1 Ke tsena ditaelo tseo o tla di bea pela bona:
2 Etlare hobane o reke lekgoba la Moheberu, le tla o sebeletsa ka lemo tse tsheletseng; ka sa bosupa, le tla tswa feela, le sa lefe letho.
3 Ha le ne le tlile ha hao le le nnotshi, le tla tloha le le nnotshi; ha le ne le tlile le ena le mosadi, le tla tloha le mosadi wa lona.
4 Ha monga lona a ne a le neile mosadi, mme mosadi eo e le tswaletse bara le baradi, mosadi le bana bao e tla ba ba monga lona, haele yena monna, o tla tloha a le mong.
5 Ekare ha lekgoba le tiisa, le re: Ke rata monga ka, ke rata le mosadi wa ka le bana ba ka, ha ke rate ho tloha ke ikela;
6 teng, monga lona o tla le atametsa pela Modimo, a le atametse pela lemati la monyako kapa kosene ya lona, mme monga lona o tla le phunya tsebe ka lemao, mme le tla nne le mo sebeletse ka ho sa feleng.
7 Ekare ha motho a rekisitse ka moradi wa hae ho mo etsa lekgoba, a ke ke a lokoloha ka mokgwa wa makgoba a matona.
8 Ha a le mobe mahlong a monga hae ya mo lebeleditseng, o tla re, a lopollwe; ha a na kamoo a ka rekang ka yena kateng ho ba tjhaba sesele, etswe a mo thetsitse.
9 Ha a mo nketse mora wa hae, o tla mo etsetsa kamoo motho a etsetsang baradi ba hae kateng.
10 Leha a ka nka mosadi e mong, ha a na ho mo fokoletsa dijo, kapa diaparo, kapa ditokelo tsa hae tsa lenyalo.
11 Ekare ha a sa mo fe ntho tsena tse tharo, o tla itswela a sa lefe letho, ho se topollo.
12 Ekare ha e mong a bata motho, mme eo a eshwa, a bolawe.
13 Ha a na a sa mo lalle, Modimo o mpa o mo dihile ka letsoho la eo, ke tla o kgethela moo a ka balehelang teng.
14 Ha e mong a tsohela e mong matla ka bolotsana hore a mmolaye ka mano, o tla mo tshwara, leha a se a balehetse aletareng ya ka, o mmolaye.
15 Ya ka otlang ntatae, kapa mmae, a bolawe.
16 Ekare ha e mong a utswa motho, a rekisa ka yena, kapa a fumanwa matsohong a hae, a bolawe le yena.
17 Ya rohakang ntatae, kapa mmae, a bolawe.
18 Ekare ha ba bang ba phea kgang, mme e mong a otla e mong ka lejwe, kapa ka setebele, ha a sa shwe, a mpa a robatswa diphateng,
19 ha a ka tsoha, a ba a itsamaela kantle ka lere la hae, ya mo otlileng o tla hloka molato, feela o tla lefela ho dula ha hae, mme a mo oke, a be a fole ruri.
20 Ekare ha e mong a otla lekgoba la hae la monna kapa la mosadi ka thupa, la eshwa ka letsoho la hae, le tla lefetswa;
21 ha le ka phela tsatsi le le leng, kapa a mabedi, le ke ke la lefetswa, hobane ke tjhelete tsa hae.
22 Banna ha ba lwana, mme ba thula mosadi wa moimana, mpa e senyeha, a mpa a sa tswe kotsi e isang lefung, ho tla lefshwa tefo e ka bewang ke monna wa mosadi eo, mme e tla lefshwa baahlodi ba le teng.
23 Empa ekare ha kotsi e hlahile, o tla lefa bophelo ka bophelo,
24 leihlo ka leihlo, leino ka leino, letsoho ka letsoho, leoto ka leoto,
25 tlabolo ka tlabolo, leqeba ka leqeba, letetetso ka letetetso.
26 Ekare ha monna a otla leihlo la lekgoba la hae la monna kapa la mosadi, a le senya, o tla le tlohela, le itsamaele ka baka la leihlo la lona.
27 Ekare ha a roba leino la lekgoba la hae la monna kapa la mosadi, o tla le tlohela, le itsamaele ka baka la leino la lona.
28 Ekare ha kgomo e hlaba monna, kapa mosadi, mme eo a eshwa, kgomo e tla tlepetswa ka majwe, mme nama ya yona e ke ke ya jewa; haele monga kgomo, yena ha a na molato.
29 Empa kgomo eo, ha e ne e na le mokgwa wa ho hlaba, mme monga yona a eletswa, a mpa a se ke a e lebela, ekare ha e bolaya monna, kapa mosadi, kgomo e tla tlepetswa ka majwe, le yena monga yona a bolawe.
30 Ha a lefiswa, a lefelle bophelo ba hae kahohle kamoo a ka lefiswang kateng.
31 Leha e hlabile mora, kapa moradi wa motho, e ke e etswe ka taelo eo.
32 Ha kgomo e hlabile lekgoba la monna kapa la mosadi, monga lona o tla lefelwa ka dishekele tse mashome a mararo tsa silefera, kgomo yona e tlepetswe.
33 Ekare ha motho a tjhekile lemana, kapa ha motho a tjhekile mokoti, a sa ka a o kwahela, mme ho ka wela ho wona kgomo, kapa esele, monga lemena o tla lefa;
34 o tla busetsa ho monga phoofolo tjhelete tsa yona, lebole lona e be la hae.
35 Ekare ha kgomo ya motho e mong e hlaba kgomo ya e mong, e eshwa, ba tla reka ka kgomo e phelang, ba arolelane tjhelete tsa yona; ba arolelane lebole.
36 Empa ha kgomo e ne e tsejwa hoba e ne e ntse e na le mokgwa wa ho hlaba, mme monga yona a sa ka a e lebela, o tla lefa ka tefo e shwetseng, kgomo ka kgomo, lebole lona e be la hae.