1 Jehova a bua le Moshe, a re:
2 Bolella bana ba Iseraele, o re ho bona: Etlare ha le kene lefatsheng la kaho ya lona, leo ke tlang ho le nea lona,
3 ha le rata ho hlahisetsa Jehova sehlabelo se tjheswang ka mollo, kapa e leng setjheso, kapa e leng sehlabelo sa ho phetha maikano, kapa sa boithatelo, kapa le rata ho hlahisetsa Jehova monko o monate meketeng ya lona e kgethehileng, ka makgomo kapa ka manku a lona,
4 motho ya hlahisetsang Jehova sehlabelo sa hae, o tla hlahisa nyehelo ya karolo ya leshome ya lefi la phofo le dubilweng ka karolo ya bone ya hine ya ole;
5 le tshelo ya karolo ya bone ya hine ya veine, eo o tla e hlahisa hammoho le setjheso kapa sehlabelo, bakeng sa konyana e nngwe le e nngwe.
6 Bakeng sa pheleu, o tle o hlahise nyehelo ya dikarolo tse pedi tsa leshome tsa phofo e dubilweng ka karolo ya boraro a hine ya ole;
7 le tshelo ya karolo ya boraro ya hine ya veine, e be monko o monate ho Jehova.
8 Ha o hlahisa pohwana e be setjheso, kapa sehlabelo se phethang maikano, kapa sehlabelo sa teboho ho Jehova,
9 ho tliswe, hammoho le pohwana, nyehelo ya dikarolo tse tharo tsa leshome tsa phofo e dubilweng ka ole e lekanang halofo ya hine;
10 nyehelo ya tshelo e be halofo ya hine ya veine; ke sehlabelo se hlahiswang ka mollo, se monko o monate ho Jehova.
11 Ho nno ho etswe jwalo bakeng sa pohwana e nngwe le e nngwe, kapa sa pheleu e nngwe le e nngwe, kapa sa konyana e nngwe le e nngwe, kapa sa potsanyane e nngwe le e nngwe.
12 Le etse jwalo ka palo ya tseo le di hlahisang, bakeng sa e nngwe le e nngwe, ka palo ya tsona.
13 Bohle ba tswaletsweng ha eno, ba nno etsa dintho tseo jwalo, mohla ba hlahisang sehlabelo se etswang ka mollo, se monko o monate ho Jehova.
14 Ha motho wa ditjhaba a aheletse hara lona, kapa a tla nne a ahe hara lona kamehla, ha a rata ho hlahisa sehlabelo se etswang ka mollo, se monko o monate ho Jehova, a etse kamoo lona le etsang kateng.
15 Molao o tla ba mong wa phutheho, wa lona le wa moditjhaba ya aheletseng hara lona; e be molao wa kamehla melokong ya lona; kamoo ho leng kateng bakeng sa lona, le bakeng sa modijhaba ho tla ba jwalo pela Jehova.
16 Molao o tla ba mong le mokgwa o tla ba mong ho lona le ho moditjhaba ya aheletseng hara lona.
17 Jehova a bua le Moshe, a re:
18 Bua le bana ba Iseraele, o re ho bona: Etlere ha le fihlile naheng eo ke le isang ho yona,
19 mohla le jang bohobe ba naha eo, le tle le hlahisetse Jehova kabelo.
20 Le hlahise kabelo ya polokwe, e be dilopotsiya tsa hlama ya lona; ho be jwaloka kabelo e nkwang seotlong.
21 Melokong yohle ya lona, le tla abela Jehova kabelo ya hlama ya lona ya ho qala.
22 Ekare ha le sitilwe ka ho se tsebe, le sa ka la phetha melao kaofela eo Jehova a e boleletseng Moshe,
23 tsohle tseo Jehova a le laetseng tsona ka molomo wa Moshe, haesale e le letsatsing leo Jehova a le laetseng tsona, ho isa melokong yohle ya lona;
24 ekare ha le sitilwe ka ho se tsebe, phutheho e sa ka ya lemoha, phutheho yohle e tla hlahisa sehlabelo sa pohwana, e be setjheso se monko o monate ho Jehova, hammoho le nyehelo ya sona le tshelo ya sona e loketseng; mme le teng e hlahise phooko ya sehlabelo sa sebe.
25 Moprista a etse pheko bakeng sa phutheho yohle ya bana ba Iseraele, mme ba tla tshwarelwa; hobane ke sebe se entsweng ka ho se tsebe, mme ba tlisitse sehlabelo sa bona e le sehlabelo se etsetswang Jehova ka mollo, le sehlabelo sa sebe pela Jehova, bakeng sa sebe se entsweng ka ho se tsebe.
26 Phutheho yohle ya bana ba Iseraele e tla tshwarelwa, le yena moditjhaba ya aheletseng hara bona, kahobane setjhaba sohle se sitilwe ka ho se tsebe.
27 Ekare ha ho sitilwe motho a le mong ka ho se tsebe, o tla hlahisa sethojana sa podi se selemo se le seng, e be sehlabelo sa sebe.
28 Moprista o tla etsa pheko bakeng sa motho ya sitetsweng Jehova ka ho se tsebe; hobane a etsetswe pheko o tla tshwarelwa.
29 Le tle le be le molao o le mong bakeng sa ya ka sitwang ka ho se tsebe, kapa ke ya tswetsweng hara bana ba Iseraele, kapa ke moditjhaba ya aheletseng hara lona.
30 Empa motho ya etsang ka boomo, kapa e leng ya tswaletsweng ha eno, kapa e leng moditjhaba, yena o hobosa Jehova; motho eo o tla tloswa setjhabeng sa hae.
31 Hobane o nyedisitse lentswe la Jehova, o tlotse molao wa hae, motho eo o tla kgaolwa ruri; o tla jara bokgopo ba hae.
32 Bana ba Iseraele ha ba sa ntsane ba le feelleng, ba tshwara monna a rwalla patsi ka tsatsi la Sabatha.
33 Ba mo tshwereng a rwalla patsi, ba mo tlisa ho Moshe le Aarone, le ho phutheho kaofela.
34 Yaba o a lebelwa, kahobane ho ne ho eso ho bolelwe hoba e ka kgona a etswe jwang.
35 Yaba Jehova o re ho Moshe: Motho eo o tshwanetse ho bolawa; phutheho yohle e tla mo tlepetsa ka majwe kantle ho diahelo.
36 Yaba phutheho yohle e mo isa kantle ho diahelo, ya mo tlepetsa ka majwe, a ba a shwa, kamoo Jehova a neng a laetse Moshe kateng.
37 Jehova a bua le Moshe, a re:
38 Bua le bana ba Iseraele, o ba laele hore ba iketsetse ditjellane mephethong ya diaparo tsa bona, melokong yohle ya bona, mme ba manamise leqhwele le leputswa tjellaneng e mephethong ya diaparo tsa bona.
39 Tjellane eo e rokilweng, etlere ha le e tadima, le hopole ditaelo tsohle tsa Jehova, le di etse; le ke ke la batla tsa boithatelo ba dipelo tsa lona le ba mahlo a lona, kamoo bo ntseng bo le febisa kateng;
40 hore le tle le hopole, mme le etse melao ya ka kaofela, mme le kgethehele Modimo wa lona.
41 Ke nna Jehova, Modimo wa lona, ya le ntshitseng naheng ya Egepeta, hore ke be Modimo wa lona. Ke nna Jehova, Modimo wa lona.