Numere

⁴⁵Ka mokgwa o jwalo, ho bara bohle ba Iseraele, ha ngolwa, ka matlo a bontata bona, banna bohle ba ka yang ntweng, ho qala ka ba dilemo tse mashome a mabedi ho isa ho ba fetang moo. ⁴⁶Ba ngotsweng bohle ya eba dikete tse makgolo a tsheletseng a metso a meraro, tse nang le makgolo a mahlano a nang le mashome a mahlano. ⁴⁷Haele Balevi, le leloko la bontata bona, ha ba ka ba baliwa hara ba ngotsweng. ⁴⁸Hobane Jehova a ne a boleletse Moshe, a re: ⁴⁹Feela, o se ke wa bala leloko la Levi, mme o se ke wa le ngolla hara bana ba Iseraele, ⁵⁰o mpe o bee Balevi balebedi ba tabernakele ya bopaki, le ba mesebetsi yohle ya yona. E tla ba bona ba tlang ho jara tabernakele le mesebetsi yohle ya yona; e tla ba bona ba tlang ho etsa tshebetso ya yona, mme ba tla teela tabernakele hare moo e hlongwang teng. ⁵¹Etlere ha tabernakele e tloha, Balevi ba e thakgolle, mme etlere ha tabernakele e ema, Balevi ba e hlome; empa moditjhaba ya e atamelang, o tla bolawa.