1 Roboame eitse hobane a fihle Jerusalema, a phutha ntlo ya Juda le Benjamine, ya eba banna ba dikete tse lekgolo le mashome a robileng meno e le mmedi, banna ba lokelang ho lwana, a tle a futuhele Iseraele, hore mmuso kaofela o busetswe ho Roboame.
2 Empa lentswe la Jehova la tlela Shemaia, monna wa Modimo, la re:
3 Bolella Roboame, mora Salomone, morena wa Juda, le Baiseraele bohle ba naheng ya Juda le Benjamine, o re:
4 Jehova o re: Se nyoloheng, se futuheleng banababo lona. Ikgutlelleng e mong le e mong tlung ya hae, hobane taba eo ke ka nna e etsahetseng. Ba mamela lentswe le Jehova, ba kgutlela hae, ba tlohela ho futuhela Jeroboame.
5 Roboame a nna a dula Jerusalema; a haha metse ya diqhobosheane Juda.
6 A haha Bethlehema, Ethame, le Tekowa,
7 Bethe-Tsure, Soko, le Adullame,
8 Gathe, Maresha, le Sife,
9 Adoraime, Lakishe, le Aseka;
10 Tsorea, Ajalone, le Hebrone, metse ya Juda le Benjamine, a e esa metse ya diqhobosheane.
11 A e haha ka thata, a bea balaodi ho yona, le mediko ya dijo, ya ole le ya veine;
12 mme motseng o mong le o mong a bea dithebe le marumo; a etsa metse e thata haholoholo. Haele Juda le Benjamine, e ne e le ba hae.
13 Haele baprista le Balevi ba neng ba le kahohle Iseraeleng, ba tloha naheng tsa bona, ba phuthehela ho yena.
14 Balevi ba fela ba tlohela meraka ya bona le maruo a bona, ba tla Juda le Jerusalema kahobane Jeroboame le bara ba hae ba ne ba ba furaletse, ba tle ba se ke ba phetha mosebetsi wa baprista ba Jehova;
15 o ne a ikgethetse baprista ba dinqalo tse diphahameng ho hlabela diphooko le manamane ao a neng a a entse.
16 Ba latelwa ke ba meloko yohle ya Iseraele ba batlang Jehova, Modimo wa Iseraele, ka pelo yohle ya bona, ba bileng ba tla Jerusalema ho hlabela Jehova, Modimo wa bontata bona.
17 Ba tiisa mmuso wa Juda jwalo, mme ba natlafatsa Roboame, mora Salomone, ka lemo tse tharo; hobane ba fela ba tsamaya mehlaleng ya Davida le Salomone ka dilemo tse tharo.
18 Roboame a inkela mosadi: ke Mahalathe, moradi wa Jerimothe, mora Davida le Abihaile, moradi wa Eliabe, mora Jese.
19 A mo tswalla bara, Jeushe le Shemaria le Sahame.
20 A ntoo nka Maaka, moradi wa Absalome; eo a mo tswalla Abija, Attai, Sisa le Shelomithe.
21 Roboame a rata Maaka, moradi wa Absalome, ho ena le basadi ba hae ba bang kaofela le direthe tsa hae; athe o ne a nkile basadi ba leshome le metso e robileng meno e le mmedi le direthe tse mashome a tsheletseng, mme a tswala bara ba mashome a mabedi a metso e robileng meno e le mmedi le baradi ba mashome a tsheletseng.
22 Roboame a bea Abija, mora Maaka, ya kapele ho ba bang, hore e tle e be hlooho ya banababo; hobane o ne a rata ho mo etsa morena.
23 A nna a etsa ka kelello, a qhalanyetsa bara ba hae bohle dinaheng tsohle tsa Juda le Benjamine, metseng yohle ya diqhobosheane, a ba nea dijo tse ngata, mme a ba batlela basadi ba bangata.