1 Ka kgwedi ya bosupa, ka tsatsi la pele la kgwedi, le tla ba le phutheho e kgethehileng; le ke ke la etsa mosebetsi le o mong ka lona. E tla ba letsatsi la ho letsa diterompeta haholo.
2 Le tla hlahisa setjheso se monko o monate ho Jehova sa pohwana, le pheleu, le dikonyana tse tona tse supileng tse se nang sekodi, tse lemo se le seng;
3 le nyehelo ya lefi la phofo le dubilweng ka ole;
4 e be ya karolo tse tharo ta boshome ka pohwana, le ya karolo tse pedi tsa boshome ka pheleu, le ya karolo e le nngwe ya boshome ka konyana e nngwe le e nngwe ya tse supileng.
5 Le tla hlahisa phooko ya sehlabelo sa sebe, le tle le etsetswe pheko.
6 Le tla hlahisa mahlabelo ao, kantle ho setjheso le ho nyehelo tsa kgwedi e nngwe le e nngwe, le ho setjheso sa kamehla le nyehelo, le ho ditshelo tse hlahiswang le tsona ka taelo e beilweng. Ke mahlabelo a tjheswang ka mollo, a monko o monate ho Jehova.
7 Ka tsatsi la leshome la kgwedi eo ya bosupa, le tla ba le phutheho e kgethehileng, mme le tla hlomola meya ya lona; le ke ke la etsa mosebetsi le o mong ka lona.
8 Le tla hlahisa setjheso se monko o monate ho Jehova sa pohwana, le pheleu, le dikonyana tse tona tse supileng tse lemo se le seng, tse se nang sekodi.
9 Le tla di ekeletsa ka nyehelo ya lefi la phofo le dubilweng ka ole; e be karolo tse tharo tsa boshome ka pohwana, le karolo tse pedi tsa boshome ka pheleu,
10 le karolo e le nngwe ya boshome ka konyana e nngwe le e nngwe ya tse supileng.
11 Le tla hlahisa phooko ya sehlabelo sa sebe, kantle ho sehlabelo sa dipheko le ho setjheso sa kamehla le ho nyehelo le ho ditshelo tsa tsona.
12 Ka tsatsi la leshome le metso e mehlano la kgwedi ya bosupa, le tla ba le phutheho e kgethehileng; le ke ke la etsa mosebetsi le o mong ka lona. Le tla etsetsa Jehova mokete ka matsatsi a supileng.
13 Le tla hlahisa sehlabelo se tjheswang ka mollo, e be setjheso se monko o monate ho Jehova, e leng dipohwana tse leshome le metso e meraro, le dipheleu tse pedi, le dikonyana tse tona tse leshome le metso e mene, tse se nang sekodi, tse lemo se le seng.
14 Le tla di ekeletsa ka nyehelo ya lefi la phofo le dubilweng ka ole, e be karolo tse tharo tsa boshome ka e nngwe le e nngwe ya dipohwana tse leshome le metso e meraro,
15 le karolo tse pedi tsa boshome ka e nngwe le e nngwe ya dipheleu tse pedi, le karolo e nngwe le e nngwe ya boshome ka e nngwe le e nngwe ya dikonyana tse leshome le metso e mene.
16 Le tla hlahisa phooko ya sehlabelo sa sebe, kantle ho setjheso sa kamehla le ho nyehelo le tshelo.
17 Ka tsatsi la bobedi, le tla hlahisa dipohwana tse leshome le metso e mmedi, le dipheleu tse pedi, le dikonyana tse tona tse leshome le metso e mene, tse se nang sekodi, tse lemo se le seng,
18 hammoho le nyehelo le ditshelo tse etsetswang dipohwana, le dipheleu, le dikonyana, ka palo ya tsona le ka taelo e beilweng.
19 Le tla hlahisa phooko ya sehlabelo sa sebe,
20 kantle ho setjheso sa kamehla le ho nyehelo le ditshelo.
21 Ka tsatsi la boraro, le tla hlahisa dipohwana tse leshome le motso o mong, le dipheleu tse pedi, le dikonyana tse tona tse leshome le metso e mene tse se nang sekodi, tse lemo se le seng, hammoho le nyehelo le tshelo tse etsetswang dipohwana, le dipheleu, le dikonyana, ka palo ya tsona le ka taelo e beilweng.
22 Le tla hlahisa phooko ya sehlabelo sa sebe, kantle ho setjheso sa kamehla le ho nyehelo le tshelo.
23 Ka tsatsi la bone, le tla hlahisa dipohwana tse leshome, le dipheleu tse pedi, le dikonyana tse tona tse leshome le metso e mene, tse se nang sekodi, tse lemo se le seng,
24 hammoho le nyehelo le ditshelo tse etsetswang dipohwana le dipheleu, le dikonyana, ka palo ya tsona le ka taelo e beilweng.
25 Le tla hlahisa phooko ya sehlabelo sa sebe, kantle ho setjheso sa kamehla le ho nyehelo le tshelo.
26 Ka tsatsi la bohlano, le tla hlahisa dipohwana tse robileng mono o le mong, le dipheleu tse pedi, le dikonyana tse tona tse leshome le metso e mene, tse se nang sekodi, tse lemo se le seng,
27 hammoho le nyehelo le ditshelo tse etsetswang dipohwana, le dipheleu, le dikonyana, ka palo ya tsona le ka taelo e beilweng.
28 Le tla hlahisa phooko ya sehlabelo sa sebe, kantle ho setjheso sa kamehla le ho nyehelo le tshelo.
29 Ka tsatsi la botshelela, le tla hlahisa dipohwana tse robileng meno e le mmedi, le dipheleu tse pedi, le dikonyana tse tona tse leshome le metso e mene, tse se nang sekodi, tse lemo se le seng,
30 hammoho le nyehelo le ditshelo tse etsetswang dipohwana, le dipheleu, le dikonyana, ka palo ya tsona le ka taelo e beilweng.
31 Le tla hlahisa phooko ya sehlabelo sa sebe, kantle ho setjheso sa kamehla le ho nyehelo le tshelo.
32 Ka tsatsi la bosupa, le tla hlahisa dipohwana tse supileng, le dipheleu tse pedi, le dikonyana tse tona tse leshome le metso e mene, tse se nang sekodi, tse lemo se le seng,
33 hammoho le nyehelo le ditshelo tse etsetswang dipohwana, le dipheleu, le dikonyana, ka palo ya tsona le ka taelo e beilweng.
34 Le tla hlahisa phooko ya sehlabelo sa sebe, kantle ho setjheso sa kamehla le ho nyehelo le tshelo.
35 Ka tsatsi la boroba meno e le mmedi, le tla ba le phutheho e phahameng; le ke ke la etsa mosebetsi le o mong ka lona.
36 Le tla hlahisa sehlabelo se tjheswang ka mollo, e be setjheso se monko o monate ho Jehova, e leng poho e le nngwe, le pheleu e le nngwe, le dikonyana tse tona tse supileng, tse se nang sekodi, tse lemo se le seng;
37 le nyehelo le ditshelo tsa poho, le tsa pheleu, le tsa konyana, ka palo ya tsona le ka taelo e beilweng.
38 Le tla hlahisa phooko ya sehlabelo sa sebe, kantle ho setjheso sa kamehla le nyehelo le tshelo.
39 Ke wona mahlabelo ao le tla a hlabela Jehova meketeng ya lona, e be ditjheso tsa lona, le dinyehelo tsa lona, le ditshelo tsa lona, le mahlabelo a lona a kgotso, kantle ho a etswang bakeng sa phetho ya maikano, kapa a nyehelwang feela ka ho ithatela ha motho.
40 Moshe a bolella bana ba Iseraele tsohle tseo Jehova a mo laetseng tsona.