Eksoda

⁶ole ya lebone, le diarubetso tsa ole ya tlolo le tsa dibano; ⁷mahakwe a onikse le mahakwe a tla kenngwa efodeng le mokgajwaneng. ⁸Ba tla nketsetsa nqalo e halalelang, ke tle ke dule hara bona. ⁹Le tla etsa tsohle ka tekanyetso ya tabernakele le ya mesebetsi yohle ya yona, kamoo ke le bontshang kateng. ¹⁰Ba etse areka ya fate sa leoka: bolelele ba yona e be tswe tse pedi tse nang le halofo, bophara ba yona e be setswe se nang le halofo, mme bophahamo ba yona e be setswe se nang le halofo. ¹¹O tle o e manehe ka kgauta e hlwekileng. O e manehe kahare le kantle, mme o e etsetse mofapo wa kgauta o e potolohang. ¹²O e tshollele mehwele e mene ya kgauta eo o tla e bea dintlheng tse nne tsa yona: mehwele e mmedi e be lehlakoreng le leng la yona, e meng mehwele e mmedi e be lehlakoreng le leng la yona.