1 Joase o ne a le dilemo tse supileng ha a qala ho busa, mme a busa ka dilemo tse mashome a mane Jerusalema; lebitso la mmae e ne e le Tsibia wa Beerseba.
2 Joase a nna a etsa tse lokileng pela mahlo a Jehova ka ditshiu tsohle tsa moprista Jehojada.
3 Jehojada a mo nkela basadi ba babedi, mme a tswala bara le baradi.
4 Kamora tseo, Joase a hlahelwa ke kgopolo ya ho lokisa ntlo ya Jehova.
5 Yaba o phutha baprista le Balevi, a re ho bona: Tswelang metseng ya Juda, mme le bokelle ditjhelete naheng yohle ya Iseraele, hore ka tsona ho lokiswe ntlo ya Modimo wa lona ka selemo se seng le se seng. Phakisang ho etsa taba eo. Empa Balevi ba se ke ba phakisa.
6 Yaba morena o bitsa Jehojada, moprista e moholo, a re ho yena: Na ha o a ka wa bona keng hore Balevi ba late Juda le Jerusalema lekgetho le laetsweng ke Moshe, mohlanka wa Jehova, le beetsweng phutheho ya Iseraele, hore le ntshetswe tente ya bopaki na?
7 Hobane monyefodi eo, Athalia, le bara ba hae, ba ne ba sohlokile ntlo ya Modimo; esita le mesebetsi e halalelang ya ntlo ya Jehova ba ne ba e nkile ho sebeletsa boBaale ka yona.
8 Yaba morena o laela hore ho etswe letlole, mme le bewe kantle, pela monyako wa ntlo ya Jehova.
9 Ha tumiswa naheng ya Juda le Jerusalema hore ho tliswe ho Jehova lekgetho leo Moshe, mohlanka wa Modimo, a neng a le beetse Iseraele a sa le nahathothe.
10 Mahosana wohle le setjhaba sohle ba thaba; ba tlisa, mme ba nokela ditjhelete letloleng, ba ba ba qetella ho ntsha.
11 Enereha e le nako ya ho tlisa letlole ho bahlahlobi ba morena ka matsoho a Balevi, ha ba ne ba bona hoba ditjhelete di ngata, mongodi wa morena le tona ya moprista e moholo ba ne ba fihla, ba tsholla letlole, ba ntoo le kgutlisetsa tulong tsa lona; ba ne ba etsa jwalo ka tsatsi le leng le le leng, mme ka mokgwa oo ba bokella tjhelete tse ngata.
12 Morena le Jehojada ba ne ba di nea ba tshwereng mosebetsi wa ntlo ya Jehova; mme bona ba ne ba thola dibetli tsa majwe le tsa difate, ho lokisa ntlo ya Jehova, le malala a tshepe le a koporo, ho lokisa ntlo ya Jehova.
13 Ba tshwereng mosebetsi ba nna ba sebetsa, mme ka bona mosebetsi wa nna wa tswela pele; ba lokisa ntlo ya Modimo ka mokgwa wa teng, mme ba e tiisa.
14 Eitse hobane ba qetelle, ba tlisetsa morena le Jehojada tjhelete tse setseng; ka tsona ha etswa mesebetsi ya ntlo ya Jehova, e leng mesebetsi ya tshebeletso le ya ho hlaba ditjheso, le mehope, le e meng mesebetsi ya kgauta le ya silefera. Mme ha nna ha hlajwa ditjheso ka tlung ya Jehova, ka tshiu tsohle tsa Jehojada.
15 Empa Jehojada a tsofala, a tlala matsatsi, a ba a shwa; o ne a le dilemo tse lekgolo le mashome a mararo mohla a shwang.
16 A patwa tlung ya Davida hara marena; hobane a ne a etseditse Iseraele le Modimo le ntlo ya wona molemo.
17 Eitse hobane Jehojada a shwe, mahosana a Juda a tla, a kgumama pela morena; mme morena a a mamela.
18 Yaba ba furalla ntlo ya Jehova, Modimo wa bontata bona, ba sebeletsa diashera le ditshwantsho; mme Jehova a halefela Juda le Jerusalema, kahobane ba ikentse molato kahoo.
19 Jehova a romela ho bona, ho ba sokollela ho yena, baporofeta ba ba pakelang tsa Jehova, ba mpa ba se ke ba ba mamela.
20 Yaba moya wa Modimo o tshwara Sakaria, mora moprista Jehojada; a ema pela setjhaba, a re ho sona: Ho thwe ke Modimo: Le tlolelang melao ya Jehova? Ha le ka ke la atleha. Erekaha le furaletse Jehova, le yena o tla le furalla.
21 Empa ba mo rera, mme ba mo tlepetsa ka majwe lebaleng la ntlo ya Jehova, ka taelo ya morena.
22 Morena Joase ha a ka a elellwa molemo oo Jehojada, ntata Sakaria, a neng a mo etseditse wona; a bolaya mora wa hae; mme eo, ho shweng ha hae, a re: Jehova a ke a bone, mme a ahlole!
23 Eitse hobane selemo se fele, sera sa Basiria sa futuhela Joase, sa ba sa fihla Juda le Jerusalema; ba timetsa hara setjhaba mahosana wohle a setjhaba, mme ba romela kgapo yohle ya bona ho morena wa Damaseka.
24 Leha sera sa Siria se ne se tlile e le sa batho ba seng bakae, leha ho le jwalo, Jehova a neela sera se seholo haholo matsohong a sona, kahobane Bajuda ba ne ba furaletse Jehova, Modimo wa bontata bona; ha ho le jwalo, Basiria ba phetha dikahlolo hodima Joase.
25 Eitse hobane ba tlohe ho yena, ba mo siile bohlokong bo boholo, bahlanka ba hae ba mo fetohela ka baka la madi a bara ba moprista Jehojada; yaba ba mmolaela diphateng tsa hae, a shwa. A patwa motseng wa Davida, ba mpa ba se ke ba mo pata mabitleng a marena.
26 Ba mo fetohetseng jwalo e ne e le Sabade, mora Shimeathe, mosadi wa Moammone, le Josabade, mora Shimrithe, mosadi wa Momoabe.
27 Haele ditaba tsa bara ba hae le tse ngata tse porofetilweng hodima hae, le tokiso ya ntlo ya Modimo, bonang, taba tseo di ngodilwe dihlalosong tsa buka ya marena. Mme Amatsia, mora hae, ya eba morena tulong tsa hae.