1 Ke bana bana ba Aarone le Moshe, mohla Jehova a buang le Moshe thabeng ya Sinai.
2 Mabitso a bara ba Aarone ke ana: Wa letsibolo ke Nadabe; e ntoo ba Abihu, le Eleasare, le Ithamare.
3 Ke wona ao mabitso a bara ba Aarone, baprista ba tlotsitsweng, ba kgethetsweng mosebetsi wa boprista.
4 Empa Nadabe le Abihu ba eshwa pela sefahleho sa Jehova, lefeelleng la Sinai, mohla ba hlahisitseng mollo osele pela sefahleho sa Jehova; ba ne ba se na bara; ke ka baka leo boEleasare le Ithamare ba kileng ba tshwara boprista pela Aarone, ntata bona.
5 Jehova a bolella Moshe, a re: Atametsa ba leloko la Levi, o ba emise pela Aarone, moprista, hore ba mo sebeletse.
6 Ba tla boloka tse beilweng ho yena, le tse beilweng ho phutheho yohle,
7 ba di boloke pela tente ya pokano, ha ba ntse ba phetha tshebetso ya tabernakele.
8 Ba tla boloka mesebetsi yohle ya tente ya pokano, le tse beilweng ho bana ba Iseraele, ba tle ba etse tshebetso ya tabernakele.
9 O tla nea Aarone le bara ba hae Balevi: o ba kgethe ho bana ba Iseraele, o mo nee bona ruri.
10 O ngole Aarone le bara ba hae, ba tle ba phethe mosebetsi wa boprista ba bona; moditjhaba ya tlang ho atamela, o tla bolawa.
11 Jehova a bua le Moshe, a re:
12 Bona, ke nkile Balevi mahareng a bana ba Iseraele; ke ba nkile bakeng sa matsibolo wohle a tswetsweng ke bomma bana ba Iseraele; ka mokgwa o jwalo Balevi ke ba ka.
13 Hobane matsibolo wohle ke a ka. Mohla ke otlang matsibolo wohle a lefatsheng la Egepeta, ke ne ke ikgethele matsibolo wohle a Iseraele, ho tloha ho a batho ho isa ho a dikgomo; e tla nne e be a ka. Ke nna Jehova.
14 Jehova a bua le Moshe, lefeelleng la Sinai, a re:
15 O ngole bara ba Levi, ka matlo a bontata bona, le ka matlo a bona. O ngole ba batona kaofela, ho qala ka ba nang le kgwedi e le nngwe ho isa ho ba fetang moo.
16 Yaba Moshe o a ba ngola ka taelo ya Jehova, le kamoo a neng a laetswe kateng.
17 Ke bana bara ba Levi ka mabitso a bona: Gershone, Kehathe le Merari.
18 Ke ana mabitso a bara ba Gershone ka matlo a bona: Libni le Shimei;
19 a bara ba Kehathe ka matlo a bona ke ana: Amrame, le Jitsehare, le Hebrone, le Usiele;
20 a bara ba Merari, ka matlo a bona ke ana: Mahali le Mushi. Ke wona matlo a Balevi ka matlo a bontata bona.
21 Ka Gershone ho hlahile ntlo ya Balibni le ntlo ya Bashimei; ke ao matlo a Bagershone.
22 Ba ngotsweng ba bona, ha ho balwa, ba batona bohle, ho qala ka ba kgwedi e le nngwe ho isa ho ba fetang moo, ke re, ba ngotsweng ba bona ya eba kete tse supileng tse makgolo a mahlano.
23 Ba matlo a Gershone ba ne ba hloma tente tsa bona kamora tabernakele, ka nqa Bophirimela.
24 Morena wa ntlo ya bontata Bagershone e ne e le Eliasafe, mora Laele.
25 Tseo bara ba Gershone ba neng ba di baballa, tseo e leng tsa tente ya pokano, e ne e le tabernakele le tente, le sekgurumetso sa yona, le lesira la monyako wa tente ya pokano,
26 le masela a lebala, le lesira la monyako wa lebala le teelang tabernakele le aletare hare ka nqa tsohle, le dikgwele tsa tente le tsa mesebetsi yohle ya yona.
27 Ka Kehathe ho hlahile ntlo ya Baamrame, le ntlo ya Bajitsehare, le ntlo ya Bahebrone, le ntlo ya Bausiele; ke ao matlo a Bakehathe.
28 Ha ho balwa ba batona bohle, ho qala ka ba kgwedi e le nngwe ho isa ho ba fetang moo, ya eba kete tse robileng meno e le mmedi, tse nang le makgolo a tsheletseng, ba baballang dintho tsa sehalalelo.
29 Ba matlo a bara ba Kehathe, ba ne ba hloma tente tsa bona ka lehlakoreng la tabernakele le ka nqa borwa.
30 Morena wa ntlo ya bontata matlo a Bakehathe e ne e le Elitsafane, mora wa Usiele.
31 Ba ne ba baballa areka, le tafole, le kandelare, le dialetare, le mesebetsi ya sehalalelo, eo ho etswang tshebeletso ka yona, le lesira, le tsona dintho tse yang le lona.
32 Morena wa marena a Balevi e ne e le Eleasare, mora Aarone, moprista. Eo o ne a hlahloba ba baballang dintho tsa sehalalelo.
33 Ka Merari ho hlahile ntlo ya Bamahali, le ntlo ya Bamushi; ke ao matlo a Bamerari.
34 Ba ngotsweng ba bona, ha ho balwa ba batona bohle, ho qala ka ba kgwedi e le nngwe ho isa ho ba fetang moo, ya eba kete tse tsheletseng, tse nang le makgolo a mabedi.
35 Morena wa ntlo ya bontata matlo a Merari, e ne e le Tsuriele, mora Abihaile. Ba ne ba hloma tente tsa bona mabapa le tabernakele, ka nqa leboya.
36 Bara ba Merari ba ne ba beilwe ho boloka dipolanka tsa tabernakele, le mekwallo ya yona, le ditshiya tsa yona, le dilulwana tsa yona, le mesebetsi yohle ya yona;
37 le ditshiya tsa lebala le teetseng tabernakele hare le didulwana tsa tsona, le dithakgisa tsa yona le dikgwele tsa yona.
38 Ba neng ba hloma ka nqa kapele ho tabernakele, ka nqa botjhabela, pela tente ya pokano, ka nqa botjhabatsatsi, e ne e le Moshe, le Aarone, ka bara ba hae, e leng bona ba baballelang bana ba Iseraele dintho tsa sehalalelo; moditjhaba ya tlang ho atamela, o tla bolawa.
39 Ba ngotsweng ba Balevi bao Moshe le Aarone ba ba ngodileng ka taelo ya Jehova, ka matlo a bona, ha ho teanngwa ba batona bohle, ho qala ka ba kgwedi e le nngwe ho isa ho ba fetang moo, ya eba kete tse mashome a mabedi a metso e mmedi.
40 Jehova a re ho Moshe: Ngola mabitso wohle a matsibolo a matona a bana ba Iseraele, ho qala ka ya nang le kgwedi e le nngwe ho isa ho ya fetang moo, o nke palo ya mabitso a wona.
41 O kgethele nna, ke leng Jehova, Balevi, bakeng sa matsibolo wohle a bana ba Iseraele; le dikgomo tsa Balevi bakeng sa matsibolo wohle a dikgomo tsa bana ba Iseraele.
42 Moshe a fela a ngola matsibolo wohle a bana ba Iseraele, kamoo Jehova a mo laetseng kateng;
43 palo ya matsibolo a matona, e leng palo ya mabitso a ba kgwedi e le nngwe le a ba fetang moo, kamoo a kileng a ngolwa kateng, ya eba kete tse mashome a mabedi a metso e mmedi, tse nang le makgolo a mabedi a mashome a supileng a metso e meraro.
44 Jehova a bua le Moshe, a re:
45 O nke Balevi bakeng sa matsibolo wohle a bana ba Iseraele, le dikgomo tsa Balevi bakeng sa dikgomo tsa bona, hore Balevi e be ba ka. Ke nna Jehova.
46 Haele ka topollo ya matsibolo a makgolo a mabedi a mashome a supileng a metso e meraro a bana ba Iseraele a fetileng palo ya Balevi, o nke dishekele tse hlano ka hlooho e nngwe le e nngwe;
47 o di nke ka tjhelete ya sehalalelo, e leng ka shekele ya digera tse mashome a mabedi.
48 O tla nea Aarone le bara ba hae tjhelete e lopollang matsibolo a fetileng palo ya Balevi.
49 Moshe a nka tjhelete e lopollang ba fetang palo ya ba seng ba lopolotswe ya Balevi,
50 mme hodima matsibolo ana a bana ba Iseraele, a nka dishekele tse kete se le seng se nang le makgolo a mararo a mashome a tsheletseng a metso e mehlano, e leng dishekele tsa sehalalelo;
51 Moshe a nea Aarone le bara ba hae tjhelete eo ya topollo, a ba nea yona ka taelo ya Jehova, le kamoo Jehova a laetseng Moshe kateng.