1 Josafate, morena wa Juda, a kgutlela hae Jerusalema ka kgotso.
2 Jehu, mora Hanani, seboni, a ya mo kgahlanyetsa, a re ho morena Josafate: Na ke tshwanelo hore o thuse e mobe, mme o rate ba hloileng Jehova na? Jehova o o halefetse ka baka la tseo.
3 Leha ho le jwalo, ho kile ha fumanwa ntho tse ntle ho wena, tsa kamoo o fedisitseng diashera kateng lefatsheng, le kamoo o sekamisitseng pelo ya hao kateng hore e batle Modimo.
4 Josafate a dula Jerusalema; a boela a tswa, a ya le setjhaba, ho tloha Beerseba ho ya kgutla thabeng ya Efraime, mme a sokollela batho ho Jehova, Modimo wa bontata bona.
5 A bea baahlodi naheng ya Juda, metseng yohle ya yona ya diqhobosheane, motseng o mong le o mong.
6 A re ho baahlodi: Bonang, seo le se etsang: hobane ha le na ho ahlolela motho, empa e le Jehova; o tla ba le lona tabeng tsohle tseo le tla di ahlola.
7 Le ke le tshabe Jehova ho qala jwale, le etse ka kelello, hobane Jehova, Modimo wa rona, ha a na bokgopo, ha a ye ka tshobotsi ya batho, mme ha a amohele dimpho.
8 Eitse hobane ho kgutlelwe Jerusalema, Josafate a boela a bea Balevi Jerusalema le baprista le dihlooho tsa matlo a bontata Baiseraele, ho tshwara dikahlolo tsa Jehova le dinyewe.
9 A ba laela, a re: Le ke le etse ka botshepehi le ka pelo e phethehileng, le ntse le tshaba Jehova.
10 Haele nyewe e nngwe le e nngwe e tla tliswa ho lona ke banababo lona ba ahileng metseng ya bona, bakeng sa polao, leha e le bakeng sa molao le taelo, le sa dikomelo le dikahlolo, le tla ba eletsa hore ba se ke ba eba le molato ho Jehova, le se ke la halefelwa hammoho le banababo lona. Le etse jwalo, le tle le hloke molato.
11 Bonang, Amaria, moprista e moholo, e tla ba yena hlooho ya lona tabeng tsohle tsa Jehova; Sebadia, mora Ishmaele, hlooho ya ntlo ya Juda, yena e tla ba hlooho ya lona ditabeng tsohle tsa morena; hape Balevi e tla ba bahlahlobi pela lona. Ipheng matla, le etse, mme Jehova a be le motho ya etsang hantle.