1 Salomone, mora Davida, a tiisetswa boreneng ba hae, mme Jehova Modimo wa hae, a nna a ba le yena, a mo phahamisa haholo.
2 Salomone a bua le Baiseraele bohle, le balaodi ba dikete le ba makgolo le baahlodi, le babusisi le mahosana a Baiseraele bohle, le dihlooho tsa matlo a bontata bona.
3 Salomone, yena le phutheho yohle, ba ya nqalong e phahameng e Gibeone, moo tente ya pokano ya Modimo e neng e le teng, e neng e entswe ke Moshe, mohlanka wa Jehova, nahathothe.
4 Areka ya Modimo yona, Davida o ne a e latile Kiryathe-Jearime, a e tlisa moo a neng a e lokiseditse tulo; hobane o ne a e hlometse tente Jerusalema.
5 Haele aletare ya koporo e neng e entswe ke Betsaleele, mora Uri, mora Hure, le yona e ne e beilwe pela tabernakele ya Jehova. Salomone le phutheho ba batla Jehova.
6 Mme Salomone a nyolohela teng, pontsheng ya Jehova, aletareng ya koporo e leng pela tente ya pokano, a hlahisa ditjheso tse sekete teng.
7 Bosiung boo, Modimo wa iponahatsa ho Salomone, wa re ho yena: Kopa seo ke tla o nea sona.
8 Salomone a re ho Modimo: O etseditse ntate Davida ka lereko le leholo, o bile o mpeile morena tulong tsa hae.
9 Jwale, Jehova Modimo, a ho ke ho phethehe pallo ya hao, eo o neng o e bolelle ntate Davida; hobane o mpeile morena wa setjhaba se sengata jwaloka lerole la lefatshe.
10 Jwale ako nnee bohlale le kelello, ke tle ke tsebe ho tswa le ho boya pontsheng ya setjhaba sena; hobane ana ke mang ya ka ahlolelang tjhaba sena sa hao se sekakale?
11 Modimo wa re ho Salomone: Erekaha o hopotse jwalo pelong ya hao, o sa ka wa kopa lefumo, leha e le menono, kapa botumo, leha e le ho shwa ha dira tsa hao, o sa ka wa ikopela leha e le matsatsi a mangata, wa mpa wa ikopela bohlale le kelello, hore o tle o tsebe ho ahlolela setjhaba sa ka seo ke o beileng morena wa sona,
12 ka baka leo, o se o neilwe bohlale le kelello; ke o neile le lefumo, le menono, le botumo boo le pele ho esong ho be morena ya bileng le bona, le morao ho ke keng ha hlaha le a mong ya tla ba le bo bokalo.
13 Yaba Salomone o tloha nqalong e phahameng e Gibeone, tenteng ya pokano, a kgutlela Jerusalema, mme a busa Iseraeleng.
14 Salomone a ipokellela makoloi le bakalli; makoloi a hae a eba sekete se nang le makgolo a mane, bakalli ba eba kete tse leshome le metso e mmedi; mme a ba bea metseng ya makoloi le moreneng, Jerusalema.
15 Morena a etsa hore silefera le kgauta di tshwane le majwe Jerusalema, le dikedare hore li tshwane le disikomora tse dithoteng, ka bongata ba tsona.
16 Haele dipere tsa Salomone, di ne di latwa Egepeta; mehlape ya tsona e ne e latwa ke bahwebi ba morena, mohlape o mong le o mong hodimo theko e beilweng.
17 Haele makoloi a latwang Egepeta, e nngwe le e nngwe e ne e rekwa ka dishekele tse makgolo a tsheletseng tsa silefera, pere yona e rekwa ka tse lekgolo le nang le mashome a mahlano. Ba ne ba tlisetsa le marena wohle a Bahethe le marena a Siria.