1 ‘Ua uma ‘ona fai e Solomona o le fale o le ALI‘I, ma le fale o le tupu ma le finagalo uma o Solomona na ia finagalo e fai;
2 ‘ona fa‘aali mai lea o le ALI‘I ‘iā Solomona, o le atu lua lea, e pei ‘ona fa‘aali mai o ia ‘iā te ia i Kipeona.
3 ‘Ua fetalai mai le ALI‘I ‘iā te ia, “‘Ua ‘ou fa‘alogo i lau tatalo ma lau ‘ai‘oi, na e ‘ai‘oi mai i o‘u luma; ‘ua ‘ou fa‘apa‘iaina lenei fale ‘ua e faia e tu‘u ai lo‘u igoa e fa‘avavau; e fa‘asaga i ai o‘u mata ma lo‘u loto i aso uma.
4 ‘Āfai fo‘i ‘e te savali i o‘u luma, e pei ‘ona savali lou tamā o Tavita ma le loto sa‘o ma le amio sa‘o, ‘ina ‘ia fai e tusa ma mea uma na ‘ou fai atu ai ‘iā te oe ma e tausia a‘u tulafono ma a‘u fa‘amasinoga;
5 ‘ona ‘ou fa‘atumauina lea o le nofoāli‘i o lou mālō i Isaraelu e fa‘avavau, e fa‘apei ‘ona ‘ou fai atu ai i lou tamā o Tavita, ‘ua fa‘apea atu, ‘E le motu lou gafa i le nofoāli‘i o Isaraelu.’
6 “‘Ae ‘āfai ‘e te liliu ‘ese, ‘ae lē toe mulimuli mai ‘iā te a‘u, o ‘outou po o a ‘outou fānau ma ‘outou le tausia a‘u poloa‘iga ma a‘u tulafono ‘ua ‘ou tu‘uina atu i o ‘outou luma; ‘ae ō atu ‘outou ma ‘outou ‘au‘auna atu i atua ‘ese ma ifo atu ‘iā te i latou;
7 ‘ona ‘ou fa‘aumatia lea o Isaraelu a‘i le fogā‘ele‘ele ‘ua ‘ou foa‘iina atu ‘iā te i latou; o lenei fale fo‘i ‘ua ‘ou fa‘apa‘iaina mo lo‘u igoa, ‘ou te lafoa‘i atu ai i o‘u luma; e ‘avea fo‘i Isaraelu ma ‘upu fa‘atusa ma tauemuga i nu‘u uma lava.
8 O lenei fale fo‘i o lo‘o ‘ua maualuga, e ofo i ai o i latou uma o ē ui ane, ma uisa, ma fai ane, ‘Se a le mea ‘ua fa‘apea ai ‘ona fai e le ALI‘I i lenei nu‘u ma lenei fale?’
9 ‘Ona tali mai lea o i latou, ‘Auā ‘ua latou tu‘ua le ALI‘I lo latou Atua o lē na ‘aumaia o latou tamā mai le nu‘u o Aikupito, ‘ae latou tāofi i atua ‘ese ma ifo atu ‘iā te i latou ma ‘au‘auna atu ‘iā te i latou; o le mea lea ‘ua fa‘ao‘o ai e le ALI‘I lenei malaia uma ‘iā te i latou.’”
10 ‘Ua mavae tausaga e luafulu, na fai ai e Solomona o fale e lua, o le fale o le ALI‘I ma le fale o le tupu,
11 na ‘aumai ai e Hiramo o le tupu o Turo ‘iā Solomona, o la‘au o arasi ma la‘au o perosi ma auro, e tusa ma mea uma na ia loto i ai, ‘ona avatu lea e le tupu o Solomona ‘iā Hiramo o ‘a‘ai e luafulu i le nu‘u o Kalilaia.
12 ‘Ona sau lea o Hiramo mai Turo e matamata i ‘a‘ai na avatu e Solomona ‘iā te ia; a ‘ua lē tatau ia ‘a‘ai ‘iā te ia.
13 ‘Ona fa‘apea mai ai lea o ia, “Lo‘u uso e, o a ‘ea ia ‘a‘ai ‘ua e ‘aumaia ‘iā te a‘u? ‘Ua ia fa‘aigoa fo‘i i ai, o le nu‘u o Kapula, ‘ua o‘o i ona po nei.”
14 ‘Ua ‘aumai fo‘i e Hiramo i le tupu o auro e selau ma le luafulu o taleni.
15 O le mea fo‘i lenei na totogi ai e le tupu o Solomona o tagata; ‘ia faia le fale o le ALI‘I ma lona fale ma Milo ma le pā o Ierusalema ma Hasora ma Mekito, ma Kasera.
16 Auā na alu a‘e Farao le tupu o Aikupito, na ia faoa fo‘i Kasera, na ia fa‘amūina fo‘i i le afi, ma ia fasiotia o sa Kananā ē na nonofo i le ‘a‘ai, ‘ua na avatu fo‘i e fai ma mea avaga mo lona afafine o le avā a Solomona.
17 ‘Ua fai fo‘i e Solomona o Kasera ma Peteorana i lalo,
18 ma Paalata ma Tatemora i le vao i nu‘u,
19 ma ‘a‘ai uma sa ‘iā Solomona e tu‘u ai ‘oloa ma ‘a‘ai mo kariota ma ‘a‘ai mo ē ti‘eti‘e i solofanua ma mea uma na finagalo i ai Solomona e fai i Ierusalema, ma Lepanona ma nu‘u uma e pule ai o ia.
20 O tagata uma na totoe o sa Amorī ma sa Hetī, ma sa Perisē ma sa Hivī, ma sa Iepusē, o i latou e lē o le fānauga a Isaraelu;
21 o le fānauga i latou a ē na totoe i le nu‘u ‘ina ‘ua mavae atu i latou, o i latou na lē mafai e le fānauga a Isaraelu ‘ona fa‘aumatia, na faia i latou e Solomona ma pologa, e o‘o lava i ona po nei.
22 A ‘ua lē faia e Solomona ni o le fānauga a Isaraelu ma pologa; a o tagata tau i latou ma ana ‘au‘auna ma ona ali‘i ma ali‘i ‘ave ‘au ma ali‘i e pule i ana kariota ma ana ‘au e ti‘eti‘e i solofanua.
23 O ali‘i nei na tofia e pule i le galuega a Solomona, e lima selau ma le to‘alimagafulu o i latou, na pule i le nu‘u ē na faia le galuega.
24 Na alu a‘e fo‘i le afafine o Farao a‘i le ‘a‘ai a Tavita i lona fale na faia mo ia e Solomona; ‘ona fai ai lea e ia o Milo.
25 E ta‘iatutolu fo‘i i tausaga ‘ona faia e Solomona o taulaga mū, ma taulaga fa‘afetai i luga o le fatafaitaulaga na ia faia mo le ALI‘I; ‘ua ia fa‘amūina fo‘i mea manogi i le fata ‘ua i luma o le ALI‘I. ‘Ua fa‘aumaina ‘ona fai o le fale.
26 ‘Ua faia fo‘i e le tupu o Solomona o le fua i Esiokape, ‘ua felāta‘i ma Elata i le matāfaga o le sami Ulaula i le nu‘u o Etoma.
27 Na ‘a‘auina atu e Hiramo o ana ‘au‘auna i le fua, o tagata tautai na masani ma le sami, e fa‘atasi ma ‘au‘auna a Solomona.
28 ‘Ua latou ō atu i Ofeira ma ‘aumai ai auro e fa selau ma le luafulu o taleni; ma latou ‘aumai ai i le tupu o Solomona.