1 Yaba Jehova o bua le Moshe, a re:
2 Bua le bana ba Iseraele hore ba nntshetse kabelo ya seo ba nang le sona; le amohele kabelo ya motho ka mong ya nntshetsang yona ka pelo e ntle.
3 Ke ena kabelo eo le tla e nka ho bona: Kgauta, silefera, le koporo;
4 purepera, sekarelata, krimsone, lene e ntle le boya ba podi;
5 le matlalo a dipheleu a tlotsitsweng ka bofubedu, matlalo a diqibi le difate tsa leoka;
6 ole ya lebone, le diarubetso tsa ole ya tlolo le tsa dibano;
7 mahakwe a onikse le mahakwe a tla kenngwa efodeng le mokgajwaneng.
8 Ba tla nketsetsa nqalo e halalelang, ke tle ke dule hara bona.
9 Le tla etsa tsohle ka tekanyetso ya tabernakele le ya mesebetsi yohle ya yona, kamoo ke le bontshang kateng.
10 Ba etse areka ya fate sa leoka: bolelele ba yona e be tswe tse pedi tse nang le halofo, bophara ba yona e be setswe se nang le halofo, mme bophahamo ba yona e be setswe se nang le halofo.
11 O tle o e manehe ka kgauta e hlwekileng. O e manehe kahare le kantle, mme o e etsetse mofapo wa kgauta o e potolohang.
12 O e tshollele mehwele e mene ya kgauta eo o tla e bea dintlheng tse nne tsa yona: mehwele e mmedi e be lehlakoreng le leng la yona, e meng mehwele e mmedi e be lehlakoreng le leng la yona.
13 O e etsetse mejaro ya sefate sa leoka, mme o e manehe ka kgauta.
14 O ntoo kenya mejaro mehweleng, mahlakoreng a areka, ho jara areka ka yona.
15 Mejaro e tla nne e dule mehweleng ya areka; e se ke ya tloswa.
16 O tla bea arekeng bopaki boo ke tla o nea bona.
17 O tla etsa sekwahelo ka kgauta e hlwekileng; bolelele ba sona e be ditswe tse pedi tse nang le halofo, mme bophara ba sona e be setswe se nang le halofo.
18 Hape, o etse dikerubime tse pedi tsa kgauta: o tle o di etse ka kgauta e teilweng, o di bee dintlheheng tse pedi tsa sekwahelo.
19 O etse kerubime e nngwe ntlheng e ka kwano, mme o bee kerubime e nngwe ntlheng e ka kwana. Le tle le etse dikerubime hammoho le sekwahelo, dintlheng tsa sona tse pedi.
20 Dikerubime di ke di otlollele dipheo tsa tsona hodimo, di kgurumetse sekwahelo ka dipheo tsa tsona, mme di tadimane ka difahleho; difahleho tsa dikerubime di tadime nqa sekwahelong.
21 O tla bea sekwahelo hodima areka, mme ka arekeng o bee bopaki boo ke tla o nea bona.
22 Ke hona moo ke tla teana le wena, ke bue le wena ke le hodima sekwahelo, pakeng tsa dikerubime tse hodima areka ya bopaki, hore ke tle ke o bolelle tsohle tseo ke tla o laela tsona bakeng sa bana ba Iseraele.
23 Hape, o tla etsa tafole ya sefate sa leoka; bolelele ba yona e be ditswe tse pedi, bophara ba yona e be ba tswe se le seng, bophahamo ba yona e be setswe se nang le halofo.
24 O tle o e manehe ka kgauta e hlwekileng, mme o e etsetse mofapo wa kgauta o e potolohang.
25 O tle o e etsetse moqhaka o bophara ba seatla o e kopang, mme o e etsetse mofapo wa kgauta o potang moqhaka wa yona.
26 O tla e etsetsa mehwele e mene ya kgauta, mme o bee mehwele dintlheng tse nne tse maotong a mane a yona.
27 Mehwele e ke e be haufi le moqhaka, ho kenya ho yona mejaro ya ho jara tafole.
28 O tla etsa mejaro ya sefate sa leoka, o e manehe ka kgauta, mme tafole e tla jarwa ka mejaro.
29 O tle o etse mafiso a yona, le mehope ya yona, le dinkgwana tsa yona, le merifi ya yona eo ho tla etswa ditshelo ka yona; o di etse ka kgauta e hlwekileng.
30 O tla bea mahobe a pontsha tafoleng a nne a be teng pela ka kamehla.
31 O etse kandelare ya kgauta e hlwekileng: kandelare e etswe ka kgauta e teilweng; leoto la yona, le kutu ya yona, le meritshwana ya yona, le dinoko tsa yona, le dipalesa tsa yona, e be ntho e le nngwe le yona.
32 Ho tla tswa makala a tsheletseng mahlakoreng a yona; makala a mararo a etswe lehlakoreng le leng la kandelare, a mang makala a mararo a tswe lehlakoreng le leng la kandelare.
33 Meritshwana e meraro e kang amanda, le senoko le palesa di be teng lekaleng le leng; lekaleng le leng, ho be meritshwana e meraro, e kang amanda, le senoko le palesa; makala a tsheletseng a tswang kandelareng a etswe jwalo.
34 Ho yona kandelare, meritshwana e mene e ke e be teng e kang amanda, hammoho le dinoko le dipalesa tsa yona;
35 senoko se be teng tlasa makala a mabedi a tswang kandelareng, senoko se seng se be teng tlasa makala a mang a mabedi a tswang kandelareng, mme senoko se seng se be teng tlasa makala a mang a mabedi a tswang kandelareng, ho lekana makala a tsheletseng a tswang kandelareng.
36 Dinoko le makala di tswe ho yona, mme e be ntho e le nngwe hammoho e entsweng ka kgauta e teilweng, e hlwekileng.
37 O tle o e etsetse dilampi tse supileng; mme dilampi tseo tse supileng di ke di bewe ka mokgwa wa hore di bonesetse ka nqa kapele.
38 Matlawana a yona le dipitsana tsa yona tsa molora di ke di etswe ka kgauta e hlwekileng.
39 E etswe hammoho le mesebetsi ya yona yohle ka talenta ya kgauta e hlwekileng.
40 O hlokomele ho etsa ntho tseo ka tekanyetso eo o e bontshitsweng thabeng.