1 Pastaj, i shtyrë nga Shpirti i Shenjtë, Jezui shkoi në shkretëtirë që të tundohej nga djalli.
2 Pasi agjëroi për dyzet ditë dhe dyzet net, Jezuin e mori uria.
3 Atëherë erdhi tunduesi tek ai e i tha: «Nëse je Biri i Perëndisë, thuaju këtyre gurëve të bëhen bukë».
4 Por Jezui iu përgjigj: «Shkrimi i shenjtë thotë: Njeriu nuk jeton vetëm me bukë, por me çdo fjalë që del nga goja e Perëndisë».
5 Pastaj djalli e çoi në qytetin e shenjtë, e vuri në pikën më të lartë të tempullit
6 dhe i tha: «Nëse je Biri i Perëndisë, hidhu poshtë, sepse Shkrimi i shenjtë thotë: Do t’i urdhërojë engjëjt e tij të të ruajnë dhe ata do të të mbajnë në duart e tyre, që mos të të ndeshë këmba në gur».
7 Jezui i tha: «Shkrimi i shenjtë thotë edhe: Mos e tundo Zotin, Perëndinë tënd».
8 Djalli e çoi sërish në një mal shumë të lartë e i tregoi të gjitha mbretëritë e botës dhe lavdinë e tyre.
9 Dhe i tha Jezuit: «Do të t’i jap të gjitha këto nëse bie në gjunjë dhe më adhuron».
10 Atëherë Jezui i tha: «Largohu, Satan, sepse Shkrimi i shenjtë thotë: Adhuro Zotin, Perëndinë tënd dhe shërbeji vetëm atij».
11 Atëherë djalli u largua nga Jezui dhe, ja, erdhën engjëjt dhe i shërbenin.
12 Kur Jezui dëgjoi se Gjonin e kishin burgosur, u largua për në Galile.
13 Nuk qëndroi në Nazaret, por shkoi për të jetuar në Kafarnaum, qytet pranë liqenit, në tokën e Zabulonit e të Neftalimit,
14 që të përmbushej çfarë kishte thënë profeti Isaia:
15 Tokë e Zabulonit dhe tokë e Neftalimit, në rrugën drejt detit, përtej Jordanit, Galile e paganëve!
16 Populli që ishte në errësirë pa një dritë të madhe dhe për ata që ishin në vendin e hijes së vdekjes zbardhi drita.
17 Që atëherë Jezui filloi të predikonte e të thoshte: «Pendohuni, se mbretëria e qiejve është afër».
18 Ndërsa po ecte bregut të Liqenit të Galilesë, Jezui pa dy vëllezër, Simonin që quhej Pjetër dhe Andrean, vëllain e tij, që po hidhnin rrjetat në liqen. Ata ishin peshkatarë.
19 Jezui u tha: «Ejani pas meje dhe unë do t’ju bëj peshkatarë njerëzish».
20 Ata lanë menjëherë rrjetat dhe shkuan pas tij.
21 Pak më tutje Jezui pa dy vëllezër të tjerë, Jakobin, birin e Zebedeut dhe Gjonin, vëllain e tij, që ishin në një varkë bashkë me Zebedeun, atin e tyre, duke qepur rrjetat dhe i thirri.
22 Ata lanë menjëherë varkën dhe atin e tyre dhe shkuan pas tij.
23 Jezui shkonte nëpër Galile duke mësuar njerëzit në sinagoga, duke shpallur ungjillin e mbretërisë dhe duke shëruar çdo sëmundje e lëngatë në popull.
24 Kështu për të u hap fjala në gjithë Sirinë. Atëherë i sollën gjithë të sëmurët, njerëz të prekur nga sëmundje dhe dhimbje të ndryshme, të pushtuar nga djalli, epileptikë dhe të paralizuar, dhe ai i shëroi.
25 Turma të mëdha njerëzish nga Galileja e Dekapoja, nga Jerusalemi, Judeja e përtej Jordanit shkonin pas tij.