28 ‘Ona tali mai lea o le tupu o Tavita, ‘ua fa‘apea mai, “‘Inā vala‘au atu ia ‘iā Patesepa e sau ‘iā te a‘u.” ‘Ona sau lea o ia i luma o le tupu, ‘ua tu fo‘i i luma o le tupu.
29 ‘Ona tautō lea o le tupu, ‘ua fa‘apea mai, “O lo‘o soifua le ALI‘I, o lē na fa‘aolaina a‘u i puapuagā uma lava.
30 E fa‘apei ‘ona ‘ou tautō ‘iā te oe i le ALI‘I le Atua o Isaraelu, ‘ua fa‘apea atu ‘E moni, e fai la‘u tama o Solomona ma tupu pe a mavae atu a‘u,’ e ti‘eti‘e fo‘i o ia i lo‘u nofoāli‘i e sui a‘i a‘u, e fa‘apea lava ‘ona ‘ou faia i le aso nei.”
31 ‘Ona punou lea o Patesepa i le ‘ele‘ele, ‘ua ifo o ia i le tupu, ‘ua fa‘apea atu, “‘Ia soifua e fa‘avavau lo‘u ali‘i le tupu o Tavita.”
32 ‘Ona fai mai lea o le tupu o Tavita, “‘Inā vala‘au atu ia ‘iā Satoka le ositaulaga ma Natano le perofeta, ma Penaia le atali‘i o Ieoiata.” ‘Ona latou ō mai lea i luma o le tupu.
33 ‘Ona fai atu lea o le tupu ‘iā te i latou, “‘Inā ō ia ‘outou ‘atoa ma ‘au‘auna a lo ‘outou ali‘i, ma fa‘ati‘eti‘e ‘iā Solomona lo‘u atali‘i i la‘u lava falata, ma ta‘ita‘i ifo ‘iā te ia i Kiona;
34 ma ‘ia fa‘au‘uina o ia i lea mea e Satoka le ositaulaga ma Natano le perofeta, e fai ma tupu ‘iā Isaraelu; ‘ia ‘outou ili fo‘i le pū ma fai atu, ‘‘Ia soifua le tupu o Solomona.’