Eksoda

²²Haele motseo wa tabernakele, nqa bophirimela, o o etsetse dipolanka tse tsheletseng. ²³O tla etsetsa dikgutlo tsa tabernakele, motseo, dipolanka tse pedi. ²⁴Di tla kopanngwa katlase, hape di kopanngwe le kahodimo ka mofapo; di etswe jwalo tse pedi; mme di fele di be dikgutlong tse pedi. ²⁵Ha ho le jwalo, teng ho tla ba le dipolanka tse robileng meno e le mmedi tse nang le didulwana tsa tsona tsa silefera; didulwana tsona di tla bo leshome le metso e tsheletseng, di be ka bobedi katlasa polanka e nngwe, le ka bobedi katlasa polanka e nngwe. ²⁶O ntoo etsa maballo a sefate sa leoka; a be mahlano dipolankeng tse lehlakoreng le leng la tabernakele; ²⁷maballo a mang a mahlano a be dipolankeng tsa lehlakore la bobedi la tabernakele; hape, maballo a be mahlano dipolankeng lehlakoreng la tabernakele le ka nqa bophirimela, motseo. ²⁸Leballo le hare le be hara dipolanka, ho di kopanya hammoho.