1 Yaba Moshe o bokella phutheho yohle ya bana ba Iseraele, a re ho bona: Ke tsena ditaba tseo Jehova a laetseng ho di etsa.
2 Ho tla sebetswa ka matsatsi a tsheletseng, mme letsatsi la bosupa ho lona e tla ba Sabatha ya phomolo e kgethetsweng Jehova; mang le mang ya ka etsang mosebetsi tsatsing leo, o tla bolawa.
3 Le se ke la besa mollo matlung wohle a lona ka tsatsi la Sabatha.
4 Moshe a bolella phutheho yohle ya bana ba Iseraele, a re: Se laetsweng ke Jehova ke sena:
5 Ntshang ho tsa lona seo le se abelang Jehova. Motho ka mong eo pelo ya hae e ratang, a ke a tlise se abetsweng Jehova, kgauta, silefera, le koporo;
6 purepera, sekarelata, krimsone, lene e ntle le boya ba podi; matlalo a dipheleu a tlotsitsweng ka bofubedu, le matlalo a diqibi, le difate ta leoka;
8 ole ya ho bonesa, le dibano tsa ole ya setlolo, le dibano tse monko o monate;
9 mahakwe a onikse, le mahakwe a kenngwang dikoomaneng a efoda le a mokgajwana.
10 Banna bohle ba masene ba hara lona ba tle ba tle, ba sebetse tsohle tseo Jehova a di laetseng;
11 e le tabernakele le tente ya yona, le sekgurumetso sa yona, le mahokelo a yona, le dipolanka tsa yona, le maballo a yona, le ditshiya tsa yona, le didulwana tsa yona;
12 le areka le mejaro ya yona, le sekwahelo, le lesela le homilweng;
13 le tafole le mejaro ya yona, le mesebetsi yohle ya yona, le mahobe a pontsha;
14 le kandelare ya ho bonesa le mesebetsi ya yona, le dilampi tsa yona le ole ya ho bonesa;
15 le aletare ya dibano le mejaro ya yona, le ole ya setlolo le dibano tse nkgang hamonate, le lesela le homilweng la monyako le etsetswang monyako wa tabernakele;
16 le aletare ya ditjheso, le rostere ya koporo, le mejaro ya yona le mesebetsi ya yona, le morifi le sedulwana sa wona;
17 le masela a lebala, le ditshiya tsa lona le didulwana tsa tsona, le lesela le homilweng la monyako wa lebala;
18 le dithakgisa tsa tabernakele, le dithakgisa tsa lebala le mehala ya tsona;
19 le diaparo tsa ho etsa tshebeletso sehalalelong, e leng diaparo tse kgethehileng tsa Aarone moprista, le diaparo tsa bara ba hae, tsa ho etsa mosebetsi wa boprista.
20 Yaba phutheho yohle ya bana ba Iseraele e tloha ho Moshe.
21 Motho ka mong ya eleditsweng ke pelo ya hae le bohle ba pelo di ithatetseng, ba fihla ba tlisetsa Jehova dikabelo ho sebetsa tente ya pokano, le tsohle tsa tshebeletso ya yona, le diaparo tse kgethehileng.
22 Banna ba tla ba ena le basadi; bohle ba pelo tse ithatetseng ba tlisa dihaka, le masale, le ditona, le mefitshana, le mesebetsi e meng ya kgauta ya mefutafuta; motho ka mong a hlahisa mpho ya kgauta eo a e hlahisetsang Jehova.
23 E mong le e mong ya neng a ena le purepera, le sekarelata, le krimsone, le lene e ntle, le boya ba podi, le matlalo a dipheleu a tlotsitsweng ka bofubedu, le matlalo a diqibi, ba di tlisa.
24 Mang le mang ya ntshitseng karolo ya silefera le ya koporo e aroletsweng Jehova, a tlisa karolo e abetsweng Jehova: le bohle ba neng ba ena le difate tsa leoka tsa ho sebetsa mesebetsi ya tshebetso, ba di tlisa.
25 Basadi bohle ba masene ba loha ka matsoho a bona, mme ba tlisa seo ba se lohileng, e le purepera, sekarelata, le krimsone, le lene e ntle.
26 Basadi bohle ba eleditsweng ke pelo tsa bona, ba masene, ba loha boya ba podi.
27 Haele marenana, a tlisa mahakwe a onikse, le mahakwe a kenngwang dikoomaneng a efoda le a mokgajwana;
28 le dibano, le ole ya ho bonesa, le ole ya setlolo, le ya dibano tse monko o monate.
29 Bana ba Iseraele bohle le basadi bohle ba ithatetseng ho tlisa ntho tsa mosebetsi wohle oo Jehova a neng a laetse ka Moshe hore o etswe, ba tlisetsa Jehova dikabelo tsa boithatelo.
30 Yaba Moshe o re ho bana ba Iseraele: Bonang, Jehova o bitsitse ka lebitso la hae Betsaleele, mora Uri, mora Hure, wa leloko la Juda;
31 o mo tlatsitse ka moya wa Modimo, ka bohlale le ka kutlwisiso, le ka tsebo ya ho etsa mesebetsi yohle,
32 leha e le ho qapa e meng, le ho e etsa ka kgauta, le silefera, le koporo;
33 le ho betla mahakwe a kenngwang dikoomaneng, le ho betla difate, le ho etsa mesebetsi yohle e ka qapuwang.
34 O mo lemositse ho ruta ba bang; ho jwalo le bakeng sa Oholiabe, mora Akisamake, wa leloko la Dane.
35 O ba tlatsitse ka bohlale, hore ba tle ba sebetse mesebetsi yohle e sebetswang ke dibetli, le diqapi, le dihomi tsa purepera le sekarelata le krimsone le lene e ntle, le dilohi, hore ho etswe mesebetsi yohle e ka sebetswang le e ka qapuwang.