1 O lenei, ‘ua manatu Topita o le a fa‘afofogaina lana tatalo ‘ia mafai ‘ona oti o ia; ‘ona vala‘au atu ai lea i lona atali‘i o Tovia,
2 ma ‘ua fa‘apea atu: ‘Ia e fa‘alogo, lo‘u atali‘i e, i ‘upu a lo‘u gutu, ‘ia e atiina a‘e ia i lou loto e pei o se fa‘avae.
3 A talia e le Atua lo‘u agaga, ‘ia e tanu i lo‘u tino; ‘ia e fa‘aaloalo i lou tinā i aso uma o lona ola;
4 auā e tatau ‘ona e manatua o puapuagā e tele ma le faigatā na tigāina ai o ia ‘ona ‘ua i ai oe i lona manava.
5 A o‘o fo‘i ‘ina ‘atoa aso o lona ola, ‘ia e teu fo‘i o ia i o‘u tafatafa.
6 A ‘ia e mata‘u ai i le Atua, i aso uma lava o lou ola, ‘ia oe fo‘i ne‘i e loto i se aso i le agasala, o soli poloa‘iga a le Ali‘i lo tatou Atua.
7 ‘Ia e foa‘i ni mea alofa a‘i au ‘oloa, ‘aua fo‘i ‘e te liliu ‘ese ou mata i se tasi o ē matitiva; auā o le ala lea e lē liliu ‘ese ai fo‘i ‘iā te oe o fofoga o le Ali‘i.
8 ‘Ia e agaalofa e tusa ma mea ‘ua e mafaia.
9 A tele ni au mea, ‘iā tele fo‘i mea ‘e te foa‘i; a itiiti ni au mea, ‘ia taumafai fo‘i ‘ona foa‘i ma le fiafia sina mea itiiti.
10 Auā ‘e te fa‘aputu ai mo oe o se taui lelei mo aso o le puapuagā.
11 Auā o le fai o mea alofa e lavea‘iina ai le tagata a‘i agasala uma ‘atoa ma le oti, e lē tu‘uina ai fo‘i lona agaga e alu i le pogisā.
12 O le fai o mea alofa o le fa‘atuatuaga tele lava lea i luma o le Atua silisili ‘ese mo i latou uma latou te faia.
13 ‘Ia oe, lo‘u atali‘i e, ma amio ‘ele‘elea uma lava, ‘aua fo‘i ne‘i i ai se tasi, e ‘ese i lou to‘alua, ‘e te mana‘o e fai ai se amio e lē tusa.
14 ‘Aua ‘e te tu‘u i le fa‘amaualuga le pule i lou mafaufau po o au ‘upu; auā o le fa‘amaualuga na mafua ai o malaia uma lava.
15 ‘Ai se tasi ‘ua ia galue mo oe, ‘ia e tu‘u atu loa ‘iā te ia lona taui, ‘ia oe fo‘i ne‘i e tu‘u pea lava ‘iā te oe le taui o lou tagata faigaluega.
16 O le mea ‘e te musu ai pe ana faia ‘iā te oe e se tasi, ‘ia oe ne‘i e faia lava lea mea i se tasi.
17 ‘Ia e ‘ai lau mea e ‘ai fa‘atasi ma ē matitiva, ‘ia e fa‘a‘ofu fo‘i i ou ‘ofu o ē lē lavalavā.
18 ‘Ia e tautu‘u lau areto ma lau uaina i le fa‘amamalu i le falelauasiga o ē amiotonu, ‘ae ‘aua ‘e te ‘ai pe inu ai fa‘atasi ma ē amio leaga.
19 ‘Ia e sā‘ili pea le fa‘atonuga i le tagata poto.
20 ‘Ia e fa‘amanū pea lava i le Atua; ‘ia e fa‘atoga atu ai fo‘i ‘ia ta‘ita‘iina oe e ia i ou ala, ‘ia i‘u lelei fo‘i ‘iā te ia o au filifiliga uma.
21 ‘Ou te fa‘aali atu fo‘i ‘iā te oe, lo‘u atali‘i e, na ‘ou tu‘u atu o taleni ario e sefulu, i aso a o tamameamea lava oe, ‘iā Kapaelu, i Rakai, o le ‘a‘ai o tagata Metai; ‘ua ‘iā te a‘u fo‘i le fa‘amaoni ‘ua na tusia ai.
22 O lenei ‘ia e sā‘ilia sou ala ‘e te o‘o atu ai ‘iā te ia, ‘e te tali mai fo‘i ‘iā te ia o le fasi tupe na se‘i ‘ou ta‘u atua ma fa‘afo‘i atu ‘iā te ia lana tusi fa‘amaoni.
23 ‘Aua lava ‘e te fefe, lo‘u atali‘i e; e mo‘i ‘ua tatou ola fa‘atagata matitiva, ‘ae tele ‘oloa tatou te maua mai, pe ‘āfai ‘ua tatou matata‘u i le Atua, ‘alo ‘ese fo‘i i agasala uma lava ma fai amioga lelei.#