7 O le aso lava lea na o‘o ai fo‘i ‘ina fa‘alogo e Sara, le afafine o Rakuelu, i Rakai, o le ‘a‘ai lea o tagata Metai, i ‘upu tauemu a le tasi ‘au‘auna fafine a lona tamā.
8 Auā na fa‘amauina ia i tane e to‘afitu, a o le tasi temoni, ‘ua igoa ‘iā Asemoteu, ‘ua na fasia i latou i lo latou fa‘ato‘ā ō atu ‘iā te ia.
9 ‘Ua a‘oa‘i atu o Sara i le teine i sona sesē, ‘ona tali mai lea o fa‘apea mai: ‘Aua ne‘i matou iloa lava o sau tama tane po o sau tama fafine i le lalolagi, o oe lē fasioti i au tane!
10 Pe ‘e te fia fasioti fo‘i ‘iā te a‘u e pei ‘ona e fasiotia au tane e to‘afitu! ‘Ua fa‘alogo i lea ‘upu, ‘ona ulu atu lea o ia i le potu i luga o lona fale, ‘ua lē ‘ai pe inu lava o ia i ao e tolu ma po e tolu.
11 ‘Ae tausisi lava o ia i le tatalo, o ‘ai‘oi atu ma loimata i le Atua ‘ia lavea‘i ‘iā te ia a‘i lenei māsiasi.
12 A o lona tolu o aso, ‘ua na fa‘auma lana tatalo, o fa‘amanū atu i le Ali‘i, o fa‘apea ane:
13 ‘Ua fa‘amanūina lou suafa, le Atua o o matou tua‘ā,‘ua e alofa pe a mavae o lou to‘asā.‘Ua e fa‘amāgalo fo‘i i agasala a i latoue vala‘au atu ‘iā te oe i ona po o le puapuagā.