1 ‘Ona tali mai lea o Tovia i lona tamā, ‘ua ia fa‘apea mai: Lo‘u tamā e, ‘ou te faia mea uma lava na e poloa‘i mai ai ‘iā te a‘u,
2 a ‘ou te lē iloa pe fa‘apefea ‘ona ‘ou maua mai o lenā tupe. E lē iloa o a‘u e lea tagata, ‘ou te lē iloa fo‘i o ia; se a se fa‘ailoga a ‘ou tu‘u atu ‘iā te ia? ‘Ou te le‘i āu iloa fo‘i le ala e o‘o atu ai i lea nu‘u.
3 ‘Ona tali atu lea ‘iā te ia e lona tamā, ‘ua fa‘apea atu: O lo‘o ‘iā te a‘u lava lana tusi fa‘amaoni; ‘ae fa‘aali atu ‘iā te ia, ‘ona toe fa‘aola mai loa lea le tupe.
4 A ‘ia e alu nei ma e sā‘ilia se tagata fa‘amaoni, ‘e te tu‘u atu i ai se totogi lua te malaga ma oe, ‘ina ‘ia e tali ai lea tupe, manū ‘ua ola pea a‘u.
5 ‘Ona ulufafo lea o Tovia, ‘ua na maua le taule‘ale‘a ‘aulelei, o tu lava ia o fusi ona ‘ofu, ‘ua fa‘apei o sē ‘ua nofo sauni e malaga.
6 ‘Ua na lē iloa fo‘i o le agelu lea a le Atua ma ‘ua ofo alofa atu ‘iā te ia o fa‘apea atu: Le taule‘ale‘a lelei e, po o se fea ‘ea oe?
7 A ‘ua tali mai o ia: O so le fānauga a Isaraelu o a‘u nei. Ma ‘ua fai atu o Tovia ‘iā te ia: Po ‘ua e iloa ‘ea le ala e tau atu i le nu‘u o tagata Metai?
8 A ‘ua tali mai o ia: ‘Ua ‘ou iloa, i le ‘ua ‘ou savali so‘o i ala uma o lea nu‘u; na ‘ou nofo fo‘i i le ‘āiga o Kapaelu, lo tatou uso, lē nofo i Rakai, o le ‘a‘ai o tagata Metai o lo‘o tu i mauga o Epatana.
9 ‘Ua fa‘apea atu a Tovia ‘iā te ia: ‘Ou te ole atu, ‘ia e fa‘atali mai se‘ia ‘ou tala atu o mea lava ia i lo‘u tamā.
10 ‘Ona ulufale mai lea o Tovia, ‘ua ta‘u mai i lona tamā o mea uma ia; ‘ua ofo ai lava lona tamā ma ‘ua tagi atu ‘ia ulufale mai le taule‘ale‘a ‘iā te ia.
11 ‘Ona ulufale ai lea ma ofo alofa mai ‘iā te ia o fa‘apea mai: ‘Ia tumau pea ‘iā te oe le fiafia!
12 I lo ‘ua fa‘apea atu a Topita: Se a se fiafia a ‘iā te a‘u nei ‘ua ‘ou nofo i le pogisā ma ‘ua ‘ou lē iloa atu le malamalama o le lagi?
13 ‘Ua fai mai le taule‘ale‘a ‘iā te ia: ‘Ia e loto malosi; auā ‘ua lata le itū aso e fa‘amālōlōina ai oe e le Atua.
14 ‘Ona fai atu ai lea o Topita: Pe ‘e te mafaia ‘ona ta‘ita‘iina lo‘u atali‘i ‘iā Kapaelu i Rakai le ‘a‘ai o tagata Metai? ‘Ae toe fo‘i mai ‘ona ‘ou tu‘u atu lea ‘iā te oe lou totogi.
15 ‘Ua fai mai fo‘i le agelu ‘iā te ia: ‘Ou te ta‘ita‘iina atu o ia, ‘ou te toe ta‘ita‘iina mai fo‘i o ia ‘iā te oe.
16 ‘Ua tali atu o Topita ‘iā te ia: ‘Ou te ole atu, ‘ia e fa‘aali mai ‘iā te a‘u le igoa o lou ‘āiga po o lou itū‘āiga.
17 ‘Ua tali mai le agelu o Refaelu ‘iā te ia: Po ‘ua e sā‘ili ‘ea i le ‘āiga o lou tagata faitaui, po o le tagata faitaui lava ‘ia la te ō ma lo‘u atali‘i?
18 ‘Ae ui i lea, ‘ina ne‘i e popole ‘ona o a‘u, o a‘u nei o Asaraia, le atali‘i o Anania le sili.
19 Ma ‘ua tali atu o Topita: E mamalu lava lou ‘āiga. ‘Ae ‘ou te ole atu, ‘aua ne‘i e ita ‘ona ‘ua ‘ou fia iloa lou tupu‘aga.
20 A ‘ua fai mai le agelu ‘iā te ia: ‘Ou te ta‘ita‘i i lou atali‘i ma le saogalemū, ‘ou te toe ta‘ita‘iina mai fo‘i o ia ‘iā te oe ma le saogalemū.
21 A ‘ua tali atu o Topita ‘ua fa‘apea atu: ‘Ia manuia la ‘oulua malaga, ‘ia i ai le Atua i lo ‘oulua ala, ‘ia malaga lana agelu fa‘atasi ma ‘oulua.
22 ‘Ua tapena o mea uma a ‘ave i le malaga, ‘ona fa‘atofā ai lea o Tovia i lona tamā ma lona tinā, ‘ona ō fa‘atasi lea i lā‘ua.
23 A ‘ua te‘a i lā‘ua, ‘ona amata ai lea ‘ona tagi o lona tinā, ‘ua fa‘apea ane: ‘Ua e ‘avea le to‘oto‘o o aso a matutua ai i tā‘ua, ‘ua e fa‘ate‘a ‘esea ‘iā i tā‘ua.
24 Peane ‘ua leai lava lenā tupe na e ‘auina atu ai o ia!
25 Auā sa lava ‘iā i tā‘ua lo tā mativa, sa ‘avea ai ma ‘oloa tele ‘iā i tā‘ua le va‘ava‘ai i la tā‘ua tama.
26 I lo ‘ua fai atu o Topita ‘iā te ia: ‘Aua ne‘i e tagi! e saogalemū lava le malaga a la tā tama, e saogalemū ma lona toe fo‘i mai ‘iā te i tā‘ua, o le a va‘ai lava o ou mata ‘iā te ia.
27 Auā ‘ua ‘ou mautinoa, o lo‘o malaga fa‘atasi ma ia le agelu lelei a le Atua, na te fa‘atatau lelei mea uma e uiga ‘iā te ia, ‘ina ‘ia toe fo‘i mai o ia ma le fiafia ‘iā te i tā‘ua.
28 ‘Ua fa‘alogo i lea ‘upu, ‘ona tu‘u lea le tagi a lona tinā ma ‘ua fa‘alologo.