1 ‘Ua fai atu Elia le Tisepi, o so le nu‘u e nonofo i Kiliata, ‘iā Aapo, “O lo‘o soifua le ALI‘I le Atua o Isaraelu, o ia ‘ou te tu ai i ona luma, e leai se sau po o se timu i nisi tausaga se‘i ‘iloga ‘ou te fai atu.”
2 ‘Ua o‘o mai fo‘i le afioga a le ALI‘I ‘iā te ia, ‘ua fa‘apea mai,
3 “Tu‘u ia lenei mea ma e liliu ane i le itū i sasa‘e ma e lafi i le alia o Kirita, e feagai ma Ioritana.
4 ‘E te inu fo‘i i le alia; ‘ua ‘ou fai atu fo‘i i oreva latou te fafaga ‘iā te oe i lea mea.”
5 ‘Ona alu ai lea o ia ma na faia e tusa ma le afioga a le ALI‘I; ‘ua alu o ia ma nofo i le alia o Kirita, e feagai ma Ioritana.
6 Na ‘aumai fo‘i e oreva ‘iā te ia o areto ma ‘a‘ano o manu i le taeao; o areto fo‘i ma ‘a‘ano o manu i le afiafi; ‘ua ia inu fo‘i i le alia.
7 ‘Ua mavae nisi aso, ‘ona mate ai lea o le alia, auā sa leai se timu i le nu‘u.
8 ‘Ona o‘o mai ai lea o le afioga a le ALI‘I ‘iā te ia, ‘ua fa‘apea mai,
9 “Tula‘i ia oe ma e alu i Sarefata, o le ‘a‘ai o Saitonu ma e nofo ai; fa‘auta, ‘ua ‘ou fai atu i le fafine o i ai ‘ua oti lana tane, na te fafaga ‘iā te oe.”
10 ‘Ona tula‘i lea o ia ma alu i Sarefata; ‘ua o‘o ia i le faitoto‘a o le ‘a‘ai, fa‘auta, ‘ua i ai le fafine ‘ua oti lana tane, o lo‘o fai fafie; ‘ona vala‘au lea o ia ‘iā te ia, ‘ua fa‘apea atu, “Se‘i ē ‘aumai sina vai itiiti i se ipu, so‘u inu ai.”
11 ‘Ua alu o ia e ‘aumai ai, ‘ona toe vala‘au ai lea o ia ‘iā te ia, ‘ua fa‘apea atu, “Se‘i ē ‘aumai i lou lima se fāsi areto ma a‘u.”
12 ‘Ona tali mai lea o ia, “O lo‘o soifua le ALI‘I lou Atua, e leai se pōtoi areto ‘iā te a‘u; ‘ua na o le lu‘utaga o falaoa i le kate ma sina suāu‘u itiiti i le fagu; fa‘auta, ‘ua ‘ou fai nei ni fafie se lua, ‘ina ‘ia ‘ou alu, ma ‘ou tunu ai mā mā‘ua ma si a‘u tama tane, ma te ‘a‘ai ai, ‘ona mā oti lea.”
13 ‘Ona fai atu lea o Elia ‘iā te ia, “‘Aua ‘e te fefe; alu ia, ‘inā e faia le mea na e fai mai ai; ‘ae muamua ‘ona e fai se pōtoi areto itiiti ma a‘u ma ‘aumai ai ‘iā te a‘u; e mulimuli ane ‘ona e faia lea mā ‘oulua ma lau tama tane.
14 Auā ‘ua fa‘apea ‘ona fetalai mai o le ALI‘I le Atua o Isaraelu: E le uma le kate falaoa, e le fa‘aitiitia le suāu‘u i le fagu, se‘ia o‘o i le aso e foa‘iina mai ai e le ALI‘I le timu i le lau‘ele‘ele.”
15 ‘Ona alu lea o ia, ‘ua ia faia e tusa ma le ‘upu a Elia; ‘ua latou ‘a‘ai ai, o ia ma Elia ma lona ‘āiga, ‘ua tele aso.
16 Sa le uma le falaoa i le kate, sa le fa‘aitiitia fo‘i le suāu‘u i le fagu, e tusa ma le afioga a le ALI‘I na fai atu ai ‘iā Elia.
17 ‘Ua mavae ia mea, ‘ona ma‘i ai lea o le tama tane a le fafine, o le matai o le ‘āiga; sa tele lava lona ma‘i, ‘ua i‘u ai ‘ina le toe se mānava ‘iā te ia.
18 ‘Ona fai atu lea o ia ‘iā Elia, “Le tagata o le Atua e, se a ‘ea lau na ‘iā te a‘u? ‘Ua e maliu mai ‘ea e fa‘amanatu mai i a‘u agasala ma fa‘ao‘o le oti i la‘u tama?”
19 ‘Ona fai atu lea o ia ‘iā te, “‘Inā ‘aumaia lau tama ‘iā te a‘u;” ‘ona ‘aumai lea o ia ‘iā te ia mai lona fatafata, ‘ua ia ‘ava‘e ‘iā te ia i le afeafe sa nofo ai o ia, na ia fa‘ata‘oto fo‘i ‘iā te ia i lona moega.
20 ‘Ona ‘alaga lea o ia i le ALI‘I, ‘ua fa‘apea atu, “Le ALI‘I e, lo‘u Atua, ‘ua e fa‘ao‘o ‘ea le leaga i le fafine ‘ua oti lana tane, o lē ‘ou te āumau ai, ‘ina ‘ua fa‘ao‘o le oti i lana tama?”
21 ‘Ona faō fa‘atolu lea o ia i luga o le tama ma ‘alaga atu i le ALI‘I, ‘ua fa‘apea atu, “Le ALI‘I e, lo‘u Atua, ‘ia e fa‘afoisia mai le agaga o lenei tama i totonu ‘iā te ia.”
22 ‘Ona fa‘afofoga mai lea o le ALI‘I i le leo o Elia; ‘ua toe fo‘i mai ai le agaga o le tama i totonu ‘iā te ia, ‘ona ola ai lea o ia.
23 ‘Ona si‘i lea e Elia o le tama ma ‘ave ifo ‘iā te ia i le fale a‘i le afeafe ma tu‘u atu ‘iā te ia i lona tinā; ‘ua fai atu fo‘i Elia ‘iā te ia, “Fa‘auta mai, ‘ua ola lau tama.”
24 ‘Ona fai mai lea o le fafine ‘iā Elia, “O lenei, ‘ua ‘ou iloa i lenei mea o le tagata o le Atua oe; o le afioga fo‘i a le ALI‘I ‘ua o‘o mai i lou fofoga e moni lea.”#