Eksoda

¹⁰Leha a ka nka mosadi e mong, ha a na ho mo fokoletsa dijo, kapa diaparo, kapa ditokelo tsa hae tsa lenyalo. ¹¹Ekare ha a sa mo fe ntho tsena tse tharo, o tla itswela a sa lefe letho, ho se topollo. ¹²Ekare ha e mong a bata motho, mme eo a eshwa, a bolawe. ¹³Ha a na a sa mo lalle, Modimo o mpa o mo dihile ka letsoho la eo, ke tla o kgethela moo a ka balehelang teng. ¹⁴Ha e mong a tsohela e mong matla ka bolotsana hore a mmolaye ka mano, o tla mo tshwara, leha a se a balehetse aletareng ya ka, o mmolaye. ¹⁵Ya ka otlang ntatae, kapa mmae, a bolawe. ¹⁶Ekare ha e mong a utswa motho, a rekisa ka yena, kapa a fumanwa matsohong a hae, a bolawe le yena.