1 ‘Ua fa‘apotopotoina e Peniata le tupu o Suria o ana ‘au uma; sa ‘iā te ia o tupu e tolugafulu ma le lua ma ‘au e ti‘eti‘e i solofanua ma kariota; ‘ua alu a‘e o ia ma vagaia Samaria ma tau ai le tau‘a.
2 ‘Ua ‘auina mai e ia le sāvali i le ‘a‘ai ‘iā Aapo le tupu o Isaraelu, ‘ua fa‘apea mai ‘iā te ia: “O lo‘o fa‘apea ‘ona fai mai o Peniata:
3 O lau ario ma lau auro, o a‘u ia, o au avā fo‘i ma au fānau, o ē ‘ua sili ‘ona lelei, o a‘u ia.”
4 ‘Ona tali atu lea o le tupu o Isaraelu, ‘ua fa‘apea atu, “Le ali‘i e, le tupu, o a‘u nei, ma a‘u mea uma o au ia, e pei ‘ona e fetalai mai ai.”
5 ‘Ua toe fo‘i mai le sāvali ma latou fai mai, “O lo‘o fa‘apea ‘ona fetalai mai o Peniata, ‘ua fa‘apea mai: E ui lava ‘ina alu atu la‘u fe‘au ‘iā te oe, ‘ua fa‘apea, ‘‘Ia e ‘aumai ma a‘u au ario ma au auro ma au avā, ma au fānau;’
6 a o le itūlā fa‘apenei taeao, ‘ou te ‘a‘auina atu ai a‘u ‘au‘auna ‘iā te oe, ‘ina ‘ia latou su‘esu‘e i lou fale ma fale o au ‘au‘auna; o mea uma fo‘i ‘ua e fiafia i ai, latou te tago i o latou lima ma latou ‘avea.”
7 ‘Ona tala‘i lea e le tupu o Isaraelu o toeaina uma o le nu‘u ma fai atu, “Fa‘auta mai ia ma ‘ia ‘outou iloa, o lo‘o sā‘ili‘ili lenei tagata i se mea leaga; auā na ‘a‘auina mai e ia nisi ‘iā te a‘u e ‘ave i a‘u avā, ma a‘u fānau ma a‘u ario ma a‘u auro; ‘ua ‘ou le fa‘afiti atu fo‘i ‘iā te ia.”
8 ‘Ona fai mai lea ‘iā te ia o toeaina uma ma le nu‘u uma, “‘Aua ‘e te fa‘afofoga, pe usiusita‘i ‘iā te ia.”
9 ‘Ona fai atu lea o ia i le sāvali a Peniata, “‘Ia ‘outou fa‘apea atu i lo‘u ali‘i le tupu, o mea uma na e mua‘i fetalai mai ai i lau ‘au‘auna ‘ou te faia; a o lenei mea ‘ou te lē mafaia.”‘Ona ō lea o le sāvali ma latou ‘ave le ‘upu ‘iā te ia.
10 ‘Ona ‘a‘auina mai lea o nisi e Peniata ‘iā te ia, ‘ua ia fai mai, “‘Ia fa‘apea ‘ona fai e atua ‘iā te a‘u, ma ia fa‘aopoopo i ai, pe ‘āfai e lava le efuefu o Samaria ‘ia tofu ai ma lu‘utaga i le nu‘u uma o ē mulimuli ‘iā te a‘u.”
11 ‘Ona tali atu lea o le tupu o Isaraelu, ‘ua fa‘apea atu, “‘Inā fai atu ia ‘iā te ia, ‘Aua le mitamita le ‘ua fusi ‘iā te ia i le ‘ofu tau, e pei o lē na te tatalaina.”
12 ‘Ua fa‘alogo Peniata i lenā ‘upu, a o feinu o ia ma tupu i fale apitaga; ‘ona fai atu lea o ia i ana ‘au‘auna; “‘Inā totofi ia le tau‘a.” ‘Ona latou tofia lea o le tau‘a i le ‘a‘ai.
13 Fa‘auta, na sau le tasi perofeta ‘iā Aapo le tupu o Isaraelu, ‘ua fai mai, “O lo‘o fa‘apea ‘ona fetalai mai o le ALI‘I, ‘Ua e iloa atu ‘ea lenā vao tagata uma e to‘atele? Fa‘auta, ‘ou te tu‘uina atu i latou i lou lima i le aso nei; ‘ona e iloa ai lea o a‘u o le ALI‘I.”
14 ‘Ona fai atu lea o Aapo, “E faia ‘ea e ai?”‘Ona fai mai lea o ia, “O lo‘o fa‘apea ‘ona fetalai mai o le ALI‘I, O taulele‘a o ali‘i e pule i itū.”‘Ona fai atu lea o ia, “O ai ‘ea na te amataina le tau‘a?”‘Ona fai mai ai lea o ia, “O oe lava.”
15 ‘Ona faitau lea e ia o taulele‘a o i ali‘i e pule i itū; e lua selau ma le tolu sefulu ma le to‘alua; e mulimuli ane ‘iā te i latou na faitau e ia o le nu‘u uma, o le fānauga uma a Isaraelu e fitu gaafe.
16 ‘Ona ō atu lea o i latou i le tutonu o le la. A o Peniata ma tupu, o tupu e to‘atolugafulu ma le to‘alua o ē fesoasoani ia, sa latou feinu ‘ia ‘onā i fale apitaga.
17 ‘Ua muamua atu taulele‘a o ali‘i e pule i itū. ‘Ona ‘a‘auina atu lea e Peniata nisi, ‘ona latou ta‘u mai lea ‘iā te ia, ‘ua fa‘apea mai, “‘Ua ō mai tagata mai Samaria.”
18 ‘Ona fai atu lea o ia, “Pe ‘āfai o le filemū ‘ua latou ō mai ai, ‘ia ‘outou pupu‘e ola ‘iā te i latou; pe ‘āfai fo‘i o le tau‘a ‘ua latou ō mai ai, ‘ia ‘outou pupu‘e ola ‘iā te i latou.”
19 ‘Ua ō atu i tua o le ‘a‘ai ‘ia taulele‘a o ali‘i e pule i itū ma ‘au na mulimuli ‘iā te i latou.
20 ‘Ua latou ta‘itasi ma fasioti i lana tagata; ‘ona sōsōla lea o Suria; ‘ua pi‘ituli Isaraelu ‘iā te i latou. ‘Ua sao Peniata le tupu o Suria i le solofanua, fa‘atasi ma ē ti‘eti‘e i solofanua.
21 ‘Ua alu atu le tupu o Isaraelu ma fasia solofanua ma kariota; ‘ua ia fasiotia fo‘i Suria i le fasi tele.
22 ‘Ona sau lea o le perofeta i le tupu o Isaraelu, ‘ua fa‘apea atu ‘iā te ia, “‘Inā maliu atu ia oe ma e fa‘amalosi ma e fa‘autauta ma ‘ia e silafia mea ‘e te faia; auā pe a toe o‘o i le tausaga, ‘ona sau ai lea o le tupu o Suria e tau ma oe.”
23 ‘Ua fai atu ‘au‘auna a le tupu o Suria ‘iā te ia, “O atua o mauga o latou atua, o le mea lea na manumālō ai i latou ‘iā te i tatou; a ‘ia tatou tau ma i latou i se mea laugatasi, ai lava tatou te manumālō ai ‘iā te i latou.
24 ‘ia e faia lenei mea, ‘ia e fa‘ate‘aina tupu ta‘itasi i lona tofi ma e tofia o ē ‘avea ‘au e sui a‘i i latou.
25 ‘Ia e faitauina fo‘i mo oe o ‘au e tusa ma ‘au na fa‘aumatia sa ‘iā te oe; ‘ia suia le solofanua i le solofanua ma le kariota i le kariota; ‘ona tatou tau ai lea ma i latou i se mea laugatasi, ai lava tatou te manumālō ai ‘iā te i latou.” ‘Ua fa‘alogo o ia ‘iā latou ‘upu ma fai i ai.
26 ‘Ua toe o‘o i le tausaga, ‘ona faitaulia lea e Peniata o Suria, ‘ua alu a‘e i Afeka e tau ma Isaraelu.
27 ‘Ua faitaulia fo‘i le fānauga a Isaraelu ma ‘ua latou sauniuni uma lava; ‘ona latou ō lea e fa‘afetaia‘i ‘iā te i latou. ‘Ua tolauapi le fānauga a Isaraelu ‘ua fa‘afeagai ma i latou, e pei o lafu ‘oti itiiti e lua; a ‘ua tumu le nu‘u ‘iā Suria.
28 ‘Ona sau lea o le tagata o le Atua ma fai mai i le tupu o Isaraelu, ‘ua fa‘apea mai, “O lo‘o fa‘apea ‘ona fetalai mai o le ALI‘I, ‘Ua fa‘apea mai Suria, ‘O le Atua o mauga le ALI‘I, ‘ae lē o le Atua o vanu;’ o le mea lea ‘ou te tu‘uina atu ai o lenā vao tagata uma e to‘atele i lou lima; ‘ona ‘outou iloa lava lea, o a‘u lava o le ALI‘I.”
29 E fitu po ‘ua latou tolauapi e fa‘afeagai ai. ‘Ua o‘o i le aso fitu, ‘ona latou tau ai lea o le tau‘a; ‘ona fasiotia lea e le fānauga a Isaraelu o Suria e selau afe o ‘au e sāvavali, i le aso e tasi.
30 O ē na totoe, ‘ua sōsōla i latou i Afeka, i le ‘a‘ai; ‘ua solo i lalo le pā i luga o tagata e luafulu o afe ma afe e fitu o ē na totoe. ‘Ua sola Peniata, ‘ua o‘o i le ‘a‘ai, i le afeafe tuloto.
31 ‘Ona fai atu lea o ana ‘au‘auna ‘iā te ia, “Fa‘auta mai ia, ‘ua matou fa‘alogo, o tupu o le ‘āiga o Isaraelu, o tupu alolofa i latou; se‘i matou lavalava i ‘ie talatala i o matou sulugātiti ma maea i o matou ulu, matou te ō atu fo‘i i le tupu o Isaraelu; atonu na te fa‘asoifua ‘iā te oe.”
32 ‘Ona latou fusi lea o ‘ie talatala i o latou sulugātiti ma maea i o latou ulu ma latou ō atu i le tupu o Isaraelu ma latou fai atu, “O lo‘o fai mai lau ‘au‘auna a Peniata, ‘Se‘i e fa‘aola mai ‘iā te a‘u.’”‘Ona fai mai lea o ia, “‘Ua soifua pea ‘ea ia? O lo‘u uso ia.”
33 ‘Ua fa‘anaunau atu le nu‘u i se ‘upu mai ‘iā te ia ma latou vave tāofi i ai; ‘ona latou fai atu lea, “O lou uso o Peniata.”‘Ona fai mai lea o ia, “‘Inā ō ia ma ‘aumai ‘iā te ia.” ‘Ona sau ai lea o Peniata; ‘ua talia fo‘i o ia e ia i lona kariota.
34 ‘Ona fai mai lea o Peniata ‘iā te ia, “O ‘a‘ai na faoa e lo‘u tamā nai lou tamā ‘ou te toe avatua; ‘e te fai fo‘i ni ala i Tamaseko mo oe, e pei ‘ona faia e lo‘u tamā i Samaria.”‘Ona fai atu lea o Aapo, “‘Ou te tu‘u atu ‘iā te oe e alu ma la tā feagaiga nei.” ‘Ona la faia lea o le feagaiga ma ia; ‘ona ia tu‘u atu lea ‘iā te ia e alu.
35 O le tasi so‘o o le ‘au perofeta na fai atu o ia i le afioga a le ALI‘I i le tasi tagata, “‘Ia e ta mai ‘iā te a‘u.” A ‘ua lē mafai le tagata ‘ona ta ‘iā te ia.
36 ‘Ona fai atu lea o ia ‘iā te ia, “‘Ua e lē fa‘alogo i le afioga a le ALI‘I, fa‘auta mai, o le mea lea a e alu ‘ese ‘iā te a‘u e oti ai oe i le leona.” ‘Ua alu ia nai ‘iā te ia, ‘ona maua lea o ia e le leona, ‘ua oti ai o ia.
37 ‘Ua iloa fo‘i e ia le tasi tagata, ‘ona ia fai atu lea ‘iā te ia, “Se‘i e ta mai ‘iā te a‘u.” ‘Ona ta atu lea o le tagata ‘iā te ia, o lana ta fo‘i na manu‘a ai o ia.
38 ‘Ona alu lea o le perofeta, ‘ua tu atu i le tupu i le ala; ‘ua ia fa‘auiga‘eseina o ia e ia i le fusi i ona mata.
39 ‘Ua alu ane le tupu, ‘ona vala‘au atu lea o ia i le tupu, ‘ua fa‘apea atu, “Na alu ane lau ‘au‘auna i totonu o le tau‘a; fa‘auta, ‘ua liliu mai le tasi tagata, ma ia ‘aumai ‘iā te a‘u le tagata, ‘ua fai mai, ‘‘Ia e leoleo i lenei tagata; ‘āfai lava e lē iloa o ia, ‘ona suia lea o lona ola i lou ola, pe ‘e te ‘aumaia le taleni o ario.’
40 Na faia e lau ‘au‘auna ana fe‘au i lea mea ma lea mea, ‘ona leai lea o ia.”‘Ona fai atu lea o le tupu o Isaraelu ‘iā te ia, “E fa‘apea lau sala, o oe lava ‘ua e fa‘atonuina.”
41 ‘Ona ‘ave ‘ese loa lea e le fusi a‘i ona mata; ‘ona iloa lea e le tupu o Isaraelu, o so le ‘au perofeta o ia.
42 ‘Ona fai atu lea o ‘iā te ia, “O lo‘o fa‘apea ‘ona fetalai mai o le ALI‘I, ‘‘Ua e tu‘u atu e alu le tagata na tofia e a‘u ‘ia oti, o le mea lea e suia ai lona ola i lou ola ma lona nu‘u i lou nu‘u.’”
43 ‘Ona alu atu lea o le tupu o Isaraelu i lona fale ‘ua tigā ma ita; ‘ua o‘o ia i Samaria.