Eksoda

⁸Bolelele ba lesela e be ditswe tse mashome a mararo, bophara ba lona e be tswe tse nne; masela a leshome le motso o mong a etswe ka tekanyo e le nngwe. ⁹O ke o rokelle masela a mahlano ka nqe nngwe, le masela a tsheletseng ka hosele, mme o menahanye lesela la botshelela kapele ho tente. ¹⁰O tla bea mahokelo a mashome a mahlano mophethong wa lesela le ntlheng ya masela a rokeletsweng hammoho, le mahokelo a mashome a mahlano mophethong wa lesela le ntlheng ya a mang a rokeletsweng hammoho. ¹¹O tla etsa dikgoketsane tse mashome a mahlano tsa koporo, mme o kenye dikgoketsane tseo mahokelong; o kopanye tente hammoho, e tle e be ntho e le nngwe feela. ¹²Haele mmeno o setseng maseleng a tente, sekoto sa mmeno o setseng se tla lepella maraong a tabernakele. ¹³Setswe se ka kwano le setswe se ka kwana, tse setseng boleleleng ba masela a tente, di tla lepella mahlakoreng a tabernakele, ka kwano le ka kwana, ho e kwahela. ¹⁴O ntoo etsetsa tente sekgurumetso sa matlalo a dipheleu a tlotsitsweng ka bofubedu, le sekgurumetso sa matlalo e diqibi ho apesa sa matlalo a dipheleu.