1 Jehova a bua le Moshe, a re:
2 Pheteletsa bana ba Iseraele ho Bamidiane, o ntoo orohela ho setjhaba sa hao.
3 Yaba Moshe o bua le setjhaba, a re: Hlomellang banna ba lona ba ka yang ntweng, ba futuhele Bamidiane, hore ba phethe phetetso ya Jehova hodima Bamidiane.
4 Le tla romela ntweng banna ba sekete ka leloko le leng le le leng ho meloko yohle ya Iseraele.
5 Yaba hara diketekete tsa Iseraele ho kgethwa banna ba sekete ka leloko le leng le le leng; ke ho re, ha tswa banna ba dikete tse leshome le metso e mmedi ba hlometseng.
6 Moshe a romela banna bao ntweng, e le ba sekete ka leloko le leng le le leng, a romela le bona ntweng mora wa moprista Eleasare, Finease, a jere dintho tse kgethehileng le diterompeta tse mantswe a phepa.
7 Ba futuhela Bamidiane ka taelo eo Jehova a e neileng Moshe, mme ba bolaya ba batona kaofela.
8 Ba bolaya marena a Midiane; boEvi, le Rekeme, le Tsure, le Hure, le Reba, marena a mahlano a Midiane, le yena Balaame, mora Beore, ba mmolaya ka lerumo.
9 Bana ba Iseraele ba hapa basadi ba Bamidiane le bana ba bona, mme ba hapa makgomo a bona kaofela, le mehlape ya bona kaofela, le maruo wohle a bona.
10 Ba tjhesa metse yohle eo ba neng ba ahile ho yana, le masaka wohle a bona.
11 Ba nka thepa kaofela le kgapo yohle, e leng batho le makgomo;
12 mme ba tshwerweng, le kgapo yohle, le thepa, ba di tlisetsa Moshe, le moprista Eleasare, le phutheho ya bana ba Iseraele diahelong, lehwatateng la Moabe, haufi le Jordane, mabapa le Jeriko.
13 Moshe, le moprista Eleasare, le baholo bohle ba setjhaba, ba tswela ho ba kgahlanyetsa kantle ho diahelo.
14 Moshe a halefela balaodi ba makgotla, le balaodi ba dikete, le balaodi ba makgolo, ba neng ba kgutla ntweng.
15 A re ho bona: Na le tloheletseng basadi kaofela hore ba phele? Ha ke re, ke bona, ka ho latela keletso ya Balaame, ba kgopisitseng bana ba Iseraele hore ba kwenehele Jehova ka taba ya Baale-Peore,
16 sewa sa ba sa wela hodima phutheho ya Jehova?
17 Jwale, bolayang ba batona kaofela ba hara bana, le bolaye mosadi e mong le e mong ya kileng a tsebana le monna diphateng;
18 le mpe le ipolokele barwetsana bohle ba pholohileng ba sa kang ba tseba malao a monna.
19 Haele lona, salang ka ntle ho diahelo ka matsatsi a supileng; bohle ba ho lona ba bolaileng motho le bohle ba amileng setopo, ba tle ba itlhatswe ka la boraro le ka la bosupa, bona hammoho le batshwaruwa ba bona.
20 Hape le tla hlatswa diaparo kaofela le dintho tsohle tsa letlalo, le tse entsweng ka boya ba dipodi, le dijana tsa mahong.
21 Moprista Eleasare a bolella bahlanka ba neng ba ile ntweng, a re: Se laetsweng ke Jehova ka molao o neilweng Moshe ke sena:
22 Kgauta, le silefera, le koporo, le tshepe, le boleke, le loto,
23 dintho tsohle tse ka hlolang mollo, le tla di kenya mollong, hore di hlwekiswe; leha ho le jwalo, di tla hlatsuwa le ka metsi a hlatsuo. Tsohle tse ka sitwang ho hlola mollo, le tla di tsobunya metsing.
24 Le tla hlatswa diaparo tsa lona ka la bosupa, mme etlaba le hlwekile; hamorao, le tla dumellwa ho kena diahelong.
25 Jehova a re ho Moshe:
26 Bala thepa le tse hapilweng kaofela, batho le makgomo, o di bale le ena le moprista Eleasare le dihlooho tsa matlo a phutheho.
27 O arole kgapo habedi; karolo e nngwe o e nee bahlabani ba neng ba ile ntweng, e nngwe o e nee phutheho yohle.
28 Lefohlong la bahlabani ba ileng ntweng, o nkele Jehova lekgetho; o nke e nngwe hodima tse makgolo a mahlano, leha e le bathong, leha e le dikgomong, le dieseleng, le dikgutshwaneng.
29 Le tla di nka lefohlong la bona, mme o tla di nea moprista Eleasare ka mokgwa wa nyehelo e etsetswang Jehova.
30 Karolong ya bana ba Iseraele, o tla nka e nngwe ho tse mashome a mahlano, leha e le bathong, leha e le dikgomong, le dieseleng, le dikgutshwanyaneng, le diphoofolong tsohle, mme o tla di nea Balevi ba lebelang tabernakele ya Jehova.
31 Moshe le moprista Eleasare ba etsa tsohle tseo Jehova a di laetseng Moshe.
32 Haele kgapo, kantle ho dintho tse neng di nkilwe ke ba neng ba ile ntweng, e ne e le dikgutshwane tse dikete tse makgolo a tsheletseng a nang le mashome a supileng a metso e mehlano;
33 le dikgomo tse dikete tse mashome a supileng a metso e mmedi;
34 le diesele tse dikete tse mashome a tsheletseng a motso o mong;
35 le batho ba dikete tse mashome a mararo a metso e mmedi, ke ho re ba batshehadi ba neng ba eso ho tsebe malao a monna.
36 Halofo e nngwe ya kgapo, e leng lefohlo la ba neng ba ile ntweng, ya eba dikgutshwane tse dikete tse makgolo a mararo a nang le mashome a mararo a metso e supileng le makgolo a mahlano;
37 lekgetho la tseo la Jehova ya eba dikgutshwane tse makgolo a tsheletseng a nang le mashome a supileng a metso e mehlano;
38 dikgomo ya eba tse dikete tse mashome a mararo a metso e tsheletseng; ho tseo, tse mashome a supileng a metso e mmedi tsa nkelwa lekgetho la Jehova;
39 diesele ya eba tse dikete tse mashome a mararo tse nang le makgolo a mahlano; ho tseo, tse mashome a tsheletseng a motso o mong tsa nkelwa lekgetho la Jehova;
40 batho ya eba ba dikete tse leshome le metso e tsheletseng; ho bao, ba mashome a mararo a metso e mmedi ba nkelwa lekgetho la Jehova.
41 Ka taelo eo Jehova a neng a mo neile yona, Moshe a nea moprista Eleasare lekgetho la Jehova ka mokgwa wa nyehelo.
42 Haele halofo e nngwe ya kgapo, e leng ya bana ba Iseraele, e arotsweng ke Moshe ho ya bahlabani,
43 karolo eo ya phutheho, ya eba dikgutshwane tse dikete tse makgolo a mararo a nang le mashome a mararo a metso e supileng le makgolo a mahlano,
44 le dikgomo tse dikete tse mashome a mararo a metso e tsheletseng,
45 le diesele tse dikete tse mashome a mararo tse nang le makgolo a mahlano;
46 le batho ba dikete tse leshome le metso e tsheletseng.
47 Hodima halofo eo ya dintho tse neilweng bana ba Iseraele, Moshe a nka e nngwe hodima tse mashome a mahlano, leha e le bathong, leha e le diphoofolong; mme ka taelo eo a e neilweng ke Jehova, Moshe a di nea Balevi, e leng balebedi ba tabernakele ya Modimo.
48 Balaodi ba makgotla a ntwa, balaodi ba dikete, le balaodi ba makgolo ba atamela Moshe, mme ba re ho yena:
49 Bahlanka ba hao ba badile bahlabani ba neng ba le taolong ya rona, mme ha ho le a mong wa rona ya hlokahalang.
50 Re tliseditse Jehova nyehelo ya dintho tsa kgauta tseo e mong le e mong wa rona a di fumaneng, maqakatsa, le dipetja, le masale a menwana le a mmofa, le matjekwana, ho tle ho etsetswe meya ya rona pheko pela Jehova.
51 Yaba Moshe le Eleasare ba amohela ho bona mesebetsi eo yohle ya kgauta.
52 Boima ba kgauta yohle eo balaodi ba dikete le balaodi ba makgolo ba e tliseditseng Jehova, ho etsa nyehelo e emiswang, ya eba dishekele tse dikete tse leshome le metso e tsheletseng tse nang le makgolo a supileng a mashome a mahlano.
53 (Hobane bahlabani ba ne ba nkile thepa, e mong le e mong a inketse yona.)
54 Moshe le moprista Eleasare ba nka kgauta ya balaodi ba dikete le ya balaodi ba makgolo, mme ba e tlisa tenteng ya pokano, e tle e be kgopotso ho bana ba Iseraele pela Jehova.