1 O ona po ia na ma‘i ai Avia le atali‘i o Ierepoamo.
2 ‘Ona fai atu lea o Ierepoamo i lana avā, “Se‘i e tula‘i ma e ‘ofu i ‘ofu ‘ese, ‘ina ne‘i latou iloa o oe o le avā a Ierepoamo ma e alu i Sailo; fa‘auta, o lo‘o i ai Akia le perofeta, o lē na fai mai ‘iā te a‘u ‘ou te fai ma tupu i lenei nu‘u.
3 ‘ia e ‘ave fo‘i i lou lima o areto e fuagafulu ma fa‘apāpā areto ma le fagu meli ma e alu atu ‘iā te ia; na te fa‘ailoa mai ‘iā te oe pe i‘u ‘ina fa‘apefea le tama.”
4 ‘Ua fa‘apea fo‘i ‘ona fai e le avā a Ierepoamo, ‘ua ia tula‘i atu fo‘i ma alu i Sailo, na o‘o i le fale o Akia. ‘Ae lē mafai ‘ona iloa se mea e Akia, auā sa tōmātūina ona mata ‘ina ‘ua toeaina ia.
5 ‘Ona fetalai mai lea o le ALI‘I ‘iā Akia, “Fa‘auta, o lo‘o sau le avā a Ierepoamo e fesili atu ‘iā te oe i se mea i lana tama, auā ‘ua ma‘i o ia; o lea, i le ma lea ‘e te fai atu ai ‘iā te ia; auā pe a o‘o mai o ia e fa‘atagā fafine ‘ese ia.”
6 ‘Ua fa‘alogo atu e Akia le pa‘u‘ū mai o ona vae ‘ina ‘ua ulufale mai o ia i le faitoto‘a, ‘ona fai atu lea o ia, “‘Inā maliu mai o oe le faletua o Ierepoamo; se a le mea ‘ua e fa‘atagā fafine ‘ese ai? ‘Ua ‘auina fo‘i a‘u i le fe‘au mamafa ‘iā te oe.
7 ‘Inā e alu ia, ‘inā fai atu ia Ierepoamo, ‘O lo‘o fa‘apea ‘ona fetalai mai o le ALI‘I le Atua o Isaraelu: ‘Ua ‘ou fa‘aeaina oe ai le nu‘u ma ‘ou faia oe ma ta‘ita‘i i lo‘u nu‘u o Isaraelu,
8 ma ‘ou sae‘eseina le mālō i le ‘āiga o Tavita ma foa‘iina atu ai ‘iā te oe; a o oe, ‘ua e le fa‘apei o la‘u ‘au‘auna o Tavita, o lē na tausi i a‘u poloa‘iga ma mulimuli mai ‘iā te a‘u ma lona loto ‘atoa, e fai na o mea e tusa i o‘u luma;
9 a ‘ua sili lava ‘ona e amio leaga i ē na muamua uma ‘iā te oe; auā ‘ua e alu ma e faia mo oe o atua ‘ese ma tupua u‘amea, e fa‘a‘ono‘ono ai ‘iā te a‘u, ‘ua e lafoa‘iina fo‘i a‘u i ou tua.
10 O le mea lea, fa‘auta, ‘ou te fa‘ao‘o atu ai le leaga i le ‘āiga o Ierepoamo ma ‘ou fa‘aumatia ia Ierepoamo, o ē tula‘i atu i se ‘aupā, o pologa ‘atoa ma ē sa‘oloto i Isaraelu; ‘ou te ‘ave ‘ese e ‘ua totoe o le ‘āiga o Ierepoamo, e pei o le tagata ‘ona la‘u otaota se‘ia uma lava.
11 O so sa Ierepoamō e oti i le ‘a‘ai, e ‘aina lea e ulī; o lē oti i le vao, e ‘aina lea e manu felelei; auā ‘ua fetalai mai ai le ALI‘I.’
12 A o oe, ‘inā tula‘i ia ‘inā e alu i lou fale; pe a o‘o ou vae i le ‘a‘ai, ‘ona oti lea o le tama.
13 E taufaitagitu‘i Isaraelu uma ‘ona o ia ma latou tanu ‘iā te ia; auā ‘ua na o ia o le ‘āiga o Ierepoamo e o‘o i le tu‘ugamau; auā ‘ua maua i totonu ‘iā te ia se mea lelei i le ALI‘I le Atua o Isaraelu i le ‘āiga o Ierepoamo.
14 E fa‘atūina fo‘i e le ALI‘I mo ia se tupu i Isaraelu, o lē na te fa‘aumatia le ‘āiga o Ierepoamo i lea aso. O le a fo‘i? o ona po nei lava.
15 “Auā e taia e le ALI‘I o Isaraelu, e pei o le u ‘ua lūlūina i le vai; na te lia‘iina fo‘i Isaraelu a‘i lenei nu‘u lelei na ia foa‘iina i o latou tamā; na te fa‘ata‘ape‘ape fo‘i ‘iā te i latou i tala atu o le vaitafe, auā ‘ua latou faia o latou tupua o Asaira, ‘ua fa‘a‘ono‘ono ai i le ALI‘I.
16 Na te tu‘ulafoa‘i fo‘i ia Isaraelu ‘ona o agasala a Ierepoamo, o le ‘ua agasala, o le ‘ua fa‘atupu fo‘i le agasala ia Isaraelu.”
17 ‘Ona tula‘i lea o le avā a Ierepoamo, ‘ua alu; ‘ua o‘o fo‘i o ia i Tiresa; ‘ua papa‘i atu o ia i le faitoto‘a o le fale ‘ona oti ai lea o le tama.
18 ‘Ua latou tanu ‘iā te ia; ‘ua taufaitagitu‘i fo‘i Isaraelu uma ‘iā te ia, e tusa ma le afioga a le ALI‘I na ia fetalai mai ai na ‘aumaia e lana ‘au‘auna o Akia le perofeta.
19 O toe o mea na faia e Ierepoamo, o tau‘a na ia faia ma le faiga o lona mālō, fa‘auta, ‘ua tusia i le tusi o tala i nofoa‘iga a tupu o Isaraelu.
20 O ona po fo‘i na fai ai Ierepoamo ma tupu e lua sefulu ma le lua o tausaga ia; ‘ona ta‘oto ai lea o ia fa‘atasi ma ona tamā; ‘ona soloa‘i ane lea o Natapu lona atali‘i e fai ma tupu.
21 ‘Ua fai Reopoamo le atali‘i o Solomona ma tupu i Iuta; sa fagafulu ma le tasi o tausaga o Reopoamo ‘ina ‘ua fai ai o ia ma tupu; e tasi le sefulu ma le fitu o tausaga na fai ai o ia ma tupu i Ierusalema, o le ‘a‘ai lea na filifilia e le ALI‘I i itū‘āiga uma o Isaraelu e tu‘u ai lona suafa. O le igoa fo‘i o lona tinā o Naama lea o le sa Amonī.
22 ‘Ua fai mea leaga e Iuta i luma o le ALI‘I, ‘ua fa‘atupuina e i latou lona fuā ‘iā latou agasala ‘ua latou agasala ai ‘ua sili i mea uma na faia e o latou tamā.
23 Auā na latou faia mo i latou o mea maualuluga ma tupua, ma tupua o Asaira, i luga o mauga maualuluga uma ma lalo o la‘au tauluuluola uma.
24 Sa i ai fo‘i i le nu‘u o tagata fa‘asotoma; ‘ua latou faia e tusa ma mea e ‘inosia uma a nu‘u ‘ese na tulia e le ALI‘I i luma o le fānauga a Isaraelu.
25 O le lima o tausaga o le tupu o Reopoamo ‘ua alu a‘e ai i Ierusalema o Sesaka le tupu o Aikupito.
26 ‘Ua ia ‘avea fo‘i le ‘oloa sa i le fale o le ALI‘I, ma le ‘oloa i le fale o le tupu; ‘ua ia ‘avea mea uma lava; ‘ua ‘avea fo‘i e ia o talitā auro uma lava na faia e Solomona.
27 ‘Ona faia lea e le tupu o Reopoamo o talitā ‘apamemea e sui a‘i ma ia tu‘uina atu ai i lima o le ali‘i sili o le ‘au e fa‘afeao, o ē na leoleo i le faitoto‘a o le fale o le tupu.
28 ‘Ua ‘ave fo‘i e le ‘au e fa‘afeao o ia talitā ‘ina o alu atu le tupu i le fale o le ALI‘I ma latou toe ‘aumai ai i le potu o le ‘au e fa‘afeao.
29 O toe o mea na faia e Reopoamo ma mea uma na ia faia, ‘ua lē tusia ‘ea i le tusi o tala i nofoa‘iga a tupu o Iuta?
30 Sa utu tau lava o Reopoamo ma Ierepoamo i aso uma.
31 ‘Ua ta‘oto Reopoamo fa‘atasi ma ona tamā ‘ua tanumia fo‘i o ia fa‘atasi ma ona tamā i le ‘a‘ai a Tavita. O le igoa fo‘i o lona tinā o Naama o le sā Amonī. Na soloa‘i ane lona atali‘i o Aviama e fai ma tupu.#