1 Jehova a bolella Moshe, a re: Bona, ke bitsitse Betsaleele, mora Uri, mora Hure, wa leloko la Juda, ka lebitso la hae,
3 ke mo tlatsitse ka moya wa Modimo, ka bohlale, ka kutlwisiso, ka tsebo, hore a tle a tsebe ho etsa mesebetsi ya mefutafuta,
4 leha e le ho qapa e meng, ho sebetsa kgauta, le silefera, le koporo,
5 le ho betla mahakwe a kenngwang dikoomaneng le ho betla difate, le ho etsa mesebetsi ya mefutafuta.
6 Bona, ke beile le Oholiabe, mora Akisamake, wa leloko la Dane; hape ke kentse bohlale pelong tsa batho bohle ba masene, hore ba sebetse tsohle tsee ke o laetseng tsona;
7 ke ho re tente ya pokano, le areka ya bopaki, le sekwahelo se bewang hodima yona, le mesebetsi yohle ya tabernakele;
8 le tafole le mesebetsi ya yona, le kandelare e hlwekileng le mesebetsi yohle ya yona, le aletare ya dibano;
9 le aletare ya ditjheso le mesebetsi yohle ya yona, le morifi le sedulwana sa wona;
10 le diaparo tsa tshebeletso, le diaparo tse kgethehileng tsa Aarone moprista, le diaparo tsa bara ba hae tsa ho etsa mosebetsi wa boprista;
11 le ole ya setlolo, le dibano tse monko o monate tsa sehalalelo. Ba tla sebetsa tsohle tseo ke o laetseng tsona.
12 Hape, Jehova a bolella Moshe a re:
13 Ako bue le bana ba Iseraele, o re: Le fele le boloke Disabatha tsa ka, hobane ke pontsho mahareng a ka le lona, melokong ya lona, e le hore le tsebe hoba ke nna Jehova ya le kgethileng.
14 Le boloke tsatsi la Sabatha, hobane, ho lona e tla ba le kgethehileng; ya le hlomphollang a bolawe; hobane ekare ha e mong a ka etsa mosebetsi tsatsing leo, motho eo a ke a kgaolwe tjhabeng sa habo.
15 Ka matsatsi a tsheletseng ho tla sebetswa, mme la bosupa e tla ba la Sabatha, la phomolo e kgethetsweng Jehova; mang le mang ya ka etsang mosebetsi ka tsatsi la Sabatha, a bolawe.
16 Bana ba Iseraele ba tla boloka la Sabatha, hore ba boloke Sabatha melokong ya bona, e be selekane sa kamehla.
17 Ke pontsho ya kamehla mahareng a ka le bana ba Iseraele; hobane ka matsatsi a tsheletseng, Jehova o entse mahodimo le lefatshe, mme ka la bosupa o phomotse, a kgatholoha.
18 Eitse hobane Modimo o qetelle ho bua le Moshe, thabeng ya Sinai, wa mo nea matlapa a mabedi a bopaki, matlapa a majwe a ngodilweng ka monwana wa Modimo.