1 Mofumahadi wa Sheba eitse ha a utlwa botumo ba Salomone, a tla Jerusalema, ho leka Salomone ka dilotho, a ena le letshwele le leholo haholo le dikamele tse bofileng dibano le kgauta e ngata le mahakwe a bohlokwa. A fihla ho Salomone, mme a mmehela tsohle tseo a di hopotseng pelong ya hae.
2 Salomone a mo araba dipotsong tsa hae tshole, ho se ke ha eba taba le e nngwe e hlolang Salomone, kapa eo a sa kang a mo hlalosetsa yona.
3 Eitse hobane mofumahadi wa Sheba a bone bohlale ba Salomone, le ntlo eo a e hahileng,
4 le dijo tsa tafole ya hae, le ditulo tsa bahlanka ba hae, le dikabelo tsa tsebeletso ya bahlanka ba hae, le diaparo tsa bona, le baqhatsetsi ba hae le diaparo tsa bona, le methatinyana ya hae eo ho neng ho nyolohelwa tlung ya Jehova ka yona, a shwa pelo,
5 mme a re ho morena: Seo ke neng ke se utlwile naheng ya ka sa diketso tsa hao le bohlale ba hao e ne e le nnete.
6 Empa ha ke a ka ka dumela dipolelo tsa bona ho fihlela ke ba ke etla, ke bona ka mahlo a ka; mme bona, ke ne ke sa ka ka bolellwa le karolonyana ya boholo ba bohlale ba hao; tsa hao di fetisa botumo boo ke bo utlwileng.
7 Ba lehlohonolo, batho ba hao! Ba lehlohonolo, bahlanka bana ba hao, ba hlolang ba eme pela hao, ba utlwang bohlale ba hao!
8 A ho bokwe Jehova, Modimo wa hao, ya kgahlilweng ke wena hore a o bee teroneng, o be morena ho kgahlisa Jehova, Modimo wa hao. Modimo o o beile morena wa Baiseraele, ho ba etsa ka bokgabane le ho loka, kahobane o a ba rata, mme o rata hore o ba phedise ka ho sa feleng.
9 Yaba o nea morena ditalenta tse lekgolo le nang le mashome a mabedi tsa kgauta, le dibano tse ngatangata, le mahakwe a bohlokwa; ha ho a ka ha hlola ho bonwa le ka mohla o le mong dibano tse ka ka tseo mofumahadi wa Sheba a di neileng morena Salomone.
10 Bahlanka ba Hurame le bahlanka ba Salomone ba neng ba lata kgauta Ofire, ba tlisa le difate tsa almuge le mahakwe a bohlokwa.
11 Ka difate tsa almuge, morena a etsa methatinyana ya ho nyolohela tlung ya Jehova le tlung ya morena, le diharepa le diviole tsa dibini. Fate tse kalo di ne di eso ho bonwe le pele lefatsheng la Juda.
12 Morena Salomone yena a nea mofumahadi wa Sheba tsohle tseo a di lakaditseng, ho feta tseo a neng a di tliseditse morena. Yaba o a tloha, a kgutlela naheng ya hae le bahlanka ba hae.
13 Haele boima ba kgauta e neng e tlisetswa Salomone ka lemo se le seng, e ne e le ditalenta tsa kgauta tse makgolo a tsheletseng a mashome a tsheletseng a metso e tsheletseng;
14 ho sa balwe e tliswang ke bahwebi, kapa ke barekisi ba rekisang ka yona; le marena wohle a Arabia le babusisi ba naha ya hae ba ne ba tlisetsa Salomone kgauta le silefera.
15 Hape, morena Salomone a etsa mekoko e makgolo a mabedi ya kgauta e teilweng, mokoko o mong le o mong wa etswa ka dishekele tse makgolo a tsheletseng tsa kgauta e teilweng;
16 a etsa le dithebe tse makgolo a mararo tsa kgauta e teilweng, thebe e nngwe le e nngwe ya etswa ka dishekele tse makgolo a mararo tsa kgauta e teilweng; mme morena a di bea tlung ya Moru wa Lebanone.
17 A ntoo etsa terone e kgolo ya naka tsa ditlou, a e maneha ka kgauta e hlwekileng.
18 Terone e ne e na le methatinyana e tsheletseng le bonamelo ba maoto ba kgauta bo tshwaraneng le terone; e ne e na le matsoho ka nqa tse pedi ho setulo, le ditau tse pedi di ne di eme pela matsoho.
19 Hape, ho ne ho le ditau tse leshome le metso e mmedi tse emeng hona teng, methatinyaneng e tsheletseng, ka nqa tse pedi ho yona. Ha ho a ka ha etswa ntho e jwalo mmusong ofe le ofe.
20 Mehope yohle ya morena Salomone e ne e le ya kgauta, le dipitsa tsohle tsa ntlo ya Moru wa Lebanone e ne e le tsa kgauta e hlwekileng; haele silefera, ho ne ho sa thwe letho ka yona mehleng ya Salomone.
21 Hobane dikepe tsa morena di ne di ya Tarshishe le bahlanka ba Hurame, mme ha ho fetile dilemo tse tharo, kepe tsa Tarshishe di ne di fihla, di tlisa kgauta le silefera, le manaka a ditlou, le ditshwene, le dipikoke.
22 Morena Salomone a feta marena wohle a lefatshe jwalo ka moeno le ka bohlale.
23 Marena wohle a lefatshe a ne a etela Salomone ho tla mamela bohlale boo Modimo o bo kentseng pelong ya hae.
24 E mong le e mong o ne a tlisa nyehelo ya hae ya dipitsa tsa silefera le ya dipitsa tsa kgauta, le diaparo, le dihlomo, le dinoko, le dipere, le dimulete, ka selemo se seng le se seng.
25 Salomone o ne a na le dijelo tse dikete tse nne tsa dipere tsa makoloi, le bakalli ba kete tse leshome le metso e mmedi; o ne a ba beile metseng ya makoloi le moreneng, Jerusalema.
26 O ne a rena hodima marena wohle, ho tloha nokeng ya Eufrate, ho tla fihla naheng ya Bafilesta le ho isa moeding wa Egepeta.
27 Morena a etsa hore Jerusalema silefera e be jwaloka majwe, le dikedare di be jwaloka disikomora tse dithoteng, kamoo di neng di le ngata kateng.
28 Haele dipere tsa Salomone, di ne di ya latwa Egepeta le mafatsheng wohle a mang.
29 Haele taba tse ding tsa Salomone, tsa ho qala ho isa ho tsa ho qetella, ha ke re, di ngodilwe bukeng ya Nathane moporofeta, le ho ya boporofeta ba Akija wa Silo, le tshenolong ya seboni Iddo bakeng sa Jeroboame, mora Nebathe?
30 Salomone a busa Baiseraele ka dilemo tse mashome a mane, a le Jerusalema.
31 Salomone a orohela ho bontatae, a patwa motseng wa Davida ntatae; mme Roboame, mora hae, ya eba morena tulong tsa hae.