1 ‘Ua mavae ia mea. Sa ‘iā Napota le Isereelu le tōvine i Isereelu, e latalata ane i le maota o Aapo le tupu o Samaria.
2 ‘Ua fai atu Aapo ‘iā Napota, ‘ua fa‘apea atu, “‘Inā ‘aumai ia o lou tōvine mo‘u e fai mo‘u fanua e totō ai la‘au ‘aina, auā e latalata i lo‘u fale, ‘ae ‘ou te avatu ‘iā te oe le tōvine e sili ‘ona lelei i lenā e sui a‘i; ‘ae ‘āfai e lelei ‘iā te oe, ‘ou te avatu ‘iā te oe lona tau i tupe.”
3 ‘Ona tali mai lea o Napota ‘iā Aapo, “‘Ia fa‘amamao e le ALI‘I ‘iā te a‘u ‘ona ‘ou avatu ‘iā te oe le tofi o o‘u tamā.”
4 ‘Ona alu lea o Aapo i lona fale, ‘ua tigā ma ita, auā o le ‘upu ‘ua fai mai ai Napota le Isereelu ‘iā te ia, ‘ua fa‘apea mai, “‘Ou te lē avatu ‘iā te oe le tofi o o‘u tamā.” ‘Ona ta‘oto lea o ia i lona moega ma fa‘asaga ‘ese ona mata, e le‘i ‘ai fo‘i o ia.
5 ‘Ona sau lea ‘iā te ia o Iesepela lana avā ma na fai mai ‘iā te ia, “Pe se a le mea ‘ua tigā ai lou finagalo ma e lē taumafa ai se mea?”
6 ‘Ona fai atu lea o ia ‘iā te ia, “Auā na ‘ou fai atu ‘iā Napota le Isereelu, ‘ua ‘ou fa‘apea atu i ai, ‘‘Inā ‘aumai ia mo‘u lou tōvine i tupe;’ ‘ae ‘āfai e lelei ‘iā te oe ‘ou te avatu mo oe se isi tōvine e sui a‘i. ‘Ona fai mai lea o ia, ‘‘Ou te lē avatu ‘iā te oe lo‘u tōvine.’”
7 ‘Ona fai mai lea o Iesepela lana avā ‘iā te ia, “Po ‘ua e faia ‘ea e oe le mālō o Isaraelu? ‘Inā tula‘i ia, ‘inā taumafa se mea, ‘ia fiafia fo‘i lou finagalo; ‘ou te avatu ‘iā te oe le tōvine o Napota le Isereelu.”
8 ‘Ona tusi lea e ia ni tusi i le igoa o Aapo ma fa‘amau ai i lona fa‘amaufa‘ailoga ma ia ‘aveina atu o ia tusi i toeaina ma ali‘i o lana ‘a‘ai o ē nonofo fa‘atasi ma Napota.
9 ‘Ua ia tusia fo‘i i ia tusi, ‘ua fa‘apea, “‘Ia ‘outou tala‘iina le anapogi ma ‘ia ‘outou tu‘u atu ‘iā Napota i le mea sili i le nu‘u.
10 ‘Ia ‘outou tu‘u atu fo‘i i luma ‘iā te ia o tagata ulavavale e to‘alua e molimau ‘iā te ia, ‘ia fa‘apea, ‘Na e fāifai i le Atua ma le tupu.’ ‘Ona ‘outou ta‘ita‘i atu lea ‘iā te ia i tuāpā ma fetogi ‘iā te ia i ma‘a, ‘ia oti ai o ia.”
11 ‘Ona faia lea e tagata o lana ‘a‘ai, o toeaina ma ali‘i o ē nonofo i lana ‘a‘ai, e pei o le fe‘au a Iesepela ‘iā te latou, e tusa ma ana ‘upu na tusi i tusi na ia ‘aveina atu ‘iā te i latou.
12 ‘Ua latou tala‘iina le anapogi, ‘ua tu‘u fo‘i e i latou ‘iā Napota i le mea sili i le nu‘u.
13 ‘Ona ō mai lea o tagata ulavavale e to‘alua, ma la nonofo i ona luma; ‘ua molimau fo‘i tagata ulavavale ‘iā te ia, o Napota lava, i luma o le nu‘u, ‘ua fa‘apea, “Na fāifai Napota i le Atua ma le tupu.” ‘Ona latou ‘ave lea ‘iā te ia i tuāpā o le ‘a‘ai ma fetogi ‘iā te ia i ma‘a, ‘ona oti ai lava lea o ia.
14 ‘Ona latou ‘a‘auina atu lea nisi ‘iā Iesepela, ‘ua fa‘apea atu, “‘Ua fetogia Napota i ma‘a, ‘ua oti o ia.”
15 ‘Ua fa‘alogo Iesepela ‘ua fetogia Napota i ma‘a, ma ‘ua oti o ia, ‘ona fai atu lea o Iesepela ‘iā Aapo, “‘Inā tula‘i ia ma e fai mo oe le tōvine o Napota le Isereelu, na ia lē mafai ‘ona avatu ‘iā te oe i tupe; auā ‘ua lē ola Napota, a ‘ua oti.”
16 ‘Ua iloa e Aapo ‘ua oti Napota, ‘ona tula‘i lea o Aapo e alu ifo e fai mōna le tōvine o Napota le Isereelu.
17 ‘Ona tulei mai lea o le afioga a le ALI‘I ‘iā Elia le Tisepi, ‘ua fa‘apea mai:
18 ‘Inā tula‘i ia, ‘inā e alu ifo e fa‘afetaia‘i ‘iā Aapo le tupu o Isaraelu, o lo‘o i Samaria; fa‘auta o lo‘o i ai ia i le tōvine o Napota, ‘ua alu ifo i ai e fai mōna.
19 ‘ia e fai atu ‘iā te ia, ‘ia fa‘apea atu, “O lo‘o fa‘apea ‘ona fetalai mai o le ALI‘I: ‘Ua fasiotia ‘ea, ‘ua fai fo‘i mou?” ‘Ia e fai atu fo‘i ‘iā te ia, ‘ia fa‘apea atu, “O lo‘o fa‘apea ‘ona fetalai mai o le ALI‘I: O le mea na etoeto ai ulī i le toto o Napota, e etoeto ai fo‘i ulī i lou lava toto, o oe lava.”
20 ‘Ua fai mai Aapo ‘iā Elia, “O oe na le fai a‘u mou fili, ‘ua e maua ‘ea a‘u?”‘Ona fai atu lea o ia, “‘Ua ‘ou maua; auā ‘ua e fa‘atau oe ‘iā te oe e fai mea i leaga luma o le ALI‘I.
21 Fa‘auta, o lo‘o fetalai mai le ALI‘I ‘Ou te fa‘ao‘o atu le leaga ‘iā te oe ma ‘ou ‘ave‘esea lou gafa ma fa‘aumatia ai ‘iā Aapo o ē tula‘i atu i se ‘aupā, o pologa ‘atoa ma ē sa‘oloto i Isaraelu.
22 ‘Ou te faia fo‘i lou ‘āiga, ‘ia pei o le ‘āiga o Ierepoamo le atali‘i o Nepata, e pei o le ‘āiga o fo‘i o Paasa le atali‘i o Akia, ‘ona o le fa‘a‘ono‘ono ‘ua e fa‘a‘ono‘ono mai ai ‘iā te a‘u ma e fa‘atupu ai le agasala ‘iā Isaraelu.
23 O Iesepela fo‘i, o lo‘o fetalai mai ai le ALI‘I, ‘ua fa‘apea mai, ‘E ‘aina Iesepela e ulī i lalo o le pā o Isereelu.’
24 O so Aapo e oti i le ‘a‘ai e ‘aina ia e ulī; o sē oti i le vao e ‘aina lea e manu felelei.”
25 E leai lava se tasi la te tutusa ma Aapo, o lē na fa‘atau e ia ‘ia ia e fai mea leaga i luma o le ALI‘I; o ia na fa‘aosoosoina e Iesepela lana avā.
26 Na matuā fai mea leaga ‘ina ‘ua mulimuli i tupua, e tusa ma mea uma na faia e sa Amorī, o ē na tulia e le ALI‘I i luma o le fānauga a Isaraelu.
27 ‘Ua fa‘alogo Aapo i ia ‘upu, ‘ona saeia lea e ia ona ‘ofu ma ‘ua ‘ofu lona tino i ‘ie talatala ma ‘ua anapogi ma ta‘oto i ‘ie talatala ma fealualua‘i fa‘afifilemū.
28 ‘Ona tulei mai lea o le afioga a le ALI‘I ‘iā Elia le Tisepi, ‘ua fa‘apea mai,
29 “‘Ua e iloa ‘ea ‘ua fa‘amaulalo Aapo i o‘u luma? Auā ‘ua ia fa‘amaulalo i o‘u luma, o le mea lea ‘ou te lē fa‘ao‘o ai le leaga i lana nofoa‘iga; a o le nofoa‘iga a lona atali‘i ‘ou te fa‘ao‘o ai le leaga i lona ‘āiga.”#