha ngwana a hodile, a mo tlisa ho moradi wa Faro, mme ya eba mora wa hae, a mo rea lebitso la Moshe, a re: Ke hobane ke mo ntshitse metsing. ¹¹Mehleng ya ha Moshe a se a hodile, a tswa ho ya etela banababo, a tadima ho tubeha ha bona, mme a bona monna wa Moegepeta a otla monna wa bahabo, wa Moheberu. ¹²Yaba o thalatsa kwana le kwana, mme eitse ha a bona ho se motho, a bolaya Moegepeta, a mo pata lehlabatheng. ¹³Ka hosasane, a boela a tswa, a bona banna ba babedi ba Baheberu ba lwana; a re ho ya nang le molato: O otlelang wa heno? ¹⁴Eo a re: Ke mang ya o beileng morena le moahlodi wa rona? Na o rata ho mpolaya, jwalokaha o bolaile Moegepeta na? Yaba Moshe o a tshoha, a re: Ruri taba eo e a tsejwa.