4 ‘Ua ia loto ‘ia la muamua atu, ‘ona fai atu lea o Refaelu ‘iā Tovia: ‘Ia alu ma oe le au o le i‘a, auā o le mea aogā lava. ‘Ona tago lea o Tovia i le au o le i‘a ma ‘ua la ō.
5 A o Ana sa nofo i aso ta‘itasi uma i tala ane o le auala, i le tumutumu o le tasi mauga, sa mafai ‘ona ia iloa mamao atu ai.
6 Sa mafai i lea mea ‘ona tau ‘i‘ite i lona sau, ‘ona iloa mamao atu lea, ‘ua na iloa loa o lana tama o lo‘o sau; ‘ona momo‘e atu lea ma tala‘i atu i lana tane o fa‘apea atu: O lou atali‘i lea o lo‘o sau.
7 Ma ‘ua fai atu o Refaelu ‘iā Tovia: A e ulu atu loa i lo ‘outou fale, ‘ia e ifo atu ai i le Ali‘i lou Atua; ‘e te fa‘afetai atu fo‘i ‘iā te ia ma e fa‘alatalata atu i lou tamā ma sogi ‘iā te ia.
8 ‘Ona e nini lea o ona mata i le au o le i‘a ‘ua ‘iā te oe; auā ‘ia e iloa lava e lē pine ‘ona fa‘apupulaina ona mata, ‘ona iloa atu lea e lou tamā le malamalama o le lagi, e ‘oli‘oli fo‘i o ia i le va‘ai atu ‘iā te oe.
9 ‘Ona tamo‘e muamua mai ai lea o le ta‘ifau nā i le malaga ma latou ma ‘ua sau e pei o se savali, o fa‘aali lona fiafia i le tafuefue o lona i‘u.
10 ‘Ona tula‘i lea o lona tamā tauaso, ‘ua amata ‘ona momo‘e, ‘ae tu‘ia ai lona vae; ‘ona u‘u lea i le lima o le tasi ‘au‘auna ma ‘ua alu e fa‘afetaia‘i i lona atali‘i.