1 ‘Ona vala‘au ai lea o Topita i lona atali‘i ma ‘ua fai atu ‘iā te ia: Se a se mea a mafai ‘ona tatou avatua i le tagata pa‘ia lea ‘ua lua ō mai ma oe?
2 ‘Ua tali mai o Tovia, ‘ua fa‘apea mai i lona tamā: Lo‘u tamā e, se a se taui a tatou avatu ‘iā te ia? se a fo‘i se mea e mafai ‘ona tusa i lona agalelei mai?
3 ‘Ua na ta‘ita‘i ‘iā te a‘u i le ala ma toe ta‘ita‘i mai fo‘i ma le saogalemū, ‘ua talia e ia lava le tupe nai ‘iā Kapaelu, o ia fo‘i na ala ai ‘ona ‘ou maua la‘u avā ma ‘ua na tuli‘ese ‘iā te ia le temoni, ‘ua na fa‘afiafia ai i ona mātua; ‘ua na fa‘asao fo‘i ‘iā te a‘u lava ne‘i ‘aina e le i‘a; o ia fo‘i ‘ua e iloa atu ai le malamalama o le lagi ma ‘ua fa‘atumuina i tatou e ia i mea lelei uma. Se a se mea a mafai ‘ona tatou avatu ‘iā te ia e tusa ma mea ia?
4 ‘Ae ‘ou te ole atu, le tamā e, ‘inā e fa‘atoga atu ‘iā te ia pe alofa lava ia ma tali mā ia le vaeluagalemū o mea uma na matou ‘aumaia.
5 Ma ‘ua vala‘au atu ‘iā te ia e i lā‘ua, le tamā ma le atali‘i, ‘ua la ta‘ita‘i ane ‘iā te ia ma ‘ua la tagi atu ‘iā te ia, ‘ina ‘ia alofa ma tali ma le loto malie le vaeluagalemū o mea na latou ‘aumaia.
6 ‘Ua na o i latou, ‘ona fa‘apea ane a ia: ‘Ia ‘outou fa‘amanū i le Atua o le lagi ma vivi‘i atu ‘iā te ia i luma o tagata ola uma, auā na fa‘aali atu ‘iā te ‘outou lona agaalofa.
7 Auā e lelei ‘ona fa‘ananā le ‘upu lilo a le tupu, a o le mea mamalu o le fa‘aali ma le ta‘uta‘u o galuega a le Atua.
8 E lelei le tatalo ‘atoa ma le anapogi; e sili fo‘i le fai mea alofa i le teu o fa‘aputuga auro;
9 auā o le fai mea alofa e lavea‘iina ai le tagata a‘i le oti, e fa‘amamāina a‘i fo‘i o agasala, e maua mai a‘i fo‘i le agaalofa ma le ola e fa‘avavau.
10 A o i latou ‘ua fai le agasala ma le amio leaga, o fili lava ia o latou agaga.
11 O lenei ‘ou te fa‘aali atu ‘iā te ‘oulua le ‘upu moni, ‘ou te lē nanā fo‘i ‘iā te ‘oulua le ‘upu lilo.
12 A o tatalo lava oe ma loimata ma tanu i tagata oti, o tu‘u fo‘i lau faigā‘ai ma fa‘ananā o tagata oti i lou fale i le ao ma tanu ‘iā te i latou i le po, o a‘u lava sa ‘ou momoli au talosaga i le Atua.
13 ‘Ona ‘ua talileleia fo‘i oe i luma o le Atua, o lea na tatau ai ‘ona tofotofoina oe i le fa‘aosoosoga.
14 A o lenei ‘ua ‘auina mai a‘u e le Atua, ‘ina ‘ia ‘ou fa‘amālōlō ‘iā te oe ma lavea‘i ‘iā Sara, le avā a lou atali‘i a‘i le temoni.
15 Auā o a‘u nei o le agelu o Refaelu, o le tasi o agaga e to‘afitu o lo‘o matou tutū i luma o le Ali‘i.
16 ‘Ua la fa‘alogo i mea ia, ‘ona atuatuvale lea i lā‘ua, ‘ua tetemū i lā‘ua ma pa‘u‘ū faō i le ‘ele‘ele.
17 A ‘ua fai atu le agelu ‘iā te i lā‘ua: ‘Ia ‘oulua fīfīlemū, ‘aua ne‘i lua fefefe,
18 auā o ona po na tatou fa‘atasi ai ma ‘outou, na ‘ou i ai ‘ona o le finagalo o le Atua. ‘Ia ‘outou vivi‘i atu ‘iā te ia ma pepese ‘iā te ia.
19 Sa lua fa‘apea, na ‘ou ‘ai ma inu fa‘atasi ma ‘outou; a ‘ua fagaina o a‘u i le mea e ‘ai e lē o va‘aia ma le mea e inu e le au va‘aia e tagata.
20 ‘Ua o‘o i le itū aso ‘ou te toe fo‘i atu ai i lē na ia ‘auina mai a‘u. A o ‘outou, ‘ia ‘outou vivi‘i atu i le Atua ma fa‘ailoa atu ana vāvega uma.
21 ‘Ua mavae fo‘i ‘ona ta‘u atu o mea ia, ‘ona ‘ave‘esea lea o ia i o la luma ma ‘ua la lē toe mafai ‘ona iloa atu o ia.
22 ‘Ona la fa‘apa‘u‘ū ai lea i itūlā e tolu, o vivi‘i atu i le Atua; ‘ona toe tula‘i ai lea ma ‘ua la fa‘ailoa atu o ana vāvega uma lava.