1 Jehova a bua le Moshe, a re:
2 Roma banna hore ba ye ho hlwela naha ya Kanana, eo ke e neang bana ba Iseraele. Le rome monna ka leloko le leng le le leng la bontata bona, mme bohle e be dihlooho hara bona.
3 Yaba Moshe, ba le lefeelleng la Parane, o ba roma ka taelo ya Jehova; banna bao kaofela e ne e le dihlooho hara bana ba Iseraele.
4 Ke ana mabitso a bona: Lelokong la Rubene, Shammua, mora Sakkure;
5 lelokong la Simeone, Shafathe, mora Hori;
6 lelokong la Juda, Kalebe, mora Jefunne;
7 lelokong la Issaskare, Jigale, mora Josefa;
8 lelokong la Efraime, Hosea, mora Nune;
9 lelokong la Benjamine, Palthi, mora Rafu;
10 lelokong la Sabulone, Gaddiele, mora Sodi;
11 lelokong la Josefa, e leng leloko la Manasse, Gaddi, mora Susi;
12 lelokong la Dane, Ammiele, mora Gemalli;
13 lelokong la Asere, Sethure, mora Mikaele;
14 lelokong la Nefthali, Nakbi, mora Vofsi;
15 lelokong la Gade, Geuele, mora Maki.
16 Ke ao mabitso a banna bao Moshe a ba romileng ho ya hlwela naha; mme Moshe a rea Hosea, mora Nune, lebitso la Joshua.
17 Moshe a ba roma ho ya hlwela naha ya Kanana, a re ho bona; Le kene ho yona ka nqa borwa, mme le hlwelle dithabeng,
18 mme le tla bona seo naha e leng sona, le bone hore na batho ba ahileng ho yona ba matla, kapa ba fokola; kapa ha ba bakae, kapa ba bangata;
19 le bone hore na naha eo ba ahileng ho yona e ntle, kapa e mpe; le bone hore na metse eo ba ahileng ho yona kapa ke diqhobosheane, kapa ke meqheme;
20 le mobu ke o jwang, kapa ke o nonneng, kapa ke o otileng; kapa difate di teng, kapa ha di yo. Ipheng matla, mme le nke ditholwana tse ding tsa naha eo. Mohlang oo, e ne e se e le nako ya dithakangwaha tsa morara.
21 Yaba ba ya, mme ba hlwela naha ho tloha lefeelleng la Tsine ho isa Rehobe, tseleng ya Hamathe.
22 Ba kena ka nqa borwa, ba fihla Hebrone, moo ho neng ho ahile bana ba Anake, boAkimane, Sheshai, le Talmai. Hebrone o ne a hahilwe dilemo tse supileng, motse wa Tsoane wa Egepeta, o eso ho be teng.
23 Ba tswela pele, ba ba ba fihla sekgutlong sa Eshkole; teng ba ekga lekala le nang le lesihla le le leng feela la morara, mme ba babedi ba le jara ka sefate; hape ba ekga digaranata le difeiye.
24 Sebaka seo sa rewa lebitso la Eshkole ka baka la lesihla la morara leo bana ba Iseraele ba neng ba le kge teng.
25 Ba kgutla ba tsamaile matsatsi a mashome a mane ba ntse ba hlwela naha eo.
26 Ba fihla, ba ya ho Moshe le Aarone, le ho phutheho yohle ya bana ba Iseraele lefeelleng la Parane, ka nqa Kadeshe, mme ba ba behela bona le phutheho yohle ditaba, ba ba bontsha ditholwana tsa naha.
27 Ba bolella Moshe, ba re: Re ile naheng eo o re rometseng ho yona; ruri, ke naha e kollang lebese le dinotshi; ke tsena ditholwana tsa teng.
28 Empa feela, batho ba ahileng naheng eo ke dinatla, mme metse ya teng e haheleditswe ka marako, mme e meholo haholo; esita le bana ba Anake re bile ra ba bona teng.
29 Baamaleke ba ahile ka nqa borwa; Bahethe, le Bajebuse, le Baamore ba ahile dithabeng; Bakanana bona, ba ahile pela lewatle le mabapa le Jordane.
30 Kalebe a kgutsisa setjhaba se neng se bua hampe ka Moshe, a re: Ha re nyoloheng, re hape naha eo, hobane ka sebele re tla hlola.
31 Empa banna ba neng ba ile le yena ba ne ba re: Ha ho kamoo re ka nyolohang ho ya lwantsha batho bao kateng, hobane ba re feta ka matla.
32 Ba nyefola hara bana ba Iseraele naha eo ba neng ba ile ho e lekola, ba re: Naha eo re e haotseng ho e hlwela ke naha e jang baahi ba yona; batho bohle bao re ba boneng teng, ke batho ba seemo se selelele;
33 re bone teng diqhobane, bana ba Anake, ba mofuta wa diqhobane; mahlong a rona, le mahlong a bona, re ne re le jwaloka mehlwanyane feela.