1 ‘Ona i‘u ai lea o ‘upu a Topita. Na ola fo‘i o Topita i tausaga e fagafulu ma le lua talu ‘ina fa‘apupulaina o ia, ma ‘ua iloa e ia le fānau a le fānau a lana fānau.
2 A ‘ua ‘atoa o ona tausaga e selau ma le lua, ‘ona tanumia lea o ia ma le fa‘aaloalo i Nineva.
3 Na fa‘apogisāina ona mata ‘ina ‘ua ‘atoa le limagafulu ma le ono o ona tausaga, ‘ae na toe fa‘apupulaina o ia i lona onogafulu o tausaga.
4 ‘Ae na fiafia lava ia i toe tausaga o lona ola, sa tupu atili pea lona mata‘u i le Atua, tupu atili ai fo‘i ma lona filemū.
5 A o le itūlā o lona oti, na ia vala‘au mai ‘iā Tovia, lona atali‘i, e sau, ‘atoa ma ana fānau o taulele‘a e to‘afitu, o fānau a lona atali‘i ma ‘ua fai atu ‘iā te i latou.
6 ‘Ua lata mai le fa‘aumatia o Nineva, auā e le i‘u vale le afioga a le Ali‘i; o tatou fo‘i uso ‘ua fa‘ata‘ape‘apeina ai le fanua o Isaraelu, e toe fo‘i atu lava i ai i latou.
7 ‘Ae fa‘atumuina uma ona fanua ‘ua tu‘ufua; o le fale fo‘i o le Atua na susunuina ai, e toe atiina a‘e lava ia, i le e toe fo‘i atu i ai o i latou uma e matata‘u i le Atua.
8 E tu‘ua fo‘i o latou tupua e nu‘u ‘ese, ‘ae ō atu i latou i Ierusalema ma mau ai i latou.
9 E ‘oli‘oli fo‘i ‘iā te ia o tupu uma o le lalolagi, e ifo i latou i le Tupu o Isaraelu.
10 O lenei, la‘u fānau e, ‘inā fa‘alogo mai ia i lo ‘outou tamā, ‘ia ‘outou ‘au‘auna atu i le Ali‘i ma le fa‘amaoni ma ‘ia tauivi i fai o mea e lelei ‘iā te ia;
11 ‘ia ‘outou poloa‘i atu fo‘i i la ‘outou fānau, ‘ia latou tausi i tulafono ma fai ni a latou mea alofa; ‘ia latou manatua le Atua ma fa‘amanū ‘iā te ia i aso uma, i le fa‘amaoni ma lo latou malosi ‘atoa.
12 O lenei, le fānau e, ‘ia ‘outou fa‘alogo mai ‘iā te a‘u, ‘aua lava ne‘i ‘outou nonofo ‘i‘inei; a o le aso tou te teuteu ai lo ‘outou tinā fa‘atasi ma a‘u i le tu‘ugamau e tasi, ‘ia ‘outou sāvavali loa i le aso lava lea, ma ō atu nai lenei ‘a‘ai.
13 Auā ‘ua ‘ou iloa, o lana amio leaga e fa‘aumatia ai lava ia.
14 A ‘ua o‘o ‘ina oti lona tinā, ‘ona te‘a ‘ese lea ma Nineva o Tovia ma lana avā ma le la fānau ma le fānau a la la fānau ma ‘ua toe fo‘i atu i mātua o lana avā;
15 ‘ua na maua fo‘i i lā‘ua o mālōlōina ma ‘ua manuia lo la ulusinā; ‘ua tausi fo‘i o ia ‘iā te i lā‘ua ma ‘ua fa‘amoe lava e ia o lā‘ua mata ma ‘ua maua lava e ia le tofi o ‘oloa ‘atoa o le ‘āiga o Rakuelu ma ‘ua iloa e ia lona lima o tupulaga o le fānau a lana fānau.
16 ‘Ua ‘atoa ona tausaga e ivagafulu ma le iva i le mata‘u i le Atua ma le loto fiafia, ‘ona latou tanu lea ‘iā te ia.
17 A o lona ‘āiga uma ma lana fānau uma ‘ua tūtūmau i latou i le manuia ma le amiotonu, e i ai ‘ona fa‘atau fiafia ‘iā te i latou o le Atua ma tagata, ‘ae maise o i latou uma o ē sa nonofo i lea nu‘u.