1 Yaba Betsaleele o etsa areka ya sefate sa leoka; bolelele ba yona ya eba ditswe tse pedi tse nang le halofo, bophara ba yona ya eba setswe se nang le halofo, bophahamo ba yona ya eba setswe se nang le halofo.
2 Ya manehwa ka kgauta e hlwekileng, kahare le kantle, mme ya etsetswa mofapo wa kgauta o e potolohang.
3 Ya tshollelwa mahwele e mene ya kgauta e bewang dintlheng tse nne tsa yona; mehwele e mmedi ya bewa lehlakoreng le leng la yona, e meng mehwele e mmedi lehlakoreng le leng la yona.
4 Ha etswa mejaro ya sefate sa leoka, ya manehwa ka kgauta;
5 mejaro ya kenngwa mehweleng, mahlakoreng a areka, ho jara areka.
6 Ha etswa le sekwahelo sa kgauta e hlwekileng; bolelele ba sona ya eba tswe tse pedi tse nang le halofo, bophara ba sona ya eba setswe se nang le halofo.
7 Ha etswa dikerubime tse pedi tsa kgauta; tsa etswa ka kgauta e teilweng dintlheng tse pedi tsa sekwahelo;
8 kerubime e nngwe ya bewa ntlheng e ka kwano; kerubime e nngwe ya bewa ntlheng e ka kwana; ha etswa dikerubime hammoho le sekwahelo, dintlheng tse pedi tsa sona.
9 Dikerubime di ne di otlollela dipheo tsa tsona hodimo, di kgurumeditse sekwahelo ka dipheo tsa tsona, difahleho di tadimane; mme difahleho tsa dikerubime di ne di tadimile nqa sekwahelong.
10 Ha etswa le tafole ya sefate sa leoka, bolelele ba yona e le ditswe tse pedi, bophara ba yona e le setswe se le seng, bophahamo ba yona e le setswe se nang le halofo.
11 Ya menehwa ka kgauta e hlwekileng, mme ya etsetswa mofapo wa kgauta o e potolohang.
12 Hape, ya etsetswa moqhaka o bophara ba seatla o e potolohang; ya etsetswa mofapo wa kgauta o potang moqhaka wa yona.
13 Ya tshollelwa mehwele e mene ya kgauta; mehwele ya bewa dintlheng tse nne tse maotong a mane a yona.
14 Mehwele e ne e le haufi le moqhaka, ho kenya mejaro ya ho jara tafole.
15 Ha etswa mejaro ya sefate sa leoka, ya manehwa ka kgauta, ho jara tafole.
16 Ha etswa le mesebetsi e bewang tafoleng, e leng mafiso a yona, le mehope ya yona, le dinkgwana tsa yona, le merifi ya yona ya ho etsa ditshelo; tsa etswa ka kgauta e hlwekileng.
17 Ha etswa le kandelare ya kgauta e hlwekileng: Kandelare ya etswa ka kgauta e teilweng; leoto la yona, le kutu ya yona, le meritshwana ya yona, le dinoko tsa yona, le dipalesa tsa yona, e ne e le ntho e le nngwe le yona.
18 Ho ne ho etswa makala a tsheletseng mahlakoreng a yona; makala a mararo a kandelare a ne a etswa lehlakoreng le leng la yona, a mang makala a mararo a ne a etswa lehlakoreng le leng la yona.
19 Ha etswa meritshwana e meraro e kang amanda, le sonoko le palesa lekaleng le leng; ha etswa hape meritshwana e meraro e kang amanda le senoko le palesa lekaleng le leng; ha etswa jwalo makaleng a tsheletseng a tswang kandelareng.
20 Ho yona kandelare, ho ne ho ena le meritshwana e mene e kang amanda, le dinoko tsa yona le dipalesa tsa yona;
21 senoko se le teng tlasa makala a mabedi a tswang kandelareng, senoko se seng se le teng tlasa makala a mabedi a tswang kandelareng; ho le jwalo makaleng a tsheletseng a tswang kandelareng.
22 Dinoko le makala e ne e le ntho e le nngwe le yona, mme yona e le ntho e le nngwe hammoho e entsweng ka kgauta e hlwekileng, e teilweng.
23 Ha etswa dilampi tsa yona tse supileng, le matlawana a yona, le dipitsana tsa yona tsa melora tsa kgauta e hlwekileng.
24 Hammoho le mesebetsi yohle ya yona, ya etswa ka talenta ya kgauta e hlwekileng.
25 Ha etswa le aletare ya dibano ka sefate sa leoka; bolelele ba yona e le setswe se le seng, bophara ba yona e le setswe se le seng; e ne e le mahlakore a mane a lekanang; bophahamo ba yona ya eba ditswe tse pedi; manaka a yona a tswile ho yona.
26 Ya manehwa ka kgauta e hlwekileng, kahodimo le kahohle mahlakoreng le manakeng; ya etsetswa mofapo wa kgauta o e potolohang.
27 Ya etsetswa le mehwele e mmedi ya kgauta tlasa mofapo, mahlakoreng a yona a mabedi, le mahlakoreng a mang a mabedi, ya ho kenya mejaro, hore e tle e jarwe ka yona.
28 Ha etswa mejaro ya sefate sa leoka, mme ya manehwa ka kgauta.
29 Hape, ha etswa ole ya setlolo e kgethehileng, le dibano tse hlwekileng tse monko o monate, ka mokgwa wa motswaki wa tse nkgang hamonate.