Eksoda

¹⁹Ha etswa meritshwana e meraro e kang amanda, le sonoko le palesa lekaleng le leng; ha etswa hape meritshwana e meraro e kang amanda le senoko le palesa lekaleng le leng; ha etswa jwalo makaleng a tsheletseng a tswang kandelareng. ²⁰Ho yona kandelare, ho ne ho ena le meritshwana e mene e kang amanda, le dinoko tsa yona le dipalesa tsa yona; ²¹senoko se le teng tlasa makala a mabedi a tswang kandelareng, senoko se seng se le teng tlasa makala a mabedi a tswang kandelareng; ho le jwalo makaleng a tsheletseng a tswang kandelareng. ²²Dinoko le makala e ne e le ntho e le nngwe le yona, mme yona e le ntho e le nngwe hammoho e entsweng ka kgauta e hlwekileng, e teilweng. ²³Ha etswa dilampi tsa yona tse supileng, le matlawana a yona, le dipitsana tsa yona tsa melora tsa kgauta e hlwekileng. ²⁴Hammoho le mesebetsi yohle ya yona, ya etswa ka talenta ya kgauta e hlwekileng. ²⁵Ha etswa le aletare ya dibano ka sefate sa leoka; bolelele ba yona e le setswe se le seng, bophara ba yona e le setswe se le seng; e ne e le mahlakore a mane a lekanang; bophahamo ba yona ya eba ditswe tse pedi; manaka a yona a tswile ho yona.