2 ‘ona fa‘apea ane lea a le agelu: Tovia e, lo‘u uso e, ‘ua e iloa pe fa‘apefea ‘ona e tu‘ua o lou tamā.
3 ‘Āfai la ‘ua e loto malie i ai, ‘ia tā muamua atu, a ‘ia mulimuli lemū mai o le ‘au‘āiga i le ala fa‘atasi ma lau avā ‘atoa fo‘i ma manu.
4 ‘Ua ia loto ‘ia la muamua atu, ‘ona fai atu lea o Refaelu ‘iā Tovia: ‘Ia alu ma oe le au o le i‘a, auā o le mea aogā lava. ‘Ona tago lea o Tovia i le au o le i‘a ma ‘ua la ō.
5 A o Ana sa nofo i aso ta‘itasi uma i tala ane o le auala, i le tumutumu o le tasi mauga, sa mafai ‘ona ia iloa mamao atu ai.
6 Sa mafai i lea mea ‘ona tau ‘i‘ite i lona sau, ‘ona iloa mamao atu lea, ‘ua na iloa loa o lana tama o lo‘o sau; ‘ona momo‘e atu lea ma tala‘i atu i lana tane o fa‘apea atu: O lou atali‘i lea o lo‘o sau.
7 Ma ‘ua fai atu o Refaelu ‘iā Tovia: A e ulu atu loa i lo ‘outou fale, ‘ia e ifo atu ai i le Ali‘i lou Atua; ‘e te fa‘afetai atu fo‘i ‘iā te ia ma e fa‘alatalata atu i lou tamā ma sogi ‘iā te ia.
8 ‘Ona e nini lea o ona mata i le au o le i‘a ‘ua ‘iā te oe; auā ‘ia e iloa lava e lē pine ‘ona fa‘apupulaina ona mata, ‘ona iloa atu lea e lou tamā le malamalama o le lagi, e ‘oli‘oli fo‘i o ia i le va‘ai atu ‘iā te oe.