1 ‘Ua la ulufale atu ‘iā Rakuelu ma ‘ua talia i lā‘ua e Rakuelu ma le fiafia.
2 A ‘ua tepa atu o Rakuelu ‘iā Tovia, ‘ona fai atu lea i lona to‘alua o Ana: ‘Ua matuā foliga o le taule‘ale‘a lenei i lo‘u uso!
3 ‘Ua uma ana ‘upu ia, ‘ona ia fa‘apea ane lea:O ni fea ‘ea ‘oulua? A ‘ua fa‘apea mai i lā‘ua: O le itū‘āiga o Nafatali e i ai i mā‘ua, i le tāfeaga o Nineva.
4 Ma ‘ua fai atu Rakuelu ‘iā te i lā‘ua: Po ‘ua lua iloa ‘ea lo‘u uso o Topita?‘Ua la tali mai: Ma te iloa o ia.
5 A ‘ua fai ni ‘upu vivi‘i e tele e uiga ‘iā te ia, ‘ona fa‘apea mai lea a le agelu ‘iā Rakuelu:O Topita lenā ‘ua e fesili mai ai, o le tamā lea o lenei taule‘ale‘a.
6 ‘Ua oso mai o Rakuelu ma ‘ua sogi atu ‘iā te ia ma le maligi o ona loimata ma ‘ua tagi i lona ua,
7 o fa‘apea atu: ‘Ia fa‘amanuiaina lava oe, lo‘u atali‘i e, auā o oe o le atali‘i o le tagata amiotonu ma le leleia‘ia‘i.
8 O lona to‘alua fo‘i o Ana ma le la tama teine o Sara sa fētāgisi fo‘i i lā‘ua.
9 ‘Ua uma lea talatalaga, ‘ona poloa‘i lea o Rakuelu ‘ia fasia se mamoe ma ‘ia saunia se faigā‘ai. A ‘ua apoapoa‘i atu ‘iā te i lā‘ua ‘ia la ta‘o‘oto i le ‘āiga.
10 ‘Ona fa‘apea mai lea a Tovia: ‘Ou te lē ‘ai lava ‘i‘inei i lenei aso pe inu ai, se‘iloga ‘ua e mua‘i talia la‘u tagi ma e folafola mai ‘e te tu‘u mai ‘iā te a‘u o lou afafine o Sara.
11 ‘Ua fa‘alogo o Rakuelu i lenā ‘upu, ‘ona mata‘utuia lea o ia, auā sa na iloa o mea na o‘o i tane ia e to‘afitu na ō atu ‘iā te ia; ma ‘ua amata ‘ona fefe ne‘i o‘o fo‘i se mea fa‘apea i lenei taule‘ale‘a. A ‘ua fa‘alotolotolua o ia ma ‘ua lē tali atu se ‘upu i lana tagi.
12 ‘Ona fai mai lea o le agelu ‘iā te ia: ‘Aua ‘e te fefe ‘inā tu‘u mai o ia i lenei tama, auā o ia lenei, o lo‘o mata‘u i le Atua, e tatau ‘ona nofotane ai lou afafine; o le mea lea na lē mafai ai i se tasi ‘ona faiavā ‘iā te ia.
13 ‘Ona fai atu lea o Rakuelu: ‘Ua ‘ou mautinoa lava, ‘ua talia e le Atua i ona luma o a‘u talosaga mo o‘u loimata.
14 ‘Ua ‘ou talitonu fo‘i ‘ua na ‘auina mai ‘oulua ‘iā te a‘u, ‘ina ‘ia fa‘atasia lenei teine ma se tane o lona ‘āiga, e tusa ma le tulafono a Mose; ‘aua la ‘e te māsalosalo, ‘ou te tu‘u atu lava o ia ‘iā te oe.
15 ‘Ona ia tago lea i le lima taumatau o lona afafine ma ‘ua tu‘u atu i le lima taumatau o Tovia, o fa‘apea ane:‘Ia ‘iā te ‘oulua le Atua o Aperaamo ma le Atua o Isaako ma le Atua o Iakopo, ‘ia fa‘atasia ‘oulua e ia, ma ‘ia fa‘ataunu‘u e ia o lana fa‘amanuiaga ‘iā te ‘oulua.
16 Ma ‘ua latou tago i se laupepa, ‘ua latou fa‘amauina ai le fa‘aipoipoga.
17 ‘Ona latou ‘a‘ai ai lea o vivi‘i atu i le Atua.
18 A ‘ua ‘a‘amia e Rakuelu lana avā o Ana ma ‘ua poloa‘i atu ‘iā te ia ‘ia teu le tasi potu.
19 ‘Ua ia ta‘ita‘i i ai lana tama o Sara, a ‘ua tagi le teine.
20 ‘Ona fa‘apea atu lea ‘iā te ia: La‘u tama e, ‘ia e loto malosi. ‘Ia foa‘i mai ‘iā te oe le fiafia e le Atua o le lagi, e sui a‘i i le fa‘anoanoa ‘ua e mafatia ai!