Eksoda

¹⁰Yaba Moshe o re ho Jehova: Oho Morena, ha ke monna ya buang habonolo, leha e le maobane, leha e le maoba, esita le jwale, haesale o bua le mohlanka wa hao; ke motho ya molomo o boima, le ya leleme le boima. ¹¹Yaba Jehova o re ho yena: Ke mang ya etseditseng motho molomo, kapa ke mang ya etsang motho semumu, kapa ya tsebetutu, kapa ya bonang, kapa ya sefofu? Na hase nna Jehova na? ¹²Tsamaya he jwale, mme etlaba nna ke bang le molomo wa hao; mme ke tla o ruta seo o tla se bolela. ¹³A re: Oho Morena, ke a o rapela, roma eo o mo romang. ¹⁴Yaba kgalefo ya Jehova e tukela Moshe, a re: Aarone Molevi, ngwaneno, na ha a yo na? Ke tseba hobane yena o bua hantle, mme ebile ke enwa ya tlang ho o kgahlanyetsa; etlare ha a o bona, o tla thaba pelong ya hae. ¹⁵O tle o bue le yena, o kenye ditaba molomong wa hae, mme nna ke tla ba le molomo wa hao, ke be le molomo wa hae, mme ke tla le ruta seo le tla se etsa. ¹⁶E tla ba yena mmueli wa hao ho setjhaba, e be yena molomo wa hao, mme wena o be bakeng sa Modimo ho yena.